بۇگىن تەڭگە كۇنى.

ءبىز تاۋەلسىزدىكتىڭ وتىز جىلىندا وتارسىزدانۋدىڭ ورنىنا قۇلشىنا قۇنسىزدانىپ كەلەمىز. قۇنسىزدانباعان نەمىز قالدى؟.. تەڭگەمىزدى 30 جىلدا 100 ەسە، ياعني 10 000% قۇنسىزداندىرىپپىز.

اقشا بايلىقتىڭ بالامالى سەرتيفيكتى بولعان سوڭ، كۇن سايىن قولعا ۇستاپ، ساناي الاتىن بولعان سوڭ، ونىڭ قۇنسىزدانعانىن كوزىمىز كورەدى.

وتانىمىز شە؟

ۇلتىمىز شە؟

ءتىلىمىز شە؟!

وسى ۇشەۋى سەن ءۇشىن قانشالاقتى قۇندى؟ قانشاما جاستار وتاننان نەگە بەزەدى، نەگە قاشادى؟! انا ءتىلىن كەرەك قىلمايتىندارى قانشاما؟ نەگە قازاق بولعىسى كەلمەيدى؟ تەڭگە ونشاقتى رەت قۇنسىزدانسا، ۇلتتىق قۇندىلىقتارىمىزعا كۇن سايىن قۇنسىزداندىرۋ ءجۇردى. باسقاشا ەمەس، مەملەكەت كۇشىمەن — زاڭمەن جۇرگىزىلدى.

ەندى …

ەندى قۇلشىنامىز! قاسيەتىمىزدى، قۇندىلىعىمىزدى قايتارۋ ءۇشىن قۇلشىنامىز!

مىناۋ ولەڭ بۇدان وتىز جىل بۇرىن تەڭگەنىڭ جاسقا تولعان كۇنىنە ءسابي شاعىنا ارناپ جازىلىپ ەدى.

ازاتتىقتىڭ العاشقى كۇنىنەن-اق ونى جىرلاپپىز. ونىڭ العا اتتاعان ءار قادامىمەن قالامىمىز قاتار جۇگىرىپتى. قازاقتىڭ قۇيتتاي قۋانىشى ءۇشىن قۇيىلىپ تۇسەر شابىت، ءورىلىپ تۇسەر ولەڭ وزەگىمىزدە تاسيدى.

ەسكەرتۋ: «جاس الاش» گازەتىنىڭ 1994 جىلعى وسى كۇنگى سانىنا قاراڭىز. بۇل ولەڭ تەڭگە جايلى ماحابباتپەن جازىلعان ماقالامىزبەن بىرگە تۇر.

ءتول تەڭگە

ەڭبەگىمەن تاپپاسا دا، تاپسا دا،
سونىڭ ءبارى سۇعىن قادار اقشاعا.
قاس سۇلۋ دا،
كەدەيى دە،
بايى دا،
زار قاقساعان ديۋانا دا،
باسقا دا.

ازاتتىق بار قازاق دەيتىن ءبىر ەلدە،
ءوز تۋى بار العا شىعىپ تىگەرگە.
ءوز ءتىلى بار سويلەسە بۇلت اينالار،
ءوز ءۇنى بار داۋسىن كوككە تىرەردە.

ىرىسى مول ۇلان-بايتاق جەردە بار
سونداي باقىت
وزىڭدە بار،
مەندە بار.
اقشاسىنا قاراتا الماس ەندى ولار،
بايلىعىنىڭ باس يەسى تەڭگە بار.

تەڭگە شىقتى، كەشە شىقتى – كەش شىقتى،
تەڭگەمىزدى شىعارعانشا ەس شىقتى.
باتىرلىققا، باتىلدىققا باردىق ءبىز،
قوس بۇيىردەن قىسقان ساتتە «قوس مىقتى».

ارىلادى دىلگىر الاڭ دەرت ەلدەن،
ارىلامىن مەن دە كۇمان، سەلتەڭنەن.
بۇل زاماندا بازار باعا ورتەنگەن،
تىنىسىم بول،
ىرىسىم بول
ءتول تەڭگەم.

الماس احمەتبەكۇلى

Abai.kz