تسيفرلىق دامۋ ءمينيسترى جاسلان ماديەۆ ءوزىنىڭ سوزىندە يننوۆاتسيالىق ەكوجۇيەنى قۇرۋدى، ستارتاپ-جوبالاردى دامىتۋدى، تسيفرلىق ۇكىمەتتى (govtech) ەنگىزۋدى جانە اەروعارىش سالاسىنداعى جوبالاردى قوسا العاندا، تسيفرلاندىرۋ سالاسىنداعى ءوزارا ءىس-قيمىلدىڭ نەگىزگى ۆەكتورلارىن اتاپ ءوتتى.

قازاقستان Astana Hub حالىقارالىق تەحنوپاركىن دامىتۋ بويىنشا ءوز تاجىريبەسىن ۇسىندى، ول جۇمىس ىستەگەن جىلدارى 1500-دەن استام رەزيدەنتتى، ونىڭ ىشىندە 436 شەتەلدىك كومپانيانى تارتتى. سونداي-اق، جاھاندىق نارىقتاردا ورتالىق ەۋرازيادان ستارتاپتاردى قولداۋعا باعىتتالعان شەت ەلدەردە IT-حابتار قۇرۋدىڭ تابىستى تاجىريبەسى ۇسىنىلدى.

«موڭعوليا نارىعىنا 6 مىڭنان استام سكۋتەر ۇسىنعان قازاقستاندىق Jet ەلەكتر سكۋتەرلەرىن جالعا بەرۋ ستارتاپى ءساتتى شىققانىن اتاپ وتۋگە بولادى. ال موڭعول ستارتاپتارى Astana Hub اكسەلەراتسيالىق باعدارلامالارىنا بەلسەندى قاتىسادى. مىسالى، Fibo Group ستارتاپى ءبىزدىڭ تەحنوپاركتە Google for Startups اكسەلەراتسيالىق باعدارلاماسىنان ءساتتى ءوتتى. باعدارلاماعا قاتىسۋ ستارتاپتارعا حالىقارالىق تاجىريبەگە جانە جەتەكشى ساراپشىلاردىڭ قولداۋىنا قول جەتكىزۋگە مۇمكىندىك بەرەدى، بۇل ولاردىڭ ودان ءارى دامۋى مەن جاھاندىق نارىقتارعا شىعۋى ءۇشىن ماڭىزدى قادام بولىپ تابىلادى»، — دەلىنگەن حابارلامادا.

ىنتىماقتاستىقتىڭ ماڭىزدى ەلەمەنتى eGov قازاقستاندىق ەلەكتروندىق ۇكىمەت جۇيەسىنىڭ ەكسپورتىن تالقىلاۋ بولدى. بۇل جوبا موڭعولياعا قازاقستاننىڭ مەملەكەتتىك قىزمەتتەردى تسيفرلاندىرۋداعى جەتىستىكتەرىن پايدالانۋعا مۇمكىندىك بەرەدى، وندا قىزمەتتەردىڭ 90%-دان استامى ونلاين رەجيمىندە ۇسىنىلادى.

ىسكەرلىك كەڭەستىڭ ءبىرىنشى وتىرىسى تۇراقتى دامۋعا جانە قازىرگى زامانعى سىن-قاتەرلەردى بىرلەسىپ ەڭسەرۋگە باعىتتالعان ستراتەگيالىق ارىپتەستىكتىڭ بەرىك نەگىزىن قالادى.

Abai.kz