رەداكتسيادان:  رەداكتسيامىزعا تۇراقتى اۆتورىمىز اۋىت مۇقيبەكتەن كەلگەن تۇركىستان وبلىسىنداعى قانداس كاسىپكەرلەردىڭ جانايقايىن پورتال وقىرماندارىنىڭ تالقىسىنا ۇسىنىپ وتىرمىز.

Abai.kz ەركىن اقپارات الاڭى. مۇندا وي جارىستىرىپ، پىكىر تالاستىرۋعا قازاقستاننىڭ ءاربىر ازاماتى قۇقىلى. ماقالا اۆتورىنىڭ پىكىرى رەداكتسيا ۇستانىمىن بىلدىرمەيدى جانە ماقالادا اتى اتالعان جەكەلەگەن تۇلعالار جاۋاپ بەرەمىن دەسە، پورتال بەتىندە جاريالايتىن بولامىز!

تۇركىستان وبلىسىنىڭ اكىمى
دارحان ساتىبالدى مىرزاعا!

قۇرمەتتى دارحان امانگەلدىۇلى!

بيىل كوكتەمدە «Zhibek Zholy show technica» جشس جانە يپ «JAC MEDIA», يپ «ەرحان», يپ «كۋلپاش نۇرمۇقان» سىندى ءتورت زاڭدى تۇلعا تۇركىستان قالاسى مادەنيەت ءۇيىنىڭ جاريالاعان تەندەردى ۇتىپ الىپ، تاپسىرىستى ءوز ۋاعىندا ورىنداعان.

بىراق، مادەنيەت ءۇيى سول ەربوسىن نۇرمۇحانۇلى باستاعان ءتورت كاسىپكەردىڭ قوماقتى اقشاسىن التى ايدان بەرى بەرمەي، سەرگەلدەڭگە سالعان.

بيىلعى 16 قىركۇيەكتە ءدال وسى «قانداسىڭنىڭ حاقىسىن جەمە، تۇركىستان!» دەگەن تاقىرىپپەن ءسىزدىڭ اتىڭىزعا ارنايى حات (جت-2024-05328634) جازىپ، وسى ماسەلەگە بايلانىستى، سىزدەن كومەك سۇراپ ەدىك.

وكىنىشكە وراي، ول حات سىزگە جەتكەن جوق!

ورىنباسارىڭىز بەن كاسىپكەرلىك جانە ونەركاسىپ باسقارماسىنىڭ باسشىسى ول حاتىمىزدى ارى-بەرى لاقتىردى دا، سوڭىندا تۇركىستان قالاسى اكىمىنىڭ ورىنباسارى M.قىرىقباەۆ ءبىر بەت جاۋاپ بەرە سالدى.

اتالعان جاۋاپتا تۇركىستان قالاسى اكىمىنىڭ ورىنباسارى M.قىرىقباەۆ: «تۇركىستان وبلىسى مەملەكەتتىك ساتىپ الۋ باسقارماسىنىڭ باسشىسى ن.امانكۋلوۆتىڭ 2024 جىلعى 5 شىلدەدەگى №361477 حاتىنا سايكەس، باسقارما تاراپىنان وبلىس كولەمىندە وتكىزىلىپ جاتقان مەملەكەتتىك ساتىپ الۋلارعا تالداۋ جۇمىستارى جۇرگىزىلگەن بولاتىن. تالداۋ جۇرگىزۋ بارىسىندا تۇركىستان قالالىق مادەنيەت ءۇيى مكقك تاراپىنان مەملەكەتتىك ساتىپ الۋدى جۇزەگە اسىرۋدىڭ ءبىر كوزدەن تىكەلەي ساتىپ الۋ ءتاسىلىن نەگىزسىز قولدانىپ بىرنەشە كەلىسىمشارت تۇزىلگەندىگى انىقتالعان. وسىعان وراي، تۇركىستان قالالىق مادەنيەت ءۇيى مكقك-نىڭ مەملەكەتتىك ساتىپ الۋ پورتالىنداعى جاسالعان كەلىسىمشارتتاردىڭ قارجىسىن تولەۋ ۋاقىتشا توقتاتىلىپ تۇرعانىن حابارلايمىز»، - دەپتى.

