ءمۇشايرا: «ماڭگىلىك ەل – ۇلت مۇراتى»
«ماڭگىلىك ەل – ۇلت مۇراتى» اتتى رەسپۋبليكالىق جىر-ءمۇشايراسى
استانا قالاسى اكىمدىگى استانا كۇنى مەرەكەسى قارساڭىندا «ماڭگىلىك ەل – ۇلت مۇراتى» اتتى رەسپۋبليكالىق ءمۇشايرا جاريالايدى.
قر پرەزيدەنتى – ەلباسىنىڭ بيىلعى جولداۋى قوعامدىق ويعا ۇلكەن سەرپىلىس تۋدىردى.
«ماڭگىلىك ەل – ۇلت مۇراتى» اتتى رەسپۋبليكالىق جىر-ءمۇشايراسى
استانا قالاسى اكىمدىگى استانا كۇنى مەرەكەسى قارساڭىندا «ماڭگىلىك ەل – ۇلت مۇراتى» اتتى رەسپۋبليكالىق ءمۇشايرا جاريالايدى.
قر پرەزيدەنتى – ەلباسىنىڭ بيىلعى جولداۋى قوعامدىق ويعا ۇلكەن سەرپىلىس تۋدىردى.
ء مۇشايرانىڭ ماقساتى – تونىكوك ابىز تاسقا قاشاپ، اسانقايعى ارمانداعان، كەشەگى الاش قايراتكەرلەرلى وسيەت ەتكەن، بۇگىنگى قازاق ۇرپاعى جۇزەگە اسىرۋعا سەرت بەرىپ، بەل بۋعان «ماڭگىلىك ەل» مۇراتىن جاس ۇرپاققا ناسيحاتتاۋ; «ماڭگىلىك ەل» رۋحى جولىندا قاسىق قانى قالعانشا شايقاسىپ، اتامەكەننىڭ سىنىق سۇيەم جەرىن دۇشپانعا باستىرماي كەۋدەسىمەن قورعاعان باتىر بابالارىمىزدىڭ، قاھارمان حاندارىمىزدىڭ، ەلدىڭ بىرلىگىن دانالىعىمەن ۇيىتقان بي-شەشەندەرىمىزدىڭ ەرلىك ىستەرىن، وتانسۇيگىش ونەگەسىن جاستارعا ۇلگى ەتۋ; قازاق حالقىنىڭ ءاردايىم تاتۋلىق پەن ىنتىماقتى ۇلگى ەتكەن دارحان مىنەزىن، اۋىزبىرشىلىك پەن ادالدىقتى، ەڭبەكقۇمارلىق پەن اقىل-ويدى قاسيەتتەگەن ىزگىلىكتى ءداستۇر-سالتىن جىر تىلىمەن كەستەلەۋ; سوناۋ ساق، عۇن، تۇركى بابالارىمىزدىڭ التىن اڭىزىمەن اسپەتتەلگەن قازاق ەلىنىڭ ەلتاڭباسى، كوك بايراعى، انۇرانىنداعى رامىزدەردى ۇلىقتاۋ; قازاقستاننىڭ كەڭ بايتاق شەكارا شەبىن قاس قاقپاي كۇزەتىپ تۇرعان ەرجۇرەك ساردارلارىمىز بەن جاۋىنگەرلەرىمىزگە جىگەر بەرەتىن، نامىسىن قايرايتىن تولعاۋلار مەن داستاندار تۋدىرۋ; كەڭىرەك ايتقاندا «ماڭگىلىك ەل» ۇلى مۇراتىمىزدىڭ ماعىنالىق كەڭىستىگىنە تۇپقازىق بولىپ تۇرعان انا ءتىلىمىزدى، اتا ءدىلىمىزدى، ادەت-عۇرپىمىزدى، شەجىرەلى تاريحىمىزدى، مادەني مۇرامىزدى كوزدىڭ قاراشىعىنداي ساقتاۋعا جاستاردى شاقىراتىن مايەكتى ولەڭدەر تۋدىرۋ; قازاق ەلىنىڭ تاۋەلسىزدىگى جولىندا ارپالىسىپ ەسىمى ەل جادىندا ماڭگى