ۋكراين حالقى جەڭىسكە جەتتى. وزگەرىس پەن جەڭىسكە دەگەن بوستاندىققا تولى سەنىم ۋكراين حالقىن جارىق كۇننىڭ استىنا الىپ شىقتى. دۇنيەنىڭ كوز الدىندا ۋكراينانىڭ قۇلدىق سانادان ازات حالقى ءوز تاڭداۋىن جاسادى. ءوز تالابىن العا شىعاردى. الەمدى، اسىرەسە، قالىڭ ساياسي ۇيقى قۇشاعىندا جاتقان ورتا ازيا ەلدەرىن ۋكراينا حالقىنىڭ "ۋكراينا ەشقاشان ولمەيدى!" "ۋكراينا ءبىزدى سۇيەدى!" دەپ كەلەتىن كيەۆتەگى مايداننىڭ ءانۇرانىنا اينالعان ۆيدەروليك كەزىپ ءجۇر. ۋكراينداردىڭ ءور رۋحى ۇرەيگە تولى جۇرەكتەردى شىمىرلاتىپ، تاماعىنان العان تۇرمىستىق يلەۋدە جاتقان جۇرتتىڭ كوكىرەگىنە اششى زاپىران تولتىرىپ، "كوكتەمدى" كۇتكەن كوزدەرگە جاس ءۇيىرىپ تۇر...

ەۋرومايداننىڭ ءانۇرانى رۋحتاندىرعان ۋكراين ازاماتتارى ۆيدەروليكتەر جاساپ (تومەندەگى ۆيدەو), youtube-قا جۇكتەگەن. وسى ۆيدەوروليك تۋرالى، ناقتىراق ايتقاندا ءبىزدىڭ رەجيسسەرلەر مۇنداي روليكتى قالاي جاسار ەدى دەگەن ساۋال توڭىرەگىندەگى جۋرناليست ايدوس جۇقانۇلىنىڭ (3-ءنشى سۋرەتتە) جازباسىن جاريالاپ وتىرمىز.

Abai.kz

تومەندەگى روليكتى ءبىزدىڭ رەجيسسەرلەر جاساسا قايتەر ەدى؟

ۋكراين حالقى جەڭىسكە جەتتى. وزگەرىس پەن جەڭىسكە دەگەن بوستاندىققا تولى سەنىم ۋكراين حالقىن جارىق كۇننىڭ استىنا الىپ شىقتى. دۇنيەنىڭ كوز الدىندا ۋكراينانىڭ قۇلدىق سانادان ازات حالقى ءوز تاڭداۋىن جاسادى. ءوز تالابىن العا شىعاردى. الەمدى، اسىرەسە، قالىڭ ساياسي ۇيقى قۇشاعىندا جاتقان ورتا ازيا ەلدەرىن ۋكراينا حالقىنىڭ "ۋكراينا ەشقاشان ولمەيدى!" "ۋكراينا ءبىزدى سۇيەدى!" دەپ كەلەتىن كيەۆتەگى مايداننىڭ ءانۇرانىنا اينالعان ۆيدەروليك كەزىپ ءجۇر. ۋكراينداردىڭ ءور رۋحى ۇرەيگە تولى جۇرەكتەردى شىمىرلاتىپ، تاماعىنان العان تۇرمىستىق يلەۋدە جاتقان جۇرتتىڭ كوكىرەگىنە اششى زاپىران تولتىرىپ، "كوكتەمدى" كۇتكەن كوزدەرگە جاس ءۇيىرىپ تۇر...

ەۋرومايداننىڭ ءانۇرانى رۋحتاندىرعان ۋكراين ازاماتتارى ۆيدەروليكتەر جاساپ (تومەندەگى ۆيدەو), youtube-قا جۇكتەگەن. وسى ۆيدەوروليك تۋرالى، ناقتىراق ايتقاندا ءبىزدىڭ رەجيسسەرلەر مۇنداي روليكتى قالاي جاسار ەدى دەگەن ساۋال توڭىرەگىندەگى جۋرناليست ايدوس جۇقانۇلىنىڭ (3-ءنشى سۋرەتتە) جازباسىن جاريالاپ وتىرمىز.

