2025 جىلدىڭ 26 قاڭتارىندا بەلارۋستە كەزەكتى پرەزيدەنتتىك سايلاۋ وتەتىنى كەشە بەلگىلى بولدى. بەلارۋستىڭ قۇزىرلى بيلىگى پرەزيدەنتتىك سايلاۋ وتەتىن كۇندى بەلگىلەپ، حابارلادى.

وسىعان دەيىن بەلارۋس باسشىسى الەكساندر لۋكاشەنكو: «مەن كەتكەن سوڭ ەلدى كىم تىزگىندەيدى؟ لايىقتى ادام كورىپ وتىرعان جوقپىن»، - دەگەن ەدى. ال كەشە رەسەي جەرىندە ءجۇرىپ، رەسەيلىك باق-قا سۇحبات بەرگەن لۋكاشەنكو الداعى سايلاۋعا قاتىساتىنىن قاداپ ايتتى!

«2025 جىلى بىزدە پرەزيدەنتتىك سايلاۋ وتەدى. مەن قاتىسامىن! سايلاۋ ءادىل وتەدى! بىزدە بارلىق سايلاۋ ءادىل وتكەن»، - دەدى الەكساندر لۋكاشەنكو. ول بەلارۋستى 1994 جىلدان بەرى باسقارىپ كەلەدى.

ايتپاقشى، تاتارستاننىڭ قازانىندا ءوتىپ جاتقان بريكس باسقوسۋىنا بارعان بەلارۋس باسشىسى ەكى كەزەك سۇحبات بەردى. ءبىرىنشىسىن رەسەي پروپوگانداشىسى ولگا سكابەەۆاعا بەرىپ، بەلارۋس-رەسەي قاتىناستارى، پرەزيدەنتتىك سايلاۋ ت.ب. تاقىرىپتاردى قامتىسا، ەكىنشى سۇحباتىن «ۆۆس» ءتىلشىسى ستيۆەن روزەنبەرگكە بەرىپ، رەسەي-ۋكراينا سوعىسى، يادرولىق قارۋ تاقىرىپتارىن قامتىعان.

سونىمەن، لۋكاشەنكو نە دەيدى؟ رەت-رەتىمەن جازايىق:

لۋكاشەنكونىڭ قوس سۇحباتتا ايتقاندارىنىڭ قىسقشا تەزيستەرى:

يادرولىق قارۋدى قولدانۋ مۇمكىندىگى تۋرالى: «رەسەي پرەزيدەنتى ۆلاديمير پۋتين بەلارۋس پرەزيدەنتىنىڭ كەلىسىمىنسىز بەلارۋس اۋماعىندا ورنالاسقان قارۋدى ەشقاشان قولدانبايدى»، - دەدى لۋكاشەنكو.

رەسەيگە كومەككە كەلگەن سولتۇستىك كورەي اسكەرى تۋرالى: «مينسك ۋكرايناداعى ۇرىس قيمىلدارى ايماعىندا كحدر اسكەرلەرى جىبەرىلدى دەگەنگە دالەل تاپقان جوق. ءبىز مايداندا نە بولىپ جاتقانىن بىلەمىز. ءبىز وندا كورەيلەردى كورگەن جوقپىز. بار بولسا، ولار  تىم جاقسى جاسىرىنىپ ۇلگەرگەن ەكەن وندا»، - دەيدى بەلارۋس باسشىسى.

لۋكاشەنكو: «پۋتين ەشقاشان قانداي دا ءبىر ەلدىڭ قارۋلى كۇشتەرىن سوعىسقا، ۋكرايناداعى قاقتىعىسقا ارالاستىرمايدى! ءتىپتى، ءبىزدى دە!»، - دەيدى.

زەلەنسكيدىڭ «جەڭىس جوسپارى» تۋرالى: «زەلەنسكيدە ەشقانداي جوسپار جوق. جوسپار دەگەنىمىز – قۇر اڭگىمە. رەسەي - يمپەريا. ونى ەشكىم دە زەلەنسكيدىڭ ۇرانىمەن كەلىسسوزدەر ۇستەلىنە وتىرۋعا يتەرىپ، ماجبۇرلەي المايدى. مەن بۇل تۋرالى وعان سوعىستىڭ باسىندا مىڭ رەت ايتقان بولاتىنمىن»، - دەيدى لۋكاشەنكو.

