مەملەكەت باسشىسىنىڭ – قارۋلى كۇشتەردىڭ جوعارعى باس قولباسشىسىنىڭ تاپسىرماسى اياسىندا قازاقستان ارمياسىن جوعارى دالدىكتى جانە جوعارى تەحنولوگيالىق قارۋ-جاراقپەن، سونىڭ ىشىندە ۇشقىشسىز ۇشۋ اپپاراتتارىمەن جابدىقتاۋ باسىم باعىتتاردىڭ ءبىرى بولىپ تابىلادى.

2024 جىلى قازاقستان ارمياسىنىڭ قۇرامالارىندا جانە اسكەري بولىمدەرىندە ۇشقىشسىز اۆياتسيالىق جۇيەلەر بولىمشەلەرى قۇرىلدى. بۇگىنگى كۇنى قارۋ-جاراق قۇرامىندا بارلاۋشى-سوققىش ۇشقىشسىز ۇشۋ اپپاراتى Wing Loong جانە بارلاۋ ۇشقىشسىز ۇشۋ اپپاراتى Skylark بار. تۇركيانىڭ قازىرگى زامانعى ۇشقىشسىز ۇشۋ اپپاراتى ANKA تاجىريبەلىك اسكەري سىناقتاردان ءساتتى ءوتىپ، قارۋ-جاراققا الىندى.

ماماندار ۇشقىشسىز ۇشۋ اپپاراتتارىن قولدانۋ بويىنشا حالىقارالىق تاجىريبەنى بەلسەندى تۇردە زەرتتەۋدە.

ەكىجاقتى اسكەري ىنتىماقتاستىق شەڭبەرىندە قازاقستاننىڭ قورعانىس ءمينيسترى گەنەرال-پولكوۆنيك رۋسلان جاقسىلىقوۆ تۇركياداعى Saha EXPO-2024 حالىقارالىق كورمەسىندە بولىپ، Baykar Defence كومپانياسىنىڭ باس ديرەكتورى حالۋك بايراكتارمەن كەلىسسوزدەر وتكىزدى. تاراپتار ەلىمىزدىڭ اۋماعىندا جەدەل دەڭگەيدەگى تاكتيكالىق ۇشقىشسىز اۆياتسيالىق جۇيەلەر مەن بارراجدى وق-دارىلەر ءوندىرىسىن وقشاۋلاۋ ماسەلەسى بويىنشا جول كارتاسىن ازىرلەۋ تۋرالى كەلىسىمگە كەلدى.

كەيىنىرەك، قازاقستان اسكەري دەلەگاتسياسى ستامبۋل مەن انكاراعا ساپارى كەزىندە اسكەري «BAYKAR»، «HAVELSAN»، «ASELSAN» جانە «TRANSVARO» كومپانيالارىنىڭ زاۋىتتارىندا، وندىرىستىك شەبەرحانالارىندا، جوبالاۋ بيۋرولارىندا بولىپ، ولاردىڭ ءوندىرىپ جاتقان ونىمدەرىمەن تولىق تانىستى.

«Corlu» جانە «Kesan» وقۋ-سىناق پوليگونىندا تۇرىك ماماندارى «Bayraktar AKICI»، «Bayraktar TB3»، «Bayraktar TB2»، «Bayraktar Kalkan» ۇشقىشسىز اۆياتسيالىق جۇيەلەرىن جانە «Mosquito X» بارراجدى وق-دارىلەرى  ونىمدەرىن پراكتيكالىق تۇردە تانىستىردى.

«ASELSAN» جانە «HAVELSAN» كومپانيالارىنىڭ كاسىپورىندارىندا قازاقستاندىق ساراپشىلار جەر ءۇستى باسقارۋ رادارلارى، بيىكتىك ولشەگىشتەر، دروندارعا قارسى جۇيەلەر، گەوگرافيالىق تالداۋ جۇيەسى، ءارتۇرلى سيمۋلياتورلار مەن كەشەندى جالپىاسكەري وپەراتسيالاردى يميتاتسيالىق مودەلدەۋ قۇرالدارىمەن تانىستى.

كەلىسسوزدەر ناتيجەسىندە قازاقستان رەسپۋبليكاسىنىڭ قورعانىس مينيسترلىگى مەن «BAYKAR» كومپانياسى اراسىندا جۇمىس كەزدەسۋىنىڭ حاتتاماسىنا قول قويىلدى، وندا تۇرىك تاراپىنىڭ قازاقستان قارۋلى كۇشتەرىنە «Bayraktar Kalkan»، «Bayraktar Mini» ۇشقىشسىز اۆياتسيالىق جۇيەلەرىن جانە «Mosquito X» وپەراتسيالىق بارراجدى وق-دارىلەردى اسكەري سىناقتار وتكىزۋ ءۇشىن تەگىن بەرۋگە نيەتى راستالدى.

سونداي-اق، ۇشقىشسىز ۇشۋ اپپاراتتارىنا قارسى قۇرالدار ازىرلەنىپ، زەرتتەلۋدە. الماتى قالاسىنداعى راديوەلەكترونيكا جانە بايلانىس اسكەري-ينجەنەرلىك  ينستيتۋتىنىڭ ماماندارى ۇشقىشسىز ۇشۋ اپپاراتتارىنا قارسى قارۋ-جاراقتىڭ تاجىريبەلىك پارتياسىن جاساپ، ونى قازىرگى ۋاقىتتا تاجىريبەلىك پايدالانۋ كەزەڭىنەن وتكىزىپ جاتىر. بۇل قۇرىلعىلار ۇشقىشسىز ۇشۋ اپپاراتتارىنا قارسى كۇرەسۋ ءۇشىن ارنالعان، بۇل ەلدىڭ قورعانىسى ءۇشىن وتە ماڭىزدى، ويتكەنى دروندارعا قاتىستى قاۋىپتەر ءوسىپ كەلەدى.

قازاقستان سونداي-اق جابدىقتار جەتكىزۋدى ءارتاراپتاندىرۋ اياسىندا باتىس كومپانيالارىمەن دە جۇمىس ىستەيدى. الداعى جوسپارلاردا – كەدەرگىلەر ستانتسيالارىن جانە دروندارعا قارسى قارۋلاردى ساتىپ الۋ، بۇل اۋە كەڭىستىگىن قورعاۋ جانە دروندارعا قارسى كۇرەس مۇمكىندىكتەرىن كەڭەيتۋگە مۇمكىندىك بەرەدى.

Abai.kz