«كوكتەمنەن باستاپ اۋا رايى ەگىنشىلەرگە قولايلى بولدى. ارينە، تامىز ايىنداعى جاۋىن-شاشىننىڭ ءبىراز اسەرى بار. كەشە عانا ءىرى فەرمەرلەرمەن كەزدەستىم. سولار قامباعا تۇسەتىن استىقتىڭ كوبى ءتورتىنشى كلاستى ءونىم بولاتىن سياقتى دەپ وتىر. بىراق ءتورتىنشى كلاستى استىق ەكسپورتقا جارامسىز دەپ ويلاۋعا بولمايدى. ويتكەنى ودان ۇن شىعارۋعا بولادى. قىرىپ كەتكەن دانەڭە جوق. سوندىقتان بيىلعى ىلعالدى جاز استىق ەكسپورتىن كۇيرەتىپ كەتتى دەۋگە كەلمەيدى. مىسالى، اۋعانستان سياقتى وڭتۇستىگىمىزدەگى نەگىزگى نارىقتار كەرىسىنشە ءبىرىنشى، ەكىنشى، ءۇشىنشى كلاستى بيدايدى ەمەس، ءتورتىنشى كلاستى بيدايدى كوبىرەك ساتىپ الادى. ويتكەنى ولار بيدايدى ۇن ءۇشىن الادى. ونىڭ ۇستىنە باعاسى دا وزدەرىنە قولايلى»، - دەيدى ول.

تولەۋتاي راحىمبەكوۆ قازاقستان استىعىنا بيىل دا سۇرانىس بار ەكەنىن، بىراق ونىڭ باعاسى جىلداعىدان الدەقايدا تومەن بولاتىنىن اتاپ ءوتتى.

«بۇدان باسقا ءبىر ماسەلە بار. ول وسى باعامەن بايلانىستى. بيىلعى ەرەكشە قيىندىق دەۋگە دە بولادى. تامىزدىڭ باسىندا الماتى وبلىسىندا بيداي باعاسى تونناسىنا 35-40 مىڭ تەڭگەگە دەيىن ءتۇسىپ كەتتى. قازىر سولتۇستىك قازاقستاندا بيدايدىڭ تونناسى 70-75 مىڭ تەڭگە، ارپانىڭ تونناسى 40-45 مىڭ تەڭگە بولىپ تۇر. ال وسىدان ەكى جىل بۇرىن بيدايدىڭ ءبىر تونناسى 180-200 مىڭ تەڭگە بولعان. قازىر 70 مىڭ تەڭگە دەسەك، 2-2,5 ەسە ارزانداپ كەتكەن. ال بىراق وندىرىسكە دەپ ساتىپ الاتىن زاتتارى 2,5 ەسە ارزانداعان جوق قوي. ايلىق، جانارماي شىعىندارى دا جىلدان جىلعا ارتپاسا، ازايىپ جاتقان جوق. سوندىقتان مەملەكەتتىك قولداۋ ساياساتىن كۇردەلى تۇردە وزگەرتۋ كەرەك. 4-5 جىلدان بەرى ايتىپ جۇرگەن ماسەلە بار. قازىر قولدانىستاعى مەملەكەتتىك اگرارلىق ساياسات ەكى عاسىردىڭ توعىسىندا ازىرلەنگەن. ودان بەرى كوپ دۇنيە وزگەردى. فەرمەرلەردىڭ ءبىلىم-بىلىگى، كوزقاراسى كەڭەيدى. الەمدە جاڭا ترەندتەر پايدا بولىپ جاتىر. سونىڭ بارىنە جاۋاپ بەرە الاتىن ساياسات كەرەك»، - دەيدى ساراپشى.