قر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ قحر-نىڭ قازاقستانداعى توتەنشە جانە وكىلەتتى ەلشىسى چجان سياومەن كەزدەستى. ەكىجاقتى كەزدەسۋدە ترانسشەكارالىق وزەندەردە سۋ ءبولۋ جانە سۋ سالاسىنداعى ىنتىماقتاستىق ماسەلەلەرى تالقىلاندى.

قازاقستان مەن قىتاي ترانسشەكارالىق وزەندەردە سۋ ءبولۋ ماسەلەلەرى بويىنشا كەلىسسوز جۇرگىزۋدە. تاراپتار ەكىجاقتى سۋ ىنتىماقتاستىعىنىڭ وزەكتى ماسەلەلەرىن تالقىلادى.

كەلىسسوزدەر بارىسىنداعى باسىم باعىتتىڭ ءبىرى - ترانسشەكارالىق وزەندەردە سۋ ءبولۋ ماسەلەسى. ول ءۇشىن قۇرامىنا قوس تاراپتىڭ ساراپشىلارى كىرەتىن ارنايى جۇمىس توبى جاساقتالعان.

باستى ماقسات - ىلە-بالقاش باسسەينىن سۋمەن تۇراقتى قامتاماسىز ەتۋ، بالىق شارۋاشىلىعى مەن ءتۋريزمدى دامىتۋ بولىپ تابىلادى. قر سۋ رەسۋرستارى جانە يرريگاتسيا مينيسترلىگى الداعى ۋاقىتتا قحر سۋ شارۋاشىلىعى مينيسترلىگىمەن ىنتىماقتاستىق تۋرالى مەموراندۋمعا قول قويۋعا نيەتتى.

سونىمەن قاتار، تاراپتار قازاقستاننىڭ سۋ ينفراقۇرىلىمىن بىرلەسىپ جاڭعىرتۋ جانە اۆتوماتتاندىرۋ، سۋ ۇنەمدەۋ تەحنولوگيالارىن ازىرلەۋ مەن ەنگىزۋ، سونداي-اق قىتايدا قازاقستاندىق مامانداردىڭ بىلىكتىلىگىن ارتتىرۋ ماسەلەلەرىن تالقىلادى.

«Power China كومپانياسىمەن قازاقستاندىق مامانداردى قىتايدا بىلىكتىلىك ارتتىرۋ كۋرستارىنان وتكىزۋ تۋرالى كەلىسىمگە كەلدىك. بۇگىن تالقىلانىپ جاتقان باستامالار قازاقستان مەن قىتايدىڭ ەكىجاقتى قارىم–قاتىناسىنا جاڭا سەرپىن بەرەدى دەپ ويلايمىن»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

Abai.kz