اراشا ءتۇسىڭىز

قۇرمەتتى قاسىم-جومارت كەمەلۇلى!

ءسىز - قازاقستان رەسپۋبليكاسىنىڭ كونستيتۋتسياسىنىڭ زاڭدى كەپىلىسىز!

كونستيتۋتسياسىنىڭ ءبىرىنشى بابى: “ەلىمىزدىڭ ەڭ قىمبات قازىناسى — ادام جانە ادامنىڭ ءومىرى، قۇقىقتارى مەن بوستاندىقتارى” دەپ جازىلعان.

تالعارداعى قارجاۋبايدىڭ شاڭىراعىنا جاسالعان قاستاندىقتان ادامداردىڭ ءومىرى قيىلدى، قۇقتارى بۇزىلدى، بوستاندىقتارىنان ايىرىلدى.

بۇل - قازاقستان رەسپۋبيلكاسىنىڭ كونستيتۋتسياسىنا قارسى ىستەلگەن قىلمىس بولىپ سانالادى. ادىلەتسىزدىك حالىقتىڭ بيلىككە دەگەن نارازىلىعىن تۋدىردى. بۇل جاعدايدى قولدان ۇيىمداستىرىپ وتىرعان توپ بولۋى مۇمكىن…
ادىلەتسىزدىكتىڭ سوڭى نارازىلىققا، نارازىلىقتىڭ اقىرى تولقۋعا، تولقۋدىڭ ءتۇبى توڭكەرلىسكە اكەلىپ سوعۋى مۇمكىن!

بۇل - تاۋەلسىزدىككە ۇلكەن قاتەر! سوندىقتان دا ءوز ۇسىنىسىمدى سىزگە جولداعاندى ءجون سانادىم.

قارجاۋبايدىڭ قاسىرەتى

1. قارجاۋباي نۇرىموۆتىڭ 16 جاسار ۇلى شەرزاتتى ۇيىمداسقان قاراقشى توپ اتا-اناسىنىڭ كوزىنشە پىشاقتاپ، قورلاپ ءولتىردى.

شەرزاتقا اراشا بولامىن دەگەن قارجاۋبايدىڭ تۋعان ءىنىسى نۇرقانات (مارقۇم) سول كەزدە پىشاق جاراقاتىمەن اۋرۋحاناعا ءتۇستى.

2. شەرزاتتىڭ جەتىسى وتكەن كۇنى قارجاۋبايدىڭ شاڭىراعىن قاراقشىلار ورتەپ جىبەردى. قىلمىسقا 2 اي وتسە دە پوليتسيا قىلمىسكەرلەردى ۇستاعان جوق.

3. سوتقا ساناۋلى كۇن قالعاندا قارجاۋبايدىڭ باۋىرى نۇرقانات قازا تاپتى.
نۇرقانات سوتتاعى باستى كۋاگەر بولاتىن. باستى كۋانىڭ ءولىمى بىرەۋلەرگە قاجەت بولۋى مۇمكىن…باستى كۋاگەر نۇرعاناتتى قورعاپ جۇرگەن پوليتسيا نە قاراپ ءجۇردى!؟

4. قارجاۋباي بالاسىنان، باۋىرىنان، باسپاناسىنان ايىرىلدى. قايعىدان قان جۇتتى، جۇرەگى جارالاندى، جۇيكەسى ابدەن توزدى. ادىلەتسىزدىككە ابدەن اشىنعان ازامات جانايقايىن سىزدەرگە جەتكىزگىسى كەلدى. ايقايلادى، ادىلدىك سۇرادى، كولىكتىڭ ۇستىنە شىقتى. بىراق ەشكىمگە زيان تيگىزگەن جوق. بيلىك پسيحولىق الدىرىپ، اشىنعاندى سابىرعا شاقىرۋدىڭ ورنىنا، قارۋلى جاساق شاقىردى.

ماقساتتارى - قارجاۋبايدى دا، حالىقتى دا، اشىندىرۋ، ارانداتۋ، قورقىتۋ.
سوت “اكىمشىلدىك زاڭىن بۇزدى” دەپ قارجاۋبايدى 15 كۇن اباقتىعا قامادى.
قارجاۋبايدى تۇرمەگە قاماعانى ازداي، ونىڭ اپاسىن، كۇيەۋ بالاسىن قوسا تۇرمەگە جاۋىپ، قارىنداسىنا ايىپپۇل سالدى. قارجاۋباي ەڭ بولماسا باۋىرىنىڭ ساداقاسىن دا وتكىزە العان جوق.

ءۇيىن ورتەگەن، باۋىرىن ولتىرگەن قىلمىسكەرلەر بوستاندىقتا، ال قارجاۋباي تۋمالاستارىمەن تۇرمەدە جاتىر. سول ادىلدىك پە؟!

حالىق ءبارىن كورىپ، ءبىلىپ، ەستىپ اشىنىپ وتىر. مۇمكىن حالىقتى جەلتوقساندا اشىندىرۋ، ارانداتۋ بىرەۋلەرگە قاجەت بولار..! سوندا قارجاۋبايدىڭ وتباسى تۇرمەگە قامايتىنداي قوعامعا قاۋىپتى قىلمىسكەرلەر مە؟ جوق!

قارجاۋبايدىڭ وتباسى

قارجاۋبايدىڭ اۋلەتى اق جۇرەكتى، اق نيەتتى، اق حالاتتى ابزال جاندار.

