قازاقستان پرەزيدەنتىنىڭ مەملەكەتتىك كەڭەسشىسى ەرلان قارين الەۋمەتتىك جەلىدەگى پاراقشاسىندا جاريالاعان ۆيدەودا ونوماستيكالىق ماسەلەلەردى رەتتەۋ قولعا الىنعانىن مالىمدەدى، دەپ حابارلايدى Qaz365.kz.

ەرلان قاريننىڭ سوزىنشە، ونوماستيكا ماسەلەسىن قازىر ورتالىقتاندىرىلىپ جاتىر.

«سەبەبى جۇيەلىلىك جوق. ءبىز كوپ نارسەنى وڭىرلەرگە ءوز دەڭگەيىندە قابىلداسىن دەپ بەرىپ قويدىق. ول ءبىر جاعىنان دۇرىس، بىراق يدەولوگيا سالاسىنا كەلگەندە كەيبىر وڭىرلەردە جۇمىستى جۇيەلەندىرۋ كەرەك»، - دەيدى مەملەكەتتىك كەڭەسشى.

ەرلان قارين تاياۋدا زەرتتەۋ جۇرگىزىلىپ، 1991 جىلعا دەيىن جانە ودان بەرى نەشە ەسكەرتكىش ورناتىلعانى سانالعانىن ايتتى. سوزىنشە، 1991 جىلعا دەيىن سوۆەت ۇكىمەتىنىڭ 70 جىلدىق بيلىگى كەزىندە ەلدە 331 ەسكەرتكىش سالىنعان. 1991 جىلدان بەرى 1200 ەسكەرتكىش قويىلعان.

«ءبىز 30 جىلدا كەڭەس بيلىگىنىڭ 70 جىلدا اتقارماعان جۇمىسىن ءۇش ەسە اتقارىپ شىقتىق. كەڭەس بيلىگى كەزىندە ەسكەرتكىش ورناتۋعا قۇمار بولعانىن مەنسىز دە جاقسى بىلەسىزدەر. اۋىل-اۋىلدا ورناتتى. ال ءبىز ءۇش ەسە ارتىق ەسكەرتكىش سالعانبىز. ارا-قاتىناس قانداي؟ كوپ جەردە بەلگىلى ءبىر بەلسەندى ازاماتتاردىڭ ىعىنا جىعىلادى دا، قالاعان ادامدارىنا ورناتا بەرەدى. ولاردىڭ پايداسىنا شەشكەننەن كەيىن باسقا ازاماتتار «ءبىزدىڭ اتالارىمىز ەسكەرۋسىز قالدى» دەپ شىعادى. سودان كەيىن ارينە، ارى قاراي توقتاۋسىز كەتە بەرەدى. مۇنىڭ شەگى بولمايدى. ويتكەنى ءبارىن قامتۋ مۇمكىن ەمەس. ءبىر جەردە بەس مەترلىك ەسكەرتكىش بوي كوتەرسە، ەكىنشى جەردە 8 مەتر قىلىپ جارىسادى. ەسكەرتكىشتەردىڭ بيىكتىگىمەن جارىسار بولساق، جەتكەن جەرىمىز وسى!؟ ءبىز نە ماقساتتى كوزدەپ وتىرمىز؟ بابالاردىڭ وسيەتىن كەيىنگى ۇرپاققا ۇلگى ەتۋ ءۇشىن بە، الدە ماقتان ەتۋ ءۇشىن بە؟» - دەيدى ول.

ەرلان قاريننىڭ ايتۋىنشا، قازىر جۇمىس جۇيەلەنىپپ، مۇنداي ماسەلەلەردىڭ يدەولوگيالىق، مازمۇندىق، ەستەتيكالىق جاعىن ەسكەرىلىپ جاتىر.

Abai.kz