Abai.kz

تومەندەگى روليكتى ءبىزدىڭ رەجيسسەرلەر جاساسا قايتەر ەدى؟

بۇيتەر ەدى: مادەنيەت جانە اقپارات مينيسترلىگىنىڭ تاپسىرىسى بويىنشا تەندەردى "جەڭدەر" دەپ تۇسىنەدى. البەتتە، 25% «راحمەتى» جوعارىعا كەتەدى.
 

ءى نۇسقا

ەسكى كولىكتى جوندەمەيمىز. دامىعان 50 ەلدە ولاي بولۋى مۇمكىن ەمەس. جاڭا ءبىر كولىكتىڭ ايناسىن سامال ش/ا-دا ءسۇرتىپ تۇرامىز دا، سول ايناداعى ءوز بەينەمىزگە قاراپ قيالعا كەتەمىز. ايتپاقشى، ول كولىك لادا بولۋى كەرەك. ايتپەسە، ستراتەگيالىق ارىپتەسىمىزدىڭ كوڭىلىنە قاياۋ تۇسىرەمىز. كەدەن وداعىنا قايشى ماتەريالعا رەسپۋبليكالىق تەلەارنادا ورىن جوق. كىشكەنتاي ءبۇلدىرشىن قىز پلانشەتتە سۋرەت سالۋى كەرەك. ونى وزىمىزدە شىعارا باستادىق ەمەس پە؟! ماقسات - ەلۋ ەمەس، وتىزدىققا ءىلىنۋ. ءىلىنىپ-سالىنعانى نەسى؟ تاپتاپ وتەمىز! جوعارى كلاسستىڭ وقۋشىسى تىڭداپ وتىرعان قۇرال جايفون بولماۋى كەرەك. جاسىرىن جارناما. اقشا جاساپ قالۋ كەرەك قوي. ارى قاراي كەتتىك. ەكى وقۋشىنىڭ قوڭىر تاقتاعا بورمەن جازۋى ورتا ازيانىڭ ۇلكەن مىسىعىنا جات نارسە. مىندەتتى تۇردە ينتەراكتيۆتى تاقتا تۇرعانى ءجون. كەمپىردىڭ گۇل ساتىپ كۇنەلتۋى - جابايى كاپيتاليزمنىڭ كورىنىسى. ورىس كەمپىر گۇلزاردا چيحۋاحۋاسىمەن كەتىپ بارا جاتۋى كەرەك. مىنە، وسىلاي.
 

