ءماجىلىس دەپۋتاتى نارتاي ارالبايۇلى كرەاتيۆتى يندۋستريا ارقىلى قىرۋار قارجى تابۋعا بولاتىنىن، بىراق ەلىمىزدە بۇل سالا دامىماي وتىرعانىن ايتتى.

– كرەاتيۆتى يندۋستريا ەلىمىز ءۇشىن وتە ماڭىزدى. بىراق بۇل سالاعا سوڭعى جىلدارى عانا نازار اۋدارىلىپ جاتىر. اسىرەسە مەملەكەت باسشىسىنىڭ بەرگەن تاپسىرماسىنان كەيىن. بۇۇ كرەاتيۆتى يندۋسترياداعى باعىتتى ناقتىلاپ بەردى. ولار – ديزاين، ءسان، ونەر، كينو، مۋزىكا، مەديا، كومپيۋتەرلىك گرافيكا جانە ت.ب. بۇل سالالار ارقىلى بيۋدجەتتىڭ قامباسىن تولتىرىپ، قىرۋار قاراجات تابۋعا بولار ەدى، - دەيدى دەپۋتات.

ونىڭ ايتۋىنشا، كرەاتيۆتى يندۋستريانىڭ كاپيتاليزاتسياسى الەمدە 2,3 ترلن دوللار. وكىنىشكە قاراي، قازاقستان وسى ۇلكەن كاپيتالدان ءوز ۇلەسىن الا الماي وتىر.

كەي ەلدەردە كرەاتيۆتى يندۋستريانىڭ ءجىو-دەگى ۇلەسى 3%، ال دامىعان ەلدەردە 12%-عا دەيىن.

– كرەاتيۆتى يندۋستريانى دامىتۋ ماسەلەسى مەملەكەتتىك ورگانعا جۇكتەلدى. قازىر مۇنىمەن مادەنيەت جانە اقپارات مينيسترلىگى اينالىسىپ جاتىر. دەگەنمەن مەملەكەت ارالاسقان جەردە ناقتى ناتيجە بولماي قالا ما دەگەن قورقىنىش بار. نەگە؟ ويتكەنى 2015 جىلعى زەرتتەۋگە سايكەس، قازاقستان كرەاتيۆتى يندۋستريا بويىنشا الەمدە 84-ورىندا بولسا، مينيسترلىك ۇسىنعان بيىلعى سوڭعى دەرەكتە سول 84-ورىندا قالىپ وتىرمىز، – دەپ ايتتى نارتاي ارالبايۇلى ماجىلىستە ءوتىپ جاتقان وتىرىستا.

Abai.kz