نەگە ەكەنى بەلگىسىز، تۇركىستان قالاسى اكىمىنىڭ ورىنباسارى M.قىرىقباەۆ مىرزا ءوزىنىڭ بۇل جاۋابىندا «وبلىس كولەمىندە وتكىزىلىپ جاتقان مەملەكەتتىك ساتىپ الۋلارعا تالداۋ جۇمىستارىن» قانداي قۇزىرلى ورگاننىڭ جۇرگىزگەنىن جانە سول «مەملەكەتتىك ساتىپ الۋ پورتالىنداعى جاسالعان كەلىسىمشارتتاردىڭ قارجىسىن تولەۋدى ۋاقىتشا توقتاتا تۇرۋ» تۋرالى قايسى قۇزىرلى ورگاننىڭ قانداي شەشىم شىعارعانىن مۇلدە ايتپاپتى. بۇل – ءبىر.

ەكىنشىدەن، مەنىڭ ءبىرىنشى حاتىم سىزگە جولدانعان سوڭ، تۇركىستان قالاسى مادەنيەت ءبولىمىنىڭ باسشىسى قادىربولات مۇساعاليەۆ ماعان تەلەفون شالىپ، وسى كەلىسىمشارتتى بۇزىپ، كاسىپكەرلەردىڭ اقشاسىن باسقا كەلىسىمشارت جاساۋ ارقىلى اۋدارىپ بەرسەم دەپ ءوتىندى.

قادىربولات مۇساعاليەۆتىڭ بۇل سوزىنە مەن تاڭ قالدىم جانە وعان «تۇركىستان وبلىسىندا تەندەر وتكىزۋ – قۇدالىق وتكىزۋ، تەندەردىڭ اقشاسى قۇداعا بەرەتىن قىزدىڭ قالىڭمالى ەمەس شىعار...», - دەپ، ازىلدەپ كۇلدىم. ونىڭ بۇل ۇسىنىسىنان باس تارتتىم.

سول سويلەسۋدە قادىربولات مۇساعاليەۆ مەنىڭ ارنايى سۇراعىما جاۋاپ بەرىپ، «مەملەكەتتىك ساتىپ الۋ پورتالىنداعى جاسالعان كەلىسىمشارتتاردىڭ قارجىسىن تولەۋدى ۋاقىتشا توقتاتا تۇرۋ» تۋرالى ەشبىر قۇزىرلى ورگاننىڭ شىعارعان شەشىمىنىڭ جوق ەكەنىن ايتتى...

ۇشىنشىدەن، كاسىپكەرلەردىڭ قولىندا وسىعان دەيىن بەرىلگەن تۇركىستان قالالىق مادەنيەت ءۇيى باسشىلارىنىڭ «...جەتكىزىلگەن تاۋارلاردىڭ قارجاىسىن 30 كۇنتىزبەلىك كۇن ىشىندە تولەپ بەرۋگە كەپىلدىك بەرىلگەندىگىن جازىپ حابارلايمىن.»-دەگەن ەكى بىردەي «كەپىلدەمە حات» تۇر.

ەگەر، «مادەنيەت ءۇيى مكقك مەملەكەتتىك ساتىپ الۋدى جۇزەگە اسىرۋدىڭ ءبىر كوزدەن تىكەلەي ساتىپ الۋ ءتاسىلىن نەگىزسىز قولدانعان» بولسا، وندا وسىعان دەيىن تۇركىستان قالالىق مادەنيەت ءۇيى باسشىلارى نە ءۇشىن ءبىر ەمەس، ەكى مارتە «كەپىلدەمە حات» بەرگەن؟!

ونىڭ ۇستىنە، بۇل – از اقشا ەمەس، ءتورت كاسىپكەردىڭ ەكى ءجۇز ميلليونعا جۋىق تەڭگەسى ەكەن.

تۇركىستان قالالىق مادەنيەت ءۇيى مكقك مەملەكەتتىك ساتىپ الۋ جۇمىسىن بۇگىن عانا جۇرگىزىپ وتىرعان جوق.

جۇرت جاقسى بىلەدى، شەتتەن ورالعان ءبىز سەكىلدى اڭقاۋ, مونمىن ەمەس، تۇركىستان مەن شىمكەنتتىڭ جىگىتتەرى – شەتىنەن «تاشكەن كورگەندەر» ەمەس پە!

