بىرنەشە كۇننەن بەرى «ەل باسشىسى قىزمەتتەن كەتسىن» دەپ كوتەرىلگەن ابحازيا وپپوزيتسياسىنىڭ كوشباسشىسى ادگۋر اردزينبا الاڭداعى حالىققا العىسىن ءبىلدىرىپ، ۇيلەرىنە تاراۋعا شاقىردى.

«بيلىك» پەن وپپوزيتسيا اراسىندا 10 ساعاتقا سوزىلعان كەلىسسوز ءجۇرىپ، قول جەتكىزىلگەن كەلىسىمگە سايكەس، نارازىلار 2024 جىلدىڭ 19 قاراشاسىندا ۇكىمەتتىك عيماراتتاردى بوساتاتىن بولدى.

ال ابحازيا دەيتىن الەمدە ەشبىر مەملەكەت مويىنداماعان «ەرگەجەيلى ەلدىڭ» باسشىسى-پرەزيدەنتى اسلان بجانيا ءوز ەركىمەن وتستاۆكاعا كەتەتىنىن جاريالاپ، بۇيرىققا قول قويدى.

«ابحازيا رەسپۋبليكاسى كونستيتۋتسياسىنىڭ 65-بابىنا سايكەس، ەلدەگى تۇراقتىلىق پەن كونستيتۋتسيالىق ءتارتىپتى ساقتاۋ ماقساتىندا، مەن ابحازيا رەسپۋبليكاسىنىڭ پرەزيدەنتى قىزمەتىنەن كەتەمىن»، - دەپ جاريالادى بجانيا. اسلان بجانيامەن بىرگە ابحازيا پرەمەر-ءمينيسترى الەكساندر انكۆاب تا وتستاۆكاعا كەتەتىن بولدى. اسلان بجانيا مەن الەكساندر انكۆابتان باسقا «مەملەكەتتىك كۇزەت قىزمەتىنىڭ باستىعى» دميتري دبار دا وتستاۆكاعا كەتەدى.

تاراپتار قول قويعان كەلىسىم بويىنشا، بجانيا وتستاۆكاعا كەتۋگە ءوتىنىش بەرەدى، ال وپپوزيتسيا مەن نارازى حالىق باسىپ العان ۇكىمەتتىك عيماراتتار بوساتىلادى.

ال ابحازيا پارلامەنتى اسلان بجانيانىڭ وتستاۆكاسى تۋرالى ءوتىنىشىن قارايدى. قازىرگى مينيسترلەر ابحازيا رەسپۋبليكاسىنىڭ جاڭادان سايلانعان پرەزيدەنتى قىزمەتىنە كىرىسكەنگە دەيىن ءوز مىندەتتەرىن اتقارادى.

ابحازيانىڭ «كونستيتۋتسياسىنا» سايكەس، «باسشىنىڭ» مىندەتىن قازىرگى «ۆيتسە-پرەزيدەنت» بادرا گۋنبا اتقاراتىن بولادى. پرەمەر-ءمينيستردىڭ مىندەتىن اتقارۋشى ۆالەري بگانبا بولادى، ول وسى لاۋازىمدى بۇرىن 2018-2020 جىلدارى اتقارعان بولاتىن.

ابحازيادا جاپپاي نارازىلىق 15 قاراشادا «پارلامەنت دەپۋتاتتارى» رەسەيمەن ينۆەستيتسيالىق كەلىسىمدى راتيفيكاتسيالاۋ تۋرالى جوبانى قابىلداعان كەزدە باستالعان. وپپوزيتسيا قۇجاتتى راتيفيكاتسيالاۋ ابحازياداعى ورتا جانە شاعىن بيزنەسكە تەرىس اسەر ەتىپ، رەسەيلىك بيزنەسمەندەرگە تۋريستىك نىساندار سالۋعا مۇمكىندىك بەرەدى دەپ ەسەپتەيدى.

Abai.kz