يزرايل رەسمي تۇردە ليۆانداعى «حەزبوللاعا» قارسى كەڭ اۋقىمدى وپەراتسيا باستادى! وعان «سولتۇستىك جەبەلەرى» دەپ ات قويدى. وپەراتسيانىڭ ماقساتى - ەۆرەي مەملەكەتىنىڭ شەكارالاس اۋداندارىن بومبالاۋدى توقتاتىپ، تۇرعىنداردى ەلگە قايتارۋ.

يزرايل ارمياسى قازىردىڭ وزىندە «حەزبوللانىڭ» مىڭنان اسا نىساناسىنا شابۋىل جاساعان. 600-گە جۋىق ادام قازا تاۋىپ، 1,8 مىڭنان كوپ ادام جاراقات العان. بۇل اقىرعى ەسەپتەۋلەر ەمەس. دەمەك، بۇل ساندار ءسات سايىن وزگەرەدى.

ليۆاننىڭ دەنساۋلىق ساقتاۋ ءمينيسترى فيراس ابياد ءبىر اپتادان از ۋاقىت ىشىندە ءيزرايلدىڭ شابۋىلىنان 5 مىڭعا جۋىق ادام جاراقات العانىن ايتادى. تەك قانا پەيدجەرلەر مەن راديولاردىڭ جاپپاي جارىلىسى كەزىندە 3 مىڭعا جۋىق ادام زارداپ شەككەن. ليۆان بيلىگى بۇل شابۋىل ءۇشىن ءيزرايلدى ايىپتاپ وتىر.

دەنساۋلىق ساقتاۋ مينيسترلىگى باسشىسىنىڭ ايتۋىنشا، ليۆاندىقتار 1975-1990 جىلدارداعى ازاماتتىق سوعىس اياقتالعاننان بەرى العاش رەت وسىنداي اۋقىمدى شىعىنعا ۇشىراۋدا.

ليۆان پرەمەر-ءمينيسترى نادجيب ميكاتي ءيزرايلدىڭ جاپپاي شابۋىلىن ايىپتاپ، ونى «دەسترۋكتيۆتى جوسپاردىڭ ءبىر بولىگى» دەپ اتادى. ول بۇۇ-نى «يزرايل اگرەسسياسىن توقتاتۋعا» شاقىردى.

ءيزرايلدىڭ ليۆان اۋماعىنداعى وپەراتسياسى قاتىستى پىكىر بىلدىرگەن يزرايل پرەمەرى نەتانياحۋ: «ءالى تۇسىنبەگەندەر ءۇشىن مەن ءيزرايلدىڭ ساياساتىن ناقتىلاعىم كەلەدى: ءبىز قاۋىپ كۇتپەيمىز، ءبىز ودان وزامىز. بارلىق جەردە، ءار مايداندا، كەز كەلگەن ۋاقىتتا. ءبىز جوعارى لاۋازىمدى كومانديرلەردى جويامىز، تەرروريستەردى جويامىز، زىمىرانداردى جويامىز! بۇل تەك باستاماسى عانا. كىم بىزگە سوققى بەرۋگە تىرىسسا، ءبىز ولارعا وسىلاي جاۋاپ بەرەمىز!»، - دەدى.

قازاقستاننىڭ ليۆانداعى ەلشىلىگى سول جەردەگى قازاقستاندىقتارعا ۇندەۋ جاسادى. ليۆانداعى شيەلەنىستىڭ كۇشەيۋىنە بايلانىستى ليۆانداعى قازاقستان ازاماتتارىن قاجەتتى ساقتىق شارالارىن ساقتاۋعا، اتاپ ايتقاندا، جەرگىلىكتى بيلىكتىڭ بارلىق نۇسقامالارىن قاتاڭ ورىنداپ، قوزعالىستى بارىنشا ازايتۋعا شاقىرادى.

«ليۆاننىڭ وڭتۇستىگىندە جانە بەكاا القابىندا تۇراتىن ازاماتتارعا جاعداي قالىپقا كەلگەنگە دەيىن ەلدىڭ سالىستىرمالى تۇردە قاۋىپسىز ورتالىق جانە سولتۇستىك ايماقتارىنا ۋاقىتشا كوشۋدى نەمەسە ليۆاننان كەتۋدى قاراستىرعان ءجون. كوممەرتسيالىق رەيستەر ءالى ءجۇرىپ جاتىر»، - دەلىنگەن حابارلامادا.

Abai.kz