ماڭعىستاۋدا تاعى ءبىر اسكەري قىزمەتكەر ءوز-وزىنە قول جۇمسادى. 28 قىركۇيەك كۇنى اقتاۋ گارنيزونىنداعى اسكەري بولىمدەردىڭ بىرىندە كەلىسىمشارت بويىنشا قىزمەت ەتەتىن، 1985 جىلى تۋعان اسكەري قىزمەتشىنىڭ دەنەسى ءوزى تۇرىپ جاتقان پاتەرىنەن تابىلدى. اسكەري قىزمەتشى ءبىر جىلعا جۋىق ۋاقىت دەكرەتتىك دەمالىستا بولعان، - دەلىنگەن قورعانىس مينيسترلىگىنىڭ ءباسپاسوز قىزمەتى تاراتقان حابارلامادا.

الدىن-الا اقپارات بويىنشا اسكەري قىزمەتشىنىڭ وزىنە-ءوزى قول جۇمساۋىنا وتباسىلىق-تۇرمىستىق جانجال نەگىز بولعان. وقيعانىڭ سەبەپتەرى انىقتالۋدا. قازىرگى تاڭدا قىلمىستىق ءىس قوزعالدى.  اۋە قورعانىسى كۇشتەرىنىڭ قولباسشىلىعى اسكەري قىزمەتشىنىڭ تۋىستارى مەن جاقىندارىنا كوڭىل ايتادى.

ايدىڭ كۇننىڭ امانىندا اسكەري بورىشىن وتەۋگە بارعان ساربازدارىمىز كەبىن كيىپ جاتقانى بۇگىنگى قوعامنىڭ باستى تالقىسى بولىپ تۇر.

سوڭعى كۇندەرى مۇنداي وقيعالار جيىلەپ كەتتى. كۇنى كەشە ۇقك شەكارا اكادەمياسىندا 3-كۋرستا وقىعان كۋرسانت الماتى قالاسىنداعى كوپقاباتتى تۇرعىن ءۇي اۋلاسىنان ءولى تابىلدى.

ۇقك: «كۋرسانت كەزەكتى دەمالىسقا شىققان بولاتىن»، - دەدى. ۇلتتىق قاۋىپسىزدىك كوميتەتى كۋرسانت قازاسىنا بايلانىستى مالىمدەمە جاساپ: «كۋرسانت بيىكتەن قۇلاپ مەرت بولدى. پوليتسيا وسى وقيعا بويىنشا تەرگەۋ باستادى، وعان نە تۇرتكى بولعانىن انىقتاپ جاتىر»، - دەدى.

جاقىندا عانا ءماجىلىس دەپۋتاتى نارتاي ارالبايۇلى اسكەري بولىمدەردەگى سۋيتسيد ماسەلەسىن كوتەرگەن ەدى.

ول: «ماسەلەن، سوڭعى ءۇش جىلدا قازاقستاندا 270 اسكەري قىزمەتكەر قايتىس بولعان، ال سوڭعى ءتورت جىلدا اسكەردە 86 سۋيتسيد تىركەلگەن، 20 اسكەري ادام ءوز-وزىنە قول سالۋعا وقتالعان. بۇل – اسكەري پروكۋراتۋرا مالىمدەگەن رەسمي سان»، - دەدى دەپۋتات.

وسىدان ءۇش كۇن بۇرىن قورعانىس ءمينيسترى رۋسلان جاقسىلىقوۆ ساربازداردىڭ ءولىمى كوبەيگەنىن ايتىپ، ۇستەلدى ۇرىپ، گەنەرالداردى سوككەن ەدى.

«ءبىز كىمگە اينالىپ بارامىز؟ قوعام بىزدەن نەنى تالاپ ەتىپ وتىر؟ ول - ەڭ بىرىنشىدەن، جاس جىگىتتەردىڭ اماندىعى»، - دەدى مينيستر اشۋعا ءمىنىپ.

ۇستەلدى الاقانىمەن ءدۇرس ەتكىزىپ، جيىنعا جينالعاندارعا ۇرىسقان جاقسىلىقوۆ: «كومانديرلەر قولاستىنداعىلارعا قامقور بولىپ، ساربازداردى ۇيلەرىنەن ءتىرى قايتارۋعا مىندەتتى»، - دەدى.

ول اۋە قورعانىسى كۇشتەرى باس قولباسشىسىنىڭ ورىنباسارى پولكوۆنيك تالعات سىزدىقوۆقا ەسكەرتۋ جاساپ، اۋە شابۋىلىنا قارسى قورعانىس اسكەرلەرىنىڭ قولباسشىسى گەنەرال-مايور نۇرتاس قاباقوۆتى لاۋازىمىنان الۋ تۋرالى ءوتىنىش بەرەتىنىن ايتتى.

ەلىمىزدە 2020 جىلدان بەرى اسكەردە قازا تاپقان ساربازداردىڭ سانى 310 ادامعا جەتكەن.

Abai.kz