ۋكرايناداعى سوعىستىڭ باستالعانىنا 1000 كۇننەن اسىپ بارادى. 2022 جىلعى 24 اقپاندا رەسەي ساياسي ءھام اسكەري بيلىگىنىڭ، رف قورعانىس مينيسترلىگى باس شتابىنىڭ جوسپارى بويىنشا ۋكرايناعا باسىپ كىرۋ – جەدەل جانە جەڭىستى وپەراتسيا بولۋى ءتيىس ەدى.

الايدا، ولاي بولماي شىقتى. ۇزاققا سوزىلعان قانقاساپ سوعىستىڭ جالعاسىپ جاتقانىنا 1000 كۇننەن استى.

شىن مانەندە رەسەيلىك باس شتاب جىبەرگەن قاتەلىكتەرىنىڭ ءبىرى – ول ءوز ارمياسىنىڭ مۇمكىندىكتەرىن اسىرا باعالاپ، قارسىلاس ارمياسىن، ونىڭ جاۋىنگەرلىك قابىلەتتىلىگى مەن ۇرىسقا دايىندىعىن جەتە باعالاماعاندىعى.

قازا تاپقاندار سانىنىڭ رەكوردتىق ءوسىمى: قاراشاعا دەيىنگى ەسەپتەۋلەر بويىنشا، رەسەيد مەن ۋكراينانىڭ شىعىندارى تۋرالى نە بەلگىلى؟

تسيفرلارعا ءتىل بىتىرسەك:

– ۋكراينانىڭ 12 مىڭ 162 بەيبىت تۇرعىنى قازا تاپتى;

– ۋكراينا ءوزىنىڭ 16,95% اۋماعىنان ايىرىلدى;

– 14 مىڭنان استام ۋكرايندىق رەسەي تۇرمەلەرىنە توعىتىلدى;

– رەسەي مەن ۋكراينا اراسىندا 58 رەت اسكەري تۇتقىندارمەن الماسۋ ورىن الدى;

– 77 مىڭ 143 رەسەيلىك جاۋىنگەر مايدان دالاسىندا كوز جۇمدى;

– موبليزاتسيالانعان 12 مىڭ 867 رەسەيلىك جاۋىنگەر ءوز بەتىمەن سوعىس الاڭىن تاستاپ شىققانى ءۇشىن ىستەرى سوتقا بەرىلدى;

– 356 ادام رەسەي ارمياسىن قاراعالانى ءۇشىن زاڭمەن قۋدالاۋعا ۇشىرادى;

– ۋكراينانىڭ كۋرسكىگە باسىپ كىرگەنىنە 100 كۇننەن استى.

بۇلتارتاس فاكتىلەر:

– اۋە كەڭىستىگىندە ۋكراينا اۋماعىنداعى رف اۆياتسياسىنىڭ ارتىقشىلىعى تولىعىمەن جويىلدى.

– ۋكرايناعا باتىس ۇسىنعان دالدىگى جوعارى قارۋدىڭ تيىمدىلىگىنىڭ كۇرت قۇلدىراۋى ورىن الدى. مىسالعا 70 پايىزعا دەيىنگى دالدىگى بار «Excalibur» اقىلدى سناريادتارى قازىر التى پايىز جاعدايدا عانا نىساناعا تيەدى.

– ەڭ باستىسى ۋكراينا دا، رەسەيدە زامانالىق جاڭا سوعىستا ءوز قاتەلىكتەرىنەن ساباق الا ءبىلدى.

سوڭعى كۇندەردەگى ماڭىزدى شەشىمدەر:

– بايدەن ۋكرايناعا رەسەي اۋماعىنا ATACMS زىمىراندارىمەن سوققى بەرۋگە رۇقسات بەردى.

– ال پۋتين بايدەننىڭ زىمىراندار تۋرالى شەشىمىنەن كەيىن، رەسەيدىڭ جاڭارتىلعان يادرولىق دوكتريناسىن بەكىتتى.

تاعى ءبىر ماڭىزدى جاعداي بار: ەۋروپاداعى ۇلكەن سوعىس اسكەري ىستە جاڭا تەحنولوگيالىق ءداۋىر باستالعان ساتتە باستالدى، ول ۇرىس قيمىلدارى بارىسىندا ۇرىس الاڭىنداعى تاكتيكانى وزگەرتۋدى جانە جاڭا قاتەرلەرمەن كۇرەسۋ ءۇشىن امالدار مەن قۇرالداردى ويلاپ تابۋدى تالاپ ەتتى.

Abai.kz