قازىر قوعامدا قايىرىمدىلىق قورىنىڭ جەتەكشىسى پەريزات قايراتتىڭ جەمقورلىق بويىنشا كۇدىككە ءىلىنۋى قىزۋ تالقىلانىپ جاتىر. 

وسىعان دەيىن، قما مالىمدەۋىنشە ول كوكتەمگى سۋ تاسقىنىنان زارداپ شەككەن ازاماتتارعا كومەكتەسۋ ءۇشىن جينالعان 1,5 ملرد تەڭگەدەن استام قاراجاتتى جىمقىردى دەپ كۇدىكتەلۋدە.

«قايىرىمدىلىقتىڭ نەگىزگى بولىگى قىمبات ءسان بۇيىمدارى مەن جىلجىمايتىن مۇلىكتى ساتىپ الۋ ماقساتىنا پايدالانىلدى. بيىل كوكتەمدە ول ەلورداداعى اۆتوسالونداردا 88 ملن تەڭگەگە «Mercedes-Benz S450»، 80 ملن تەڭگەگە «Lexus LX-600» جانە 39 ملن تەڭگەگە «Haval» اۆتوكولىكتەرىن ساتىپ الدى.

وسى كەزەڭدە ول جالپى سوماسى 600 ملن تەڭگەنى قۇرايتىن ەلوردانىڭ پرەميۋم ساناتتاعى «Akbulak Riviera»، «Highvill Ishim Gold»، «كوك جايلاۋ» تك (تۇراق ورىندارىن قوسا العاندا), سونداي-اق «Vela Village» كوتتەدج قالاشىعىندا جىلجىمايتىن مۇلىك نىساندارىن ساتىپ الدى»، - دەپ جازىلعان رەسمي مالىمدەمەدە.

قما اقپاراتىنشا، قازاقستاندىقتاردىڭ قايىرىمدىلىققا جىبەرگەن قاراجات ەسەبىنەن پەريزات ق. دۋباي، دوحا، لوندون جانە ستامبۋلداعى «St. Regis»، «Shangri-La»، «Palazzo Versace» جانە «Kempinski» سياقتى بەس جۇلدىزدى قوناق ۇيلەردە دەمالعان. بۇل ەلدەردە ول «Cartier» جانە «Louis Vuitton» سياقتى برەندتەردىڭ قىمبات اكسەسسۋارلارى مەن زەرگەرلىك بۇيىمداردى ساتىپ الىپ، فەشەنەبەلدى مەيرامحانالارعا بارىپ، ياحتالاردى جالداعان.

«قىلمىستىق سحەمانى جۇزەگە اسىرۋ ءۇشىن دوستارى مەن تۋىستارىنا 8% سىياقى بەرىپ، قوردىڭ اقشاسى قولما-قول اقشاعا اينالدىرىپ وتىرعان.

وسىلايشا، پەريزات ق. ءوزىنىڭ زاڭسىز ارەكەتتەرىمەن ەرىكتىلەر قوزعالىسىنىڭ بەدەلىنە نۇقسان كەلتىرىپ، ونىڭ اشىقتىق پەن ادالدىق پرينتسيپتەرىنە كۇمان كەلتىردى جانە حالىقتىڭ سەنىپ تاپسىرعان قاراجاتىن تالان-تاراجعا سالعان.

بۇل اقپارات جاريالانا سالىسىمەن، باق بەتتەرى مەن الەۋمەتتىك جەلىلەردە پەريزات قايراتقىزى تۋرالى جازباعان ادام قالمادى. ءبىرى داتتاسا، ءبىرى ماقتاپ، ول قىزدىڭ ارتىندا تانىمال «ادامدار» تۇر دەگەن پىكىرلەر جازىلدى.

دەسەك تە، پەريزات قايرات دەگەن كىم، ول باسقارعان قايىرىمدىلىق قورى ەلگە قانداي كومەك كورسەتتى؟

اشىق دەرككوزدەردە كەلتىرىلگەن مالىمەتتەرگە كەلسەك، «Biz Birgemiz Qazaqstan» قايىرىمدىلىق قورى 6 وڭىردە – باتىس قازاقستان، اقتوبە، قوستاناي، اباي، اقمولا جانە ۇلىتاۋ وبلىستارىندا قارعىن سۋدان جاپا شەككەندەرگە جىلۋ، كومەك جيناۋدى ۇيىمداستىرعان.

بۇل قور مەملەكەتتىڭ قولداۋىمەن، جالپىۇلتتىق ۆولونتەرلىك قوزعالىس ەسەبىندە 2021 جىلعى 3 ماۋسىمدا قايتا تىركەلىپتى. قوزعالىستىڭ قاتارىندا 15 مىڭداي ەرىكتى بولعان.

قوردىڭ Instagram پاراقشاسىندا ايتىلعانداي، پرەزيدەنتتىڭ تاپسىرماسىمەن جانە قور جۇمىسىنىڭ مولدىرلىگىن قامتاماسىز ەتۋ ماقساتىندا بيىلعى 27 ناۋرىزدان بەرى وعان تۇسكەن بارلىق قاراجاتتار قارجى مينيسترلىگىنىڭ جانە ۇلتتىق بانكتىڭ باقىلاۋىنا الىنعان.
الايدا قازاقستاندا توپان سۋدىڭ ەڭ اۋىر كەزەڭى بيىلعى ساۋىرگە تۇسپا-تۇس كەلگەنىن ەسكەرسەك، قايىرىمدىلىق قاراجاتتارى نەگىزىنەن جۇمسالىپ كەتسە كەرەك.