ءىى نۇسقا

الدىڭعى نۇسقادا "اقشا قايدا كەتتى؟" دەگەن قاڭقۋ بولۋى كادىك. سوندىقتان مولىنان قارپيمىز. وزىمىزدىكىن مەنسىنبەي، رەسەيدەن بەينەوپەراتور جالداپ الادى. ول الماتى مەن استانانى ءتۇسىرىپ شىعادى. كورىنىس بىلاي. كوكتوبە. قىرعىز تىماق كيگەن قازاق شال دجيپتەن ءتۇسىپ الماتىنىڭ ۇستىنەن قارايدى. كولىكتىڭ ارتقى ەسىگىنەن ورىس كۇيەۋ بالاسى شىعادى دا، قازاق كەلىنشەگىن قولىنان دەمەپ تۇسىرەدى. بولماسا، كەرىسىنشە. ەركەگى قازاق، ورىسى ايەل. باسقا "128 ۇلتتى" مويىندامايمىز. ويتكەنى، ورىسسىز ءومىر سۇرە المايتىن قۇلدىق-تولەراستىق سانامىز باسقاشا ويلاي المايدى. سوسىن كوكتوبەدەن كەزقۇيرىق ۇشىپ شىعادى. بۇركىت ەمەس. سەبەبى، قالادا وسكەن رەجيسسەر جەمتىككە ءۇيىر كەزقۇيرىق پەن التايدىڭ اقيىعىن ايىرا المايدى. كەزقۇيرىقتىڭ كوزىمەن قازاقتىڭ دالاسىن جانە سول اتىراپتاعى دەۆالۆاتسيانى بولدىرماي تۇرعان ۇلكەن-ۇلكەن ءوندىرىس-زاۋىتتارىن كورسەتەدى. ارى قاراي استانامىز استاناعا جەتەدى. اقوردانى التى اينالىپ، بايتەرەكتى بەس اينالىپ ستاديونعا جەتەدى. وندا "جاس قاناتتىڭ" جۇگەرمەكتەرى مويىندارىنا سارى شۇبەرەك بايلاپ الىپ، "كازاحستان!" دەپ شىڭعىرادى. تاعى ءبىر ۋنيۆەرسيتەتتىڭ رەكتورى وتە-موتە جاۋجۇرەك ءۇش مىڭعا جۋىق بالا-شاعاسىمەن الگىلەرگە قوسىلىپ، "I love you, Kazakhstan" دەپ باقىرادى. كوك جاشىككە قۇدايداي سەنەتىن ايگۇل اپامىز اۋىلدا مۇنىڭ ءبارىن كورىپ، قاتتى رۋحتانادى. ارى قاراي مۇرنىنا سىرگە تاققان ء"اناندىنى" كورىپ، پاتريوتتىق سەزىمى ودان ارمەن ءوربي تۇسەدى.
شىن ايتام، ءبىزدىڭ رەجيسسەرلەرگە كرەاتيۆ جەتپەيدى. جاڭاشا ويلاۋ قيىن. ءبىر قورانىڭ ىشىندە جۇرگەنى. شقو ۇلان اۋدانىندا ءسىلام دەگەن قويشى بولدى. ايىرتاۋ دەگەن قيىر جازىقتاعى قىراتقا قاراپ تۇرىپ ايتقانى ءالى ەسىمنەن كەتپەيدى. "ايىرتاۋعا شىقساڭ قىتاي كورىنە مە؟" دەيدى. ءبىزدىڭ رەجيسسەرلەر الاتاۋ مەن اقوردانىڭ قاسىندا ايلانبا اۋرۋىنا شالدىققان توقتى سەكىلدى جۇرگەنى، ءبىر جەردىڭ عانا شوبىنە مالدانىپ. "ەسىل اعادى" دەپ اندەتسە دە رۋحىم كوتەرىلمەيدى. استانانىڭ اينەك عيماراتتارى دا جانىڭدى سەلت ەتكىزبەيدى. "دامىعان ەلۋ ەلگە كىرەمىز" دەپ كارى-جاسى ستاديون ىشىندە سارىجاعال مويىنوراۋىشتارىن جەلبىرەتىپ تۇرعانى دا كوڭىلىمدى كونشىتپەيدى.
كىتاپ وقىتۋمەن رۋحتى كوتەرەتىن زامان كەتتى. ەندىگى جول سول كىتاپتى كليپ، روليك پەن كينوعا اينالدىرۋ. "جاۋشى"، "باتىر بايان"، "جاۋجۇرەك مىڭ بالا" سەكىلدى ومىردە قازىر جوق جوڭعارمەن سوعىسقانىنا ءماز. جوڭعار دەگەنىمىز "سول قانات" دەگەن ءسوز. ال وڭ قاناتى مەن باسى، بۇكىل دەنەسى جورىققا شىقسا نە بولدىق؟ مۇنى ەستىگەن موڭعولدار ارتىن اشىپ كۇلەدى. كەنەسارى، ماحامبەت، يساتاي تۋرالى فيلم تۇگىلى كليپ ءتۇسىرۋ ارمان بولدى. بىراق كەڭەستىك كوبەنتەدەن شىققان، دامۋدان قالعان قازاقتار كەتكەن سوڭ بۇل جوقتىڭ دا ورنى تولاتىنىنا سەنىمدىمىن. ال ازىرگە يدەولوگيامىز ۇيدەلوگيا نەمەسە تىنىش وتىرولوگيا بولىپ تۇر.
ايتپاقشى، مىنا روليكتە «ۋكراينا ليۋبيت ناس!» دەيدى. ءبىز «قازاقستاندى جاقسى كورەمىز!»"، «قازاقستاندى سۇيەمىز!» دەيمىز. ال قازاقستان ءبىز دەگەندە ء«ولىپ-وشە» مە؟