2025 جىلى الماتىدا تسيفرلىق جوبالاردى دامىتۋعا 16,3 ملرد تەڭگە ءبولىنۋ جوسپارلانىپ وتىر. 2025–2027 جىلدارعا ارنالعان بيۋدجەت جوباسى الداعى ءماسليحات سەسسياسىندا قارالادى. بۇل تۋرالى قالالىق ءماسليحاتتىڭ ءباسپاسوز قىزمەتى حابارلادى.

2025 جىلى جاڭا بيۋدجەت اياسىندا قاراجات حالىق كوپ جينالاتىن ورىندار مەن «سەرگەك» اپپاراتتىق-باعدارلامالىق كەشەنىندەگى 6 مىڭ كامەرانى تەحنيكالىق قىزمەت كورسەتۋگە باعىتتالادى دەپ جوسپارلانىپ وتىر. بۇل كەشەندەردىڭ جۇمىسى ناتيجەسىندە مەگاپوليستە جول-كولىك وقيعالارىنىڭ سانى 17%-عا، ال جول اپاتىنان قازا تاپقاندار سانى 40%-عا ازايعان. قازىرگى ۋاقىتتا قالادا وسىنداي 1 641 كەشەن جۇمىس ىستەيدى. بيىلعى جىلدىڭ 9 ايىندا الماتىدا 3 ملن-نان استام قۇقىقبۇزۋشىلىق تىركەلگەن، ونىڭ ىشىندە 18,7 ملرد تەڭگەدەن استام ايىپپۇل بيۋدجەتكە ءوندىرىلدى.

سونىمەن قاتار، مەگاپوليستە «بىرىڭعاي بەينەمونيتورينگ جۇيەسى» جوباسىن ىسكە اسىرۋ جالعاسۋدا. قازىرگى تاڭدا جۇيەگە 45,2 مىڭ بەينەكامەرا قوسىلعان، ولاردىڭ ىشىندە 616 مەملەكەتتىك جانە 240 جەكە نىسان بار. كەلەسى جىلى ولاردىڭ سانى 70 مىڭعا دەيىن ارتادى. جوبانىڭ نەگىزگى ماقساتى – قالانىڭ بارلىق بەينەباقىلاۋ كامەراسىن بىرىكتىرۋ ءۇشىن بىرىڭعاي پلاتفورمانى ەنگىزۋ. بۇل بەينەاعىنداردى ناقتى ۋاقىت رەجيمىندە تالداۋعا جانە ولاردى ءتۇرلى مىندەتتەر ءۇشىن پايدالانۋعا مۇمكىندىك بەرەدى. جاساندى ينتەللەكت الگوريتمدەرى ادامداردىڭ توپتالۋىن انىقتاۋعا، ولاردىڭ مىنەز-قۇلقىن تالداۋعا، توبەلەس، كۇدىكتى زاتتار، ادامدار مەن كولىكتەردى ىزدەۋگە، سونداي-اق ءورت پەن ءتۇتىندى تانۋعا مۇمكىندىك بەرەدى.

كەلەسى جىلى كوممۋنالدىق قىزمەتتەر مەن قالالىق سەرۆيستەردىڭ ماسەلەسىن شەشۋگە باعىتتالعان جاڭا بەينەاناليتيكا تۇرلەرىن ىسكە قوسۋ جوسپارلانعان. ولار قوقىس تاستالعان ايماقتاردى انىقتاۋ، قوقىس كونتەينەرلەرىنىڭ تولۋ دەڭگەيىن باقىلاۋ، قوعامدىق ورىندار مەن كوشەلەردەگى سۋ باسۋ دەڭگەيىن باعالاۋ، بۇرالقى جانۋارلاردى انىقتاۋ جانە تاعى باسقا ماسەلەنى قامتيدى.

ايتا كەتەيىك، «ازاماتتار كوپ جينالاتىن ورىنداردا بەينەمونيتورينگ جۇيەسى» جوباسى اياسىندا بيىلعى جىلدىڭ سوڭىنا دەيىن 6 مىڭ كامەرا ورناتىلادى.

بۇعان قوسا، بيۋدجەتتەن بولىنگەن قاراجاتتىڭ ءبىر بولىگى قالانىڭ بارلىق قىزمەت بەلسەندىلىگىن ونلاين رەجيمدە باقىلاۋعا مۇمكىندىك بەرەتىن قالالىق احۋالدىق ورتالىقتى ودان ءارى دامىتۋعا جۇمسالماق.

Abai.kz