ءپۋتيننىڭ رەسەي-ۋكراينا سوعىسىنا قاتىستى كوزقاراسى تۋرالى: «بۇل قاقتىعىستا ءار ءتۇرلى جاعدايلار بولادى، بىرەۋلەر كەلەدى، بىرەۋلەر قورعايدى. ءبىر جاق تا، ەكىنشى جاق تا ۇلكەن شىعىنعا ۇشىرايدى. پۋتين بۇعان وكىنىپ وتىر ما الدە جوق پا؟ ارينە، وكىنەدى، ول ءتىرى ادام عوي. بىراق بۇعان تولىق سەنىمدىمىن جانە وعان سەنىمدى بولىڭىزدار: پۋتين وزىنىكىن دۇرىس دەپ سانايدى جانە ول بۇعان يمانداي سەنەدى»، - دەدى بەلارۋس باسشىسى.

كەلىسسوزدەر جانە سوعىستى اياقتاۋ تۋرالى: «پۋتين باتىسقا كەلىسىمگە كەلۋدى ۇسىندى، بىراق باتىستىق ساياساتكەرلەر بۇل ۇسىنىستى ەلەمەدى»، - دەدى لۋكاشەنكو.

«سوعىس جاقىن ارادا اياقتالا ما؟ جاقىن ارادا نەمەسە جاقىن ارادا ەمەس دەگەن - بۇل ۋاقىت ەمەس قوي. بيىل ما؟ جوق! بيىل اياقتالمايدى»، - دەدى الەكساندر لۋكاشەنكو.

«زەلەنسكي سوعىستى 2025 جىلى اياقتاۋ جايلى ايتادى. بۇل كۇلكىلى. بىتىمگەرشىلىك ورناتا وتىرىپ، رەسەي ءۇشىن كەپىلدىكتەر بەرىلۋى قاجەت. باتىس ۋكرايناعا وق-دارىلەردى جەتكىزۋدى جانە ۋكراينانىڭ قارۋلى كۇشتەرىن قايتا قارۋلاندىرۋدى توقتاتۋى قاجەت. مىنە، پۋتين تاپ وسىدان قاۋىپتەنەدى»، - دەيدى بەلارۋس باسشىسى.

بەلارۋستىڭ «سوعىسقا تىكەلەي ارالاسقانى» تۋرالى: «بىزدە بىرنەشە مىڭ رەسەيلىك اسكەر قاتىسقان وقۋ-جاتتىعۋلار بولدى. بۇل اسكەرلەر نەگىزىنەن شىعىس ايماقتان كەلگەن جانە پۋتين بۇل اسكەرلەردى بەلارۋستان شىعارا باستادى»، - دەدى لۋكاشەنكو.

مينسكىنىڭ ماسكەۋمەن، كيەۆپەن قارىم-قاتىناسى تۋرالى: «رەسەي - ءبىزدىڭ وداقتاسىمىز. ءبىزدىڭ قارىم-قاتىناسىمىز اعىلشىندار مەن امەريكاندىقتارعا قاراعاندا تىعىز.

ۋكراينا بەلارۋسقا قارسى كۇرەستى: ول انگلوساكستاردان بۇرىن بىزگە قارسى سانكتسيالار ەنگىزدى. ول ءبىزدىڭ ازاماتتىق ۇشاقتاردىڭ ۋكراينا اۋماعى ارقىلى ۇشۋىنا تىيىم سالدى. ولار ءبىزدىڭ مينەرالدى تىڭايتقىشتارى بار جىلجىمالى قۇرامدى باسىپ الدى. ولار ادامدارمەن بىرگە 75 اۋىر جۇك كولىگىن تۇتقىندادى. ولار ءوزدەرىن بانديتتەر سەكىلدى ۇستادى. سىزدەرشە وسىدان سوڭ مەن زەلەنسكيمەن قۇشاقتاسىپ ءجۇرۋىم كەرەك پە؟

رەسەي - ءبىزدىڭ وداقتاسىمىز. ءسىزدەر ۋكراينانى قولدايتىندارىڭىز سەكىلدى، ءبىز دە رەسەيدى قانشا قاجەت بولسا، سونشا قولدايمىز» - دەدى لۋكاشەنكو.

بەلارۋس پەن باتىس قاتىناستارى تۋرالى: «مەن ءاردايىم باتىسپەن قالىپتى قارىم-قاتىناستا بولعىم كەلەدى»، - دەپ مالىمدەدى لۋكاشەنكو.

Abai.kz