1. قارجاۋباي نۇرىموۆ 20 جىلدان بەرى ءومىرىن مەديتسيناعا ارناعان بىلىكتى دارىگەر. ول 2023 جىلدىڭ 5 قاڭتارىندا قار استىندا قالعان 25 ادامدى قۇتقارعان باتىر.

2. قارجاۋبايدىڭ جارى گۇلبارا بيشەمبيەۆا مەدبيكە.

3. قارجاۋبايدىڭ باۋىرى نۇرعانات گايپباەۆ 10 جىلدان استام ۋاقىت فەلدشەر. 2021 جىلى جانىپ جاتقان ۇشاقتان ەكى اسكەريدى قۇتقارىپ قالعان باتىر (قىرشىن كەتتى).

4. قارجاۋبايدىڭ تۋعان اپكەسى سالتانات نۇرىموۆا مەن قارىنداسى پەريزات نۇرىموۆا دا 10 جىلدان استام ۋاقىت مەدبيكە بولىپ حالىققا قىزمەت ەتىپ كەلەدى.

قارجاۋبايدىڭ وتباسى حالىققا قايىرى ءتيىپ، ەلدىڭ العىسىن الىپ جۇرگەن اق حالاتتى ادال جاندار. قارجاۋباي بالاسى ءولىپ، باسپاناسى ورتەنىپ، جانى كۇيىپ جاتقاندا دا حالىقتى كوشەگە شىقپاڭدار دەپ سابىرعا شاقىردى.

قاراپايىم حالىقتان اقشا جينامايمىن دەپ ەلدىڭ كومەگىنەن دە باس تارتتى. ولار وتباسىمەن وتە سابىرلى، پاراساتتى، ءبىلىمدى تەكتى ادامدار. قىلمىسكەرلەر ەمەس!

قۇرمەتتى پرەزدەنت مىرزا!

سىزدەن سۇرايتىنىمىز:

1. شەرزاتتىڭ سوتى اشىق، حالىقتىڭ كوز الدىندا ءوتسىن!
2. شەرزاتتى ولتىرگەندەرگە ەڭ اۋىر جازا قولدانسىن!
3. شەرزاتتى ولتىرۋگە قىلمىسكەرلەر مەن بىرگە كەلگەن 2 ايەل دە زاڭ الدىندا جاۋاپكەرشىلىككە تارتىلسىن!
4. قارجاۋبايدىڭ ءۇيىن ورتەگەندەردى تەز ارادا تاۋىپ، زاڭمەن جازاسىن السىن!
قارجاۋبايعا مورالدىق، ماتەريالدىق شىعىنىن وتەسىن!
5. نۇرقاناتتىڭ ءولىمى جان-جاقتى تولىق تەكسەرىلسىن. ءولىمنىڭ ناقتى سەبەبىن انىقتاۋ ءۇشىن شەتەلدەن ارنايى بىلىكتى ماماندار شاقىرۋ قاجەت.
6. قورعالۋعا ءتيىستى كۋاگەر نۇرقاناتتى قورعاماعانى ءۇشىن پوليتسيا قىزمەتكەرلەرىنىڭ ۇستىنەن قر قىلمىستىق كودەكسi
371-باپپەن قىلمىستىق ءىس قوزعالسىن.
ولار زاڭ الدىندا جاۋاپقا تارتىلسىن.
7. قارجاۋبايدىڭ ءوزىن جانە تۇرمەدە جاتقان باۋىرلارىن تۇرمەدەن بوساتسىن.
قارجاۋبايدىڭ ۇستىنەن قوزعالعان قىلمىستىق ءىس توقتاتىلسىن.
8. قارجاۋبايدىڭ اپاسى سالتانات نۇرىموۆاعا قازاقستان رەسپۋبليكاسى ازاماتتىعى بەرىلسىن!
ەلدەن شىعارىلماسىن، باۋىرلارىنىڭ، اناسىنىڭ قاسىندا قالسىن!
9. قارجاۋبايدىڭ وتباسىن، تۋمالاستارىن تالعارعا قالدىرۋعا بولمايدى.
قاۋىپسىز وزدەرى قالاعان قالاعا تەگىن ءۇي بەرىپ كوشىرسىن.
10. بارلىق قىلمىستىق توپتىڭ ارتىندا كورىنبەي تۇرعان تۇلعالاردى ۇستاسىن.
11. قارجاۋبايعا جالا جاۋىپ، الەۋمەتتىك جەلىلەر ارقىلى پسيحولوگيالىق شابۋىل جاساپ جۇرگەندەر زاڭ الدىندا
جازالانسىن!

قۇرمەتتى قاسىم-جومارت كەمەلۇلى!

بۇل - قارجاۋبايدىڭ وتباسىنداعى قاسىرەت ەمەس، قازاقستان ازاماتتارىن قورقىتىپ، ۇرەيدە ۇستاپ، ەلدى بيلىككە ايداپ سالۋ ءۇشىن جاسالىپ جاتقان ارەكەت.

ەگەر دە بۇل جاعدايعا بۇگىن قاتاڭ شارا قولدانباساڭىز، ەرتەڭ كەش قالامىز!
ۇسىنىس بىزدەن، ناقتى شارا قولدانۋ سىزدەن بولسىن!

قۇرمەتپەن، جانىبەك قوجىق

ماڭعىستاۋ وبلىسى، وندى اۋىلى

Abai.kz