پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ قازاقستانداعى حالىقارالىق ۆاليۋتا قورى ميسسياسىنىڭ باسشىسى نيكوليا بلانشەمەن كەزدەستى.

كەزدەسۋدە تاراپتار اعىمداعى ەكونوميكالىق جاعدايدى، ۇكىمەتتىڭ ەكونوميكانى ودان ءارى ساپالى ءوسىرۋ ماقساتىندا جۇرگىزىپ جاتقان رەفورمالارى مەن شارالارىن، سونداي-اق قوردىڭ ەكونوميكالىق ساياساتتى دامىتۋدىڭ باسىم باعىتتارى بويىنشا ۇسىنىمدارىن ءارى جاقىن جانە ورتا مەرزىمدى پەرسپەكتيۆاعا ارنالعان ىنتىماقتاستىق جوسپارلارىن تالقىلادى.

ۆيتسە-پرەمەر ەكونوميكانىڭ ۇزدىكسىز ءوسۋىن جانە بيىلعى 8 ايدىڭ قورىتىندىسى بويىنشا ونى 3,7%-عا دەيىن جەدەلدەتۋدى باسا ايتتى. بۇعان قوسا، پرەمەر-ءمينيستردىڭ ورىنباسارى ۇكىمەتتىڭ بيۋدجەتتىك ساياساتتىڭ تيىمدىلىگىن ارتتىرۋ، سالىق زاڭناماسىن جەتىلدىرۋ، ينۆەستيتسيالىق تارتىمدىلىقتى كۇشەيتۋ جانە كاسىپكەرلىكتى دامىتۋ جونىندەگى جۇمىسىنا دا توقتالدى.

Abai.kz