الماتىداعى سپورت جانە تۋريزم اكادەمياسىنىڭ تورىندە «Halyk» قايىرىمدىلىق قورىنىڭ قولداۋىمەن اۋىل سپورتىن دامىتۋعا ارنالعان AUYLSPORT جوباسىنىڭ تانىستىرىلىمى ءوتتى. ءىس -شاراعا سپورت مايتالماندارى مەن جوبانىڭ نەگىزىن قالاۋشىلار، تانىمال جاتتىقتىرۋشىلار، باق وكىلدەرى مەن ستۋدەنتتەر قاتىستى.

جيىندا اUYLSPORT جوباسىنىڭ اۋىلدىق ايماقتارداعى بۇقارالىق سپورتتى دامىتۋداعى ءرولى مەن ماڭىزى، الداعى جوسپارلار جانە وڭىرلەردە وتەتىن سپورتتىق ءىس-شارالار تۋرالى ايتىلدى. جوبانى «Halyk» قايىرىمدىلىق قورىنىڭ الماتى وبلىسى بويىنشا فيليالىنىڭ ديرەكتورى  عالىمبەك جاقسىلىقوۆ  تانىستىرادى.

«AUYLSPORT جوباسىنىڭ نەگىزگى ماقساتى - اۋىل بالالارى مەن جاسوسپىرىمدەرىن سپورتقا تارتۋ، سپورتتى ناسيحاتتاۋ جانە بۇقارالىق سپورتتى دامىتۋ.اۋىلداعى جاتتىقتىرۋشىلاردىڭ بىلىكتىلىگىن ارتتىرۋ جانە جاڭا داعدىلاردى ۇيرەتۋ.

جوبا اياسىندا  بوكس، كۇرەس، كاراتە، باسكەتبول، ۆولەيبول، شاحماتتى  قامتۋ كوزدەلۋدە. جوباعا اۋىلدىق جەرلەردە بۇقارالىق سپورت تۇرلەرىمەن شۇعىلدانىپ جۇرگەن 8-14 جاس ارالىعىنداعى 12 000-عا جۋىق بالالار مەن جاسوسپىرىمدەردى قامتۋ جوسپارلانۋدا»،- دەدى عالىمبەك جاقسىلىقوۆ

AUYLSPORT جوباسىنىڭ اۋىل جاستارى ءۇشىن زور مۇمكىندىك ەكەنىن ايتقان قاتىسۋشىلار سپورتتى دامىتۋعا قاتىستى ۇسىنىس-پىكىرلەرىن، لەبىزدەرىن جەتكىزدى.

جيىندا ءسوز العان وليمپيادا جۇلدەگەرى ەرماحان يبرايموۆ مىقتى سپورتشىلاردىڭ كوبىسى اۋىلدان شىعاتىنىن ايتتى.

ول: «وزدەرىڭىز بىلەسىزدەر سپورتتاعى كىل مىقتىلاردىڭ بارلىعى اۋىلدان شىققاندار. سوندىقتان اۋىل سپورتىن دامىتۋعا ارنالعان جوبانى قولدايمىن. بۇل سپورتشى بولعىسى كەلەتىن اۋىلدىڭ قارادومالاق بالالارىنا ۇلكەن قولداۋ. بولاشاققا جولداما دەر ەدىم ».-دەدى.

جيىن سوڭىندا  قازاق سپورت جانە تۋريزم اكادەمياسى مەن «Halyk» قايىرىمدىلىق قورى ىنتىماقتاستىق تۋرالى مەموراندۋمعا قول قويدى. بۇل مەموراندۋم اۋىلدىق جەرلەردە سپورتتى دامىتۋعا باعىتتالعان بىرلەسكەن جوبالاردى جۇزەگە اسىرۋدىڭ جاڭا كەزەڭىن باستايدى.

Abai.kz