پەريزات قايرات تۋرالى نە بەلگىلى؟

پەريزات قايرات – ەلدە كەيىنگى جىلدارى مەملەكەتتىڭ قولداۋىمەن كۇش العان ۆولونتەرلىك قوزعالىستىڭ بەلگىلى بەلسەندىسى، قوعام قايراتكەرى.

Instagram پاراقشاسىندا ءوزى ايتقانداي، پەريزات اقتوبەنىڭ تۋماسى، اقتاۋدا مەكتەپ بىتىرگەن. 2015 جىلى استاناعا كوشىپ كەلدى. University of Nottingham بريتاندىق ۋنيۆەرسيتەتىن Business management ماماندىعى بويىنشا ءبىتىردى.
ەل پرەزيدەنتى 2020 جىلدى «ۆولونتەرلەر جىلى» دەپ جاريالاعانى ءمالىم. وسىعان بايلانىستى ەل ۇكىمەتى ەرىكتىلەر قوزعالىسىن دامىتۋدىڭ جول كارتاسىن ازىرلەدى، بيۋدجەتتەن مول قارجى ءبولدى.

ترەند تولقىنىن جۇگەندەپ ۇلگەرگەن پەريزات 2020 جىلعى مامىردا اتاقتى قوعامدىق قوردىڭ نەگىزىن قالادى. قور حالىقتىڭ الەۋمەتتىك از قامتىلعان توپتارىنا كومەك كورسەتتى. قايىرىمدىلىق ءىس-شارالارىن ۇيىمداستىردى. سودان بەرى ەلدى جايلاعان ءتۇرلى توتەنشە جاعدايلاردان زارداپ شەككەندەرگە قولداۋ كورسەتتى.

Statsnet كونتراگەنتتەردى تەكسەرۋ سەرۆيسىنىڭ دەرەگىنشە، پ.قايرات قۇرعان قوعامدىق بىرلەستىكتىڭ رەسمي اتاۋى «Biz Birgemiz Qazaqstan 2030» دەپ اتالادى. ول استانانىڭ ەسىلدىڭ وڭ جاعالاۋىنداعى ەسكى ورتالىعىندا، الماتى اۋدانىندا تىركەلگەن. قىزمەتكەرلەرىنىڭ سانى 10-عا دا جەتپەيدى. «تولەگەن سالىعى» دەگەن ورىندا «0» دەگەن سان تۇر.

اقپارات قۇرالدارىنىڭ جازۋىنشا، پەريزات قايرات بۇكىل عۇمىرى مەن ۋاقىتىن جالعىز قايىرىمدىلىق ىستەرگە ارناماعان، ونىڭ باسقا دا قىزىعۋشىلىقتارى كوپ. بوس ۋاقىتىندا كىتاپ وقىپ، ءان ايتادى. 10 جىلدان بەرى قازاق تىلىندە ولەڭ شىعارىپ جۇرگەن «اقىن» كورىنەدى. بۇل دارىنى تۋرالى ءوزى Instagram پاراقشاسىندا جاريالادى.

پەريزات قايراتتىڭ كىنالى-كىناسىزدىگىن الداعى ۋاقىتتا تەك سوت انىقتايدى. بىراق وسىنداي جاڭالىقتاردان كەيىن قايىرىمدىلىقتىڭ ارتىندا نە تۇرعانى الاڭداتادى.

ال، بۇگىن قما ەرىكتىلەر قوزعالىسىنىڭ بەلسەندىسى پەريزات قايراتقا قاتىستى تاعى ءبىر دەرەكتى جاريالادى.

«2023 جىلدىڭ قاراشا ايىندا پەريزات قايرات پالەستينا تۇرعىندارىنا گۋمانيتارلىق كومەك كورسەتۋ ءۇشىن قاراجات جيناۋدى ۇيىمداستىردى.

2023 جىلعى جەلتوقساندا وسى اقشا ەسەبىنەن پەريزات قايرات «Sensata Plaza» ەليتالىق كەشەنىنەن 49 ملن تەڭگەگە ءۇش بولمەلى پاتەر جانە 30 ملن تەڭگەگە «Mercedes-Benz EQE 500 4 Matic» جاڭا اۆتوكولىگىن ساتىپ الدى.

سونىمەن قاتار، قاراجاتتىڭ ءبىر بولىگى ءباا-دە «Rolex»، «Prada» جانە «Fendi» برەندتىك بۋتيكتەرىنەن زەرگەرلىك بۇيىمداردى، ساعاتتار مەن كيىمدەردى ساتىپ الۋعا جۇمسالدى»، — دەلىنگەن اگەنتتىك حابارلاماسىندا.

بۇل ەپيزود بويىنشا پەريزات قايرات 200 ملن تەڭگەدەن اسا قاراجاتتى جىمقىردى دەپ كۇدىكتەلۋدە.

Abai.kz