ولاردىڭ سول كەزدە وسى ءبىر كوزدەن تىكەلەي ساتىپ الۋ تاسىلىمەن وتكەن تەندەردەن حابارى جوق بولۋى مۇمكىن بە؟!

ولار «...تىكەلەي ساتىپ الۋ ءتاسىلىن نەگىزسىز قولداندى» دەگەنگە كىم سەنەدى?!

اكىمدىك باسشىلارىنىڭ م.قىرىقباەۆ ايتقان «مەملەكەتتىك ساتىپ الۋ پورتالىنداعى جاسالعان كەلىسىمشارتتاردىڭ قارجىسىن تولەۋدى ۋاقىتشا توقتاتا تۇرۋ» تۋرالى تىكەلەي قۇزىرەتى بار ما؟!

بولسا، ول قاي زاڭنىڭ نەشىنشى بابىندا جازىلعان؟!.

سۇراق كوپ!

«ليزا شامەت قادىربولات مۇساعاليەۆكە سىلتەيدى. قادىربولات مۇساعاليەۆ: «جوعارىدان تاپسىرما بار، قازىرشە بەرمەي تۇرىڭدار دەگەن، كۇتە تۇر، جازام دەسەڭ جاز، ايتام دەسەڭ ايت!»,- دەپ شالقايادى...»,- دەپ، كاسىپكەرلەر زار جىلاپ وتىر.

ولار ەندى بارلىق جۇمىسشىلارىن الىپ بارىپ، «قانداسىڭنىڭ حاقىسىن جەمە، تۇركىستان!» دەگەن كەرمە تۋدى كوتەرىپ، تۇركىستان وبلىسى اكىمدىگىنىڭ الدىندا ايعايلاپ تۇرماقشى.

مەن ەلدەن، سىزدەن ۇيات بولادى دەپ، ولاردى جىبەرمەي وتىرمىن...

قۇرمەتتى دارحان امانگەلدىۇلى!

تۇركىستان قالاسى اكىمىنىڭ ورىنباسارى M.قىرىقباەۆ پەن تۇركىستان قالالىق مادەنيەت ءبولىمىنىڭ باسشى قادىربولات مۇساعاليەۆ ءتورت كاسىپكەردىڭ شەتتەن كەلگەن قازاقتار ەكەنىن بىلگەن سوڭ، ادەيى وسىنداي كەلەڭسىز ارەكەتتەر جاساپ، ولاردان بىردەمە دامەتىپ وتىرعان جوق پا ءوزى؟!!

پرەزيدەنتىمىز قاسىم-جومارت توقاەۆتىڭ 2019 جىلعى جولداۋىندا ايتقان: «بۇل ماسەلە جونىندەگى ۇستانىمىم  بەلگىلى: بيزنەستىڭ، اسىرەسە شاعىن جانە ورتا بيزنەستىڭ دامۋىنا كەدەرگى كەلتىرەتىن ارەكەتتەر مەملەكەتكە قارسى قىلمىس دەپ تانىلۋى ءتيىس.» دەگەن ءسوزىن ەسكە الساق، ەشبىر قۇزىرلى ورگاننىڭ شەشىمىنسىز، ءسىزدىڭ جىگىتتەرىڭىزدىڭ قانداس كاسىپكەرلەردى قان قاقساتىپ، اقشاسىن بەرمەي وتىرۋى – مەملەكەتكە قارسى قىلمىس ەمەس پە!؟!

قۇرمەتتى دارحان امانگەلدىۇلى!

سىزدەن جىگىتتەرىڭىزدى جونگە سالۋىڭىزدى وتىنەمىن.

سونداي-اق، وسى ماسەلەنى ءوز نازارىڭىزعا الىپ، اتالعان ءتورت كاسىپكەردىڭ قوماقتى اقشاسىن تەزدەتىپ ءوندىرىپ بەرۋگە ىقپال ەتۋىڭىزدى سۇرايمىن.

ەسكەرتۋ: ەكى پاراق قوسا تىركەلدى، سونداي-اق بۇل حات باق-تا جاريالاندى...

قۇرمەتپەن،

اۋىت مۇقيبەك،

«ەرەن ەڭبەگى ءۇشىن» مەدالىنىڭ،
«قۇرمەت» وردەنىنىڭ يەگەرى

Abai.kz