بۇگىنگى اقپاراتتىق كەڭىستىكتەگى بالالاردىڭ قاۋىپسىزدىگى، كيبەربۋللينگ، ونلاين پلاتفورمالاردىڭ، اسىرەسە، TikTok الەۋمەتتىك جەلىسىنىڭ جاستارعا تەرىس اسەرى جونىندە سەنات مىنبەرىنەن دەپۋتاتتىق ساۋال جولداعانىمىزعا جەتى ايدان اسىپتى. ارتىنشا پارلامەنت ماجىلىسىندەگى امانات پارتياسىنىڭ دەپۋتاتتىق فراكتسياسى دا TikTok-تىڭ جاستاردىڭ رۋحانياتى مەن پسيحيكالىق دەنساۋلىعىنا كەرى اسەرى بارىن العا تارتىپ، ۇكىمەت باسشىسىنان پلاتفورمانى شەكتەۋدى سۇراعان بولاتىن.

دەپۋتاتتاردىڭ تالابى بويىنشا ءتيىستى مينيسترلىكتەر ەل اۋماعىندا جۇمىس ىستەيتىن الەۋمەتتىك جەلىلەردىڭ زاڭناماعا ساي جۇمىس جاساۋىنا تالداۋ جۇرگىزىپ، قولدانۋشىلاردىڭ قاۋىپسىزدىگىنە قاتىستى تالاپتاردى قاتاڭداتاتىنىن مالىمدەگەن بولاتىن. الايدا، بۇگىنگى تاڭدا TikTok پاراقشالارىنداعى كونتەنتتەردى قاراي وتىرىپ، پلاتفورماداعى سۇزگى تەتىكتەرىن ءالى دە جەتىلدىرۋىمىز قاجەتتىگىن پايىمدايسىڭ.

TikTok-تىڭ 80 پايىزعا دەيىنگى قولدانۋشىلارىنىڭ 13-24 جاس اراسىنداعى جاستار ەكەنىن ەسكەرىپ، ەلىمىزدىڭ بولاشاعىنا كەپىل ۇرپاقتى جات قۇندىلىقتار جەتەگىندە كەتۋىنە جول قويىپ وتىرعانىمىزدى ەرتەرەك ءتۇسىنىپ جەتسەك ءجون بولار ەدى.

وسى ورىندا TikTok الگوريتمدەرى «اقپاراتتىق كوپىرشىكتەردى» جاساي الاتىنىن ۇمىتپاعانىمىز ءجون. ويتكەنى، بۇل الگوريتم پايدالانۋشىلارعا اقپاراتتىڭ ارتۇرلىلىگىن شەكتەيتىن، ولاردىڭ كوزقاراستارى مەن قالاۋلارىن كۇشەيتەتىن مازمۇن عانا كورسەتەتىن قۇدىرەتكە يە. بۇل پىكىرلەردىڭ مانيپۋلياتسياسى مەن جالعان اقپاراتقا اكەلۋى مۇمكىن دەيدى ماماندار.

ولاي بولسا سوڭعى ۋاقىتتا ەلىمىزدە وقۋشىلار اراسىندا ءوز-وزىنە قول سالۋلارعا قاتىستى وكىنىشتى جاعدايلاردىڭ كوبەيۋى مەن TikTok الگوريتمى اراسىندا ءبىر بايلانىستىڭ بولۋىن جوققا شىعارا المايمىز.

ەۋروپانىڭ كوپ مەملەكەتتەرىندە TikTok جەلىسىنىڭ تۇتىنۋشىلار قاۋىپسىزدىگىن قامتاماسىز ەتۋدەگى كەپىلدىكتەرىنىڭ دەڭگەيىن انىقتاۋ بويىنشا تەكسەرىستەر جۇرگىزىلگەنى بەكەر ەمەس. تەكسەرۋ ناتيجەسىندە بالالاردى زياندى اقپاراتتان قورعاۋ تەتىكتەرىنىڭ ىستەمەيتىنى انىقتالىپ، ەۋرووداق تاراپىنان، اقش، ۇلىبريتانيا، نيدەرلاندى ەلدەرى تاراپىنان TikTok-قا قاتىستى ميلليونداعان دوللارلىق سومماداعى ايىپپۇلدار سالىندى.

تۇركىستانداعى قۇرىلتاي بارىسىنداعى سوزىندە مەملەكەت باسشىسى: «...قازىر جاس ۇرپاق الەۋمەتتىك جەلى ارقىلى تاربيە الىپ جاتىر. بالانى دۇرىس باعىتقا بۇرىپ، جول كورسەتىپ وتىرماساق، بۇل – وتە قاۋىپتى ءۇردىس. ...ءبىز جاستاردى جاھاندانۋدىڭ قاتەرلى ىقپالىنان بارىنشا ساقتاۋعا مىندەتتىمىز!» دەپ اتاپ وتكەن بولاتىن. وسىنى ەسكەرىپ، وسكەلەڭ ۇرپاقتىڭ تاعدىرىنا، مەملەكەت مۇددەسىنە تەرىس اسەرىن تيگىزەتىندىگىن ەسكەرە وتىرىپ، تەز ارادا بۇل ولقىلىقتاردى جويۋ جولدارىن شۇعىل قاراستىرۋىمىز قاجەت دەپ ەسەپتەيمىن.

الىشەر ساتىبالديەۆ

Abai.kz