ساقتالعان قاھارمان تۇلعالار مەن حالقى ءۇشىن وي شىراعدانىن جاعىپ ازاتتىققا ولشەۋسىز ۇلەس قوسقان كەمەڭگەر قايراتكەرلەردىڭ تاعدىرىن جىرلاۋ ارقىلى ازاتتىقتىڭ نارقى مەن پارقىن ايقىنداۋ; سونىمەن بىرگە الاشتىڭ ماقتانىشى بولعان، جاڭا عاسىردا الەمنىڭ ساياسي-مادەني ەلەۋلى وقيعالارى وتەتىن ىزگىلىك پەن تاتۋلىقتىڭ، حالىقارالىق ۇنقاتىسۋدىڭ ورداسىنا اينالعان، جۋىقتا حالىققا ەسەپ بەرۋ كەزدەسۋىندە استانا اكىمى ي.تاسماعامبەتوۆ ايتقانداي «ماڭگىلىك ەلدىڭ التىن دىڭگەگى – استانا» وسى ءمۇشايرانىڭ نەگىزگى ۇيتقىسى، التىن ارقاۋى بولىپ وتىرعاندىقتان استانا شاھارىنىڭ كەسكىن-كەلبەتىن كەستەلى تىلمەن زەرلەپ، جاس ۇرپاققا ۇلاعات ەتۋ; وسى قادامدار ارقىلى الدا كەلە جاتقان استانا كۇنى قارساڭىندا قاسيەتتى تاۋەلسىزدىكتىڭ كوركەم شەجىرەسىن، تاريحي تامىرىن، ءمان-ماڭىزىن جىرمەن ايشىقتاپ، «ماڭگىلىك ەل» ۇلتتىق يدەياسىنىڭ باعىتى مەن باپتارىن، سان-سالالى كەڭىستىك اياسىن ولەڭمەن ورنەكتەپ، ۇرپاقتىڭ ساناسىنا ۇيالاتۋ;
ەلىن باقىتقا جەتكىزگەن، الەمدەگى دامىعان ەلدەرمەن تەرەزەسىن تەڭەستىرگەن ۇلت كوشباسشىنىڭ وتانىمىزدىڭ بولاشاعانىنا التىن تۇعىر ەتكەن «ماڭگىلىك ەل» يدەياسىن ناسيحاتتاپ، پاراسات پەن ىزگىلىككە تولى جاۋھار جىر تۋدىرعان مايتالمان اقىندارعا جۇلدە بەرىلەدى. مۇشايراعا ەش جەردە جارىق كورمەگەن ولەڭدەر، تولعاۋلار، پوەمالار قابىلدانادى.
باس جۇلدە – جەڭىل اۆتوكولىك.
ءبىرىنشى ورىن – بىرەۋ
ەكىنشى ورىن – ەكەۋ
ءۇشىنشى ورىن – ۇشەۋ
ىنتالاندىرۋ سىيلىقتارى – بەسەۋ
مۇشايراعا قاتىسۋشىلاردىڭ شىعارمالارى كومپيۋتەرگە باسىلعان بەس دانادان كەم ەمەس جانە ەلەكتروندى نۇسقاسىمەن 2014 جىلدىڭ 5 ماۋسىمىنا دەيىن مىنا مەكەنجايعا كەلىپ ءتۇسۋى كەرەك:
يندەكس: 010000, استانا قالاسى، اۋەزوۆ كوشەسى، 20 «ا»، ساكەن سەيفۋللين مۇراجايى. تەل.: 32-84-67, 53-34-03, e-mail:seifullin_museum @mail.ru.
ءمۇشايرا قورىتىندىسى قالا مەرەكەسى كۇنى قارساڭىندا شىعارىلادى. جۇلدەگەرلەردىڭ استاناعا كەلىپ-كەتۋ جول شىعىنى مەن جاتار ورنى ماسەلەسىن ۇيىمداستىرۋ كوميتەتى موينىنا المايدى. قازىلار القاسىنىڭ شەشىمى قايتا قارالمايدى.
ۇيىمداستىرۋ كوميتەتى
