قازاقستان قۇراماسى 2025 جىلى قاتىساتىن نەگىزگى سپورت جارىستارى تۋرالى قر سپورت جانە تۋريزم مينيسترلىگى جازدى.

بيىل ەلىمىزدە حالىقارالىق دەڭگەيدەگى بىرنەشە جارىس وتەدى. ال وتاندىق سپورتشىلار ادەتتەگىدەي الەمنىڭ ءار قيىرىندا ۇيىمداستىرىلاتىن ءدۇبىرلى دودالاردا باق سىنايدى.

* بۇل كۇندەرى الماتىداعى «شىمبۇلاق» تاۋ-شاڭعى كۋرورتىندا فريستايل-موگۋل جانە فريستايل-اكروباتيكادان جاسوسپىرىمدەر اراسىنداعى الەم چەمپيوناتى ءوتىپ جاتىر. جارىسقا قازاقستان، گەرمانيا، كانادا، قىتاي، فرانتسيا، اقش، وڭتۇستىك كورەيا جانە باسقا دا ەلدەردەن 100-دەن استام سپورتشى ونەر كورسەتۋدە. چەمپيوناتتا التى سپورت ءتۇرى بويىنشا 196 مەدال جيىنتىعى ساراپقا سالىنادى. ەل قۇراماسى ساپىنان بولاشاعىنان ءۇمىت كۇتتىرەتىن جاس دارىندى سپورتشىلار قاتىسىپ جاتىر. ولاردىڭ قاتارىندا اناستاسيا گورودكو، دىنمۇحاممەد رