سوڭعى اپتاداعى رەسەي مەن ۋكراينا اراسىنداعى قانقاساپ سوعىستىڭ باسىم كوپ اقپاراتتارى دونباس مايداندارى مەن كۋرسكى شايقاستارى توڭىرەگىندە وربۋدە. بۇل تۋرالى Mezgil.kz اقپاراتتىق پورتالى جازدى. 

رەسەي كۋرسكىنى قايتارۋ ءۇشىن كۇش قىلىپ، سولتۇستىك كورەي مەن رەسەي ارمياسىنىڭ ەداۋىر بولىگىن كۋرسكىگە اتتاندىرعانى بەلگىلى. ساراپشىلار: «رەسەي ۋكراينانى كۋرسكىدەن شىعارۋعا تىرىسادى. ال ترامپ بۇعان قالاي قايرات قىلادى؟»، - دەگەن ساۋالدى اشىق تالقىعا شىعارۋدا.

ترامپتىڭ جوسپارى – كسرو قولدانعان امال ما؟

بايدان بيلىگى كەزىندە ۋكراينا رەسەي جەرىنە اسكەر كىرگىزە الدى. ەندى ترامپ بيلىككە قايتا كەتگەندە نە بولماق؟ وسى ماسەلە توڭىرەگىندە الەمدىك باق ءتۇرلى جوسىقتا تالقىلاۋدا.

ساراپشىلار: «ترامپ ۋكراينا ءۇشىن فين جانە كورەي نۇسقالارىنىڭ قوسپاسىن دايىنداپ جاتىر. كسرو كەزىندە فين مەن كارىستى ەكىگە بولگەن ساياسات جۇرگىزگەن بولاتىن. بۇل قوسپا پۋتين رەجىمى جاعدايىندا قانداي بولماق؟»، - دەيدى.

پۋتين تاپسىرماسى: 50 مىڭ اسكەر كۋرسكىنى ازات ەتسىن!

رەسەي پرەزيدەنتى رف قورعانىس مينيسترلىگىنە ناقتى تاپسىرما قويىپ، كۋرسكىنى ازات ەتۋگە مەرزىم بەكىتكەن. تاياۋ كۇندەرى رەسەي قالىڭ قولمەن شابۋىل باستاماق. رەسەي كۋرسكىنى ازات ەتۋ ءۇشىن 50 مىڭ سارباز جۇمىلدىرعان. وسى 50 مىڭنىڭ ىشىندە سولتۇستىك كورەيدەن كومەككە جىبەرىلگەن اسكەر دە بار.

ساراپشىلار: «پرەزيدەنت پۋتين اقش-تاعى پرەزيدەنتتىك يناۋگۋراتسياعا دەيىن، ياعني، ترامپ پرەزيدەنتتىك قىزمەتىنە كىرىسەتىن 20 قاڭتارعا دەيىن كۋرسكىنى ازات ەتۋدى جوسپارلاپ وتىر»، - دەيدى. بۇل تۋرالى «The Telegraph» جازدى.

وسىعان بايلانىستى ەۋروپاداعى ساياسي ورتا دا جاقىن كۇندەرى «رەسەي كۋرسكىدە ۇلكەن شابۋىلعا شىعادى» دەپ كۇتەدى.

«CNN» اگەنتتىگى: «رەسەي كۋرسك وبلىسىندا اۋقىمدى شابۋىل دايىنداۋدا. ولاردىڭ اراسىندا رەسەيلىك ساربازدار دا، كيم چەن ىن رەجيمىنىڭ سولتۇستىك كورەيلىك جالدامالىلارى دا بار.اسكەر سانى كەمىندە 50 مىڭ ادامدى قۇرايدى. ال شابۋىل تاياۋ كۇندەرى باستالۋى مۇمكىن»، - دەپ حابار تاراتتى.

ۋكراينا: كيم اسكەرى كۋرسكىنى عانا ەمەس، بەلگورودتى دا قورعاماق...

ۋكراينا قورعانىس مينيسترلىگى: «سولتۇستىك كورەي كومەككە جىبەرگەن اسكەر تەك كۋرسكىنى قورعاۋعا جىبەرىلگەن جوق. كيم اسكەرى بەلگورود مەن ۋكراينا شەكاراسىنا دا جىبەرىلگەن. ولار اتالعان باعىت بويىنشا جانە رەسەي ۋكراينادان ۋاقىتشا تارتىپ العان تەرريتوريالاردا ارەكەت ەتۋدە»، - دەپ مالىمدەدى.

ۋكراينالىق اسكەري ۆەدوموستۆو: «پۋتين سولتۇستىك كورەي اسكەريلەرىن سوعىسقا ارالاستىرۋ ارقىلى تاعى ءبىر قۋاتتى ويىنشىنى قامتي الدى. مايدانداعى سولتۇستىك كورەي اسكەرىنىڭ مىندەتى – ەكىنشى قورعانىس ەشەلونى رەتىندە ايقىندالعان. قازىر كيم اسكەرى كۋرسكىنى قورعاۋعا جىبەرىلگەنىمەن، جاقىندا ولار ۋكراينا اۋماعىنداعى ۇرىس قيمىلدارىنا ارالاسادى»، - دەدى.

