پرەزيدەنت توقاەۆ قاراعاندى وبلىسىنىڭ اكىمى ەرماعانبەت بولەكباەۆقا سوگىس بەردى. بۇل تۋرالى پرەزيدەنتتىڭ كەڭەسشىسى - ءباسپاسوز حاتشىسى بەرىك ءۋالي مالىمدەدى.

«مەملەكەت باسشىسى قاسىم-جومارت توقاەۆ جىلىتۋ ماۋسىمىنا دايىندىق جۇمىستارىنا تيىسىنشە باقىلاۋ جاساماعانى ءۇشىن قاراعاندى وبلىسىنىڭ اكىمى ەرماعانبەت بولەكباەۆقا سوگىس بەردى»، - دەپ جازدى ول الەۋمەتتىك جەلىدەگى پاراقشاسىندا.

ەسكە سالايىق، بۇعان دەيىن قاراعاندى وبلىسىنداعى ساران قالاسىنىڭ اكىمى ەركىن باۋلىقوۆ جىلىتۋ ماۋسىمىنىڭ ۋاقىتىلى باستالماۋىنا بايلانىستى قىزمەتىنەن بوساتىلعان بولاتىن. قالا اكىمىنىڭ مىندەتىن اتقارۋشى بولىپ ماقسات قايرەشوۆ تاعايىندالدى.

وسىعان دەيىن مەملەكەت باسشىسى كىمدەرگە سوگىس جاريالادى؟ ولاردىڭ قىزمەتتىڭ جولى قالاي ءوربىدى؟ ءبىز بۇگىن وسى تاقىرىپتا ىقشامدى شولۋ جاساعاندى ءجون سانادىق...

پرەزيدەنت ارىستاعى جاعدايعا بايلانىستى 2019 جىلى سول كەزدەگى قر قورعانىس ءمينيسترى نۇرلان ەرمەكباەۆقا سوگىس جاريالاعان ەدى.

«ءبىز جۇيەدەگى جالعاسىپ كەلە جاتقان كەمشىلىكتەردىڭ سالدارىمەن كۇرەسىپ جۇرگەندە اسكەري سالانى باقىلاۋدى السىرەتىپ الدىق. ءسىز قازاقستان قورعانىس مينيسترلىگى سالاسىنداعى سالىستىرمالى تۇردە جاڭا ادامسىز، بىراق بارلىق جاعدايعا جاۋاپتىسىز. مەن قارۋلى كۇشتەردىڭ ەڭ جوعارى باس قولباسشى رەتىندە قورعانىس مينيسترلىگىندەگى ىستەردىڭ جاي-كۇيىنە قاناعاتتانباعانىمدى بىلدىرەمىن. سوندىقتان سىزگە قاتاڭ سوگىس جاريالايمىن»، – دەدى قاسىم-جومارت توقاەۆ.

نۇرلان ەرمەكباەۆ 2021 جىلى قر قورعانىس ءمينيسترى قىزمەتىنەن الىنعان. ونىڭ وتستاۆكاعا كەتۋىنە جامبىل وبلىسىنداعى اسكەري قويمادا بولعان جارىلىس سەبەپ بولدى.

ەرمەكباەۆ 2023 جىلدىڭ قاڭتارىندا شانحاي ىنتىماقتاستىق ۇيىمى باس حاتشىسىنىڭ ورىنباسارى بولىپ تاعايىندالعان.

وسىدان 2 جىل بۇرىن 14 شىلدە 2022 جىلى پرەزيدەنت قاسىم-جومارت توقاەۆ پرەمەر-ءمينيستردىڭ ورىنباسارى – قر ساۋدا جانە ينتەگراتسيا ءمينيسترى باقىت سۇلتانوۆقا جانە قر اۋىل شارۋاشىلىعى ءمينيسترى ەربول قاراشوكەەۆكە سوگىس جاريالادى.

بۇل تۋراسىندا: «7 قانت زاۋىتىنىڭ بۇگىندە 4-ەۋى عانا جۇمىس ىستەيدى. الماتى جانە جامبىل وبلىستارىندا تەك ۇشتەن ءبىر بولىگى جۇكتەلگەن - 31 پايىزى. اۋىل شارۋاشىلىعى مينيسترلىگى قىزىلشا قانتىنىڭ ۇلەسىن 2026 جىلعا قاراي 6 ەسەگە، 7-دەن 43 پايىزعا دەيىن ارتتىرۋدى جوسپارلاپ وتىر»، - دەدى توقاەۆ.

پرەزيدەنت: «كەيىنگى ءتورت جىلدا قانت قىزىلشاسىنىڭ اۋماعى ۇشتەن بىرگە ازايدى. ءبىز يمپورتتىق قانتقا 90 پايىز تاۋەلدىمىز، بۇل جەردە ەاەو اياسىنداعى شەشىمگە سۇيەنۋگە بولادى، بىراق كەز كەلگەن جاعدايدا بۇل ۇكىمەتتىڭ سالماقتى ەسەبى. سوندىقتان مەن مينيسترلەر باقىت سۇلتانوۆ پەن ەربول قاراشوكەەۆكە سوگىس جاريالايمىن»، - دەدى.

قىزمەتتىك جولىندا ءبىراز كرەسلو توزدىرعان باقىت سۇلتانوۆ تا قازىر بوس جۇرگەن جوق. سوڭعى تاعايىنداۋى 2022 جىلى بولعان. ەۋرازيا ەكونوميكالىق كوميسسياسىنا انتيمونوپوليا مەن باسەكەلەستىكتى قاداعالاۋ كوميسسياسىنا مۇشە بولعان.

ال ەربول قاراشوكەەۆ قر اۋىل شارۋاشىلىعى ءمينيسترى قىزمەتىنەن 2023 جىلى ءتۇسىپ، جامبىل وبلىسى اكىمى قىزمەتىنە تاعايىندالعان. قازىر دە اكىمدىك قىزمەتىن جالعاستىرۋدا.

ايتا كەتەيىك، تاپ وسى جىلى پرەزيدەنت سوگىس جاريالاعان تاعى ءبىر مينيستر – قر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆ بولدى.

سەرىكقالي برەكەشەۆ 2023 جىلدىڭ قاڭتارىندا مينيستر قىزمەتىنەن بوساتىلىپ، «قازمۇنايگازعا» بارعان.

Abai.kz