سۋ ۇنەمدەۋ تەحنولوگيالارىن ەنگىزۋدىڭ ناتيجەسىندە ارال تەڭىزىنە 200 ملن تەكشە مەتر سۋ جىبەرىلدى. بۇل تۋرالى بۇگىن، 21 قازاندا سۋ رەسۋرستارى جانە يرريگاتسيا مينيسترلىگى ايتتى.

«قىزىلوردا وبلىسىنىڭ شارۋالارى سۋ ۇنەمدەۋ تەحنولوگيالارىن ەنگىزۋدىڭ ناتيجەسىندە 200 ملن تەكشە مەترگە جۋىق سۋ ۇنەمدەدى. بۇل سۋ ارال تەڭىزىنە جىبەرىلدى. ايتا كەتەيىك، بيىل ءوڭىردىڭ ديقاندارى 55 مىڭ گەكتار كۇرىش القابىندا سۋ ۇنەمدەۋ تەحنولوگيالارىن قولداندى. ال قىزىلوردا وبلىسىنداعى كۇرىش القاپتارىنىڭ جالپى اۋدانى —84 مىڭ گەكتار»،—دەدى مينيسترلىكتىڭ ءباسپاسوز قىزمەتى.

ايتا كەتەيىك، 2024 جىلعى سۋارۋ ماۋسىمىندا تەڭىزگە شامامەن 1 ملرد تەكشە مەتر سۋ جىبەرىلدى، بۇل وتكەن جىلمەن سالىستىرعاندا 3 ەسە كوپ.

جىل باسىنان بەرى سولتۇستىك ارالعا شامامەن 2 ملرد تەكشە مەتر سۋ جىبەرىلدى. بۇگىنگى تاڭدا تەڭىزدەگى سۋدىڭ جالپى كولەمى 22 ميلليارد تەكشە مەترگە جەتتى.

Abai.kz