كيم اسكەرى قانداي اسكەر؟

ۋكراينا بارلاۋىنىڭ دەرەگىنە سۇيەنسەك، سولتۇستىك كورەي رەسەيگە كومەككە جىبەرگەن اسكەردىڭ اراسىندا تەك جاياۋ اسكەرلەر بولىمشەلەرى عانا ەمەس، ارتيللەريستەر مەن مەرگەندەر دە بار.

كحدر ساربازدارىنىڭ قورعانىس شەبىنە جىبەرىلۋى – رەسەيلىك قولباسشىلىققا مايداننىڭ باسقا جەرلەرىندەگى شابۋىلدارعا «ءوز» بولىمشەلەرىن اتتاندىرۋعا مۇمكىندىك بەرەدى.

ۋكراينا قورعانىس ۆەدومستۆوسى: «اسكەري جوسپاردا بۇل ءۇش تولىققاندى بريگادا. قازىر جاۋ ەكىنشى قورعانىس سىزىعىنان 10 مىڭ سولداتتى الىپ تاستاپ، سولتۇستىك كورەيدەن كەلگەن سولداتتاردى سول جەرگە قويىپ، وسى ءۇش بريگادانى بەلسەندى ۇرىس قيمىلدارى ءجۇرىپ جاتقان جەرلەردىڭ بىرىنە جىبەرەدى. ءۇش تولىق قاندى بريگادا - ماڭىزدى رەسۋرس پا؟ ءيا، بۇل ەلەۋلى رەسۋرس»، - دەيدى.

«The New York Times» گازەتى: «رەسەي كۋرسكىگە 50 مىڭ ساربازدى جيناپ، شابۋىلعا دايىندالىپ جاتىر»، - دەپ جازسا، «The Telegraph» باسىلىمى: «رەسەيگە كومەككە جىبەرىلگەن سولتۇستىك كورەي ساربازدارىنىڭ كوپشىلىگى 20 جاستان ەندى اسقان ساربازدار. ارالارىندا 20-عا تولماعاندار دا بار»، - دەپ جازادى.

رەسەي مەن كحدر وداعى: ترامپ نە دەيدى؟

اقش-تىڭ جاڭا سايلانعان پرەزيدەنتى دونالد ترامپ «رەسەي، قىتاي، كحدر جانە يران اراسىنداعى وداقتى بۇزۋعا نيەتتى ەكەنىن» مالىمدەدى. بىراق، بۇل جوسپارىنىڭ جاي-جاپسارىن اشىپ ايتقان جوق.

«The Hill» باسىلىمى: «ترامپ ءوزىنىڭ ەۋروپالىق وداقتاستارى مەن ناتو-عا جاۋلاسىپ، ولاردى امەريكاندىق كومەككە تىم تاۋەلدى دەپ ەسەپتەيدى. بۇل رەتتە ترامپ ۆلاديمير پۋتينمەن، سونداي-اق قىتاي كومپارتياسىنىڭ توراعاسى سي تسزينپينمەن جانە كحدر كوشباسشىسى كيم چەن ىنمەن ءوزىنىڭ جەكە قارىم-قاتىناسىمەن ماقتانادى.

بايدەن اكىمشىلىگىن سىناعان ترامپ: «قاراڭىزشى، بۇل اقىماق ادامدار نە ىستەدى. ولار رەسەيگە، قىتايعا، يرانعا، سولتۇستىك كورەيگە جانە باسقالارعا توپقا بىرىگۋگە مۇمكىندىك بەردى»، - دەدى.

ترامپ سايلاۋالدى ميتينگىدە اقش-تىڭ رەسەيمەن، قىتايمەن جانە كحدر-مەن «وتە جاقسى قارىم-قاتىناستا بولاتىنىن» ايتقان»، - دەپ جازادى.

ترامپ اينالاسىنداعىلار نە دەيدى؟

جورج بۋش ينستيتۋتىنىڭ ساراپشىلارى: «ترامپ بۇل «اليانستىڭ» (رەسەي-قىتاي-كحدر-يران) اقش-قا تىكەلەي قاۋىپ توندىرەتىنىن جانە ءوز جوسپارىنىڭ ۋكرايناعا جەڭىسكە جەتۋگە كومەكتەسە الاتىنىن كورىپ وتىر»، - دەپ سانايدى.

الايدا جۇرتشىلىقتى، اسىرەسە كيەۆتى الاڭداتاتىنى – ترامپتىڭ اينالاسىنداعى ادامدار. مىسالى، جۋرناليست تاكەر كارلسون، ميللياردەر يلون ماسك جانە ۆيتسە-پرەزيدەنت جەي ۆەنستەر پرەزيدەنت ۆلاديمير زەلەنسكيگە جاعىمسىز پىكىر بىلدىرگەن نەمەسە ۋكرايناعا كومەكتەسكىسى كەلمەيتىنىن بىلدىرگەن ادامدار.

بۇعان دەيىن حابارلانعانداي، ترامپتىڭ اعا كەڭەسشىسى برايان لانزا: «اقش قىرىمدى ۋكرايناعا قايتارۋدى ماقسات ەتپەيدى»، - دەپ ايتقان بولاتىن. سونىمەن قاتار، لانزا زەلەنسكيدىڭ 1991 جىلدىڭ شەگىنە جەتۋگە دەگەن ۇمتىلىسىن «ەلەۋسىز» دەپ اتاعان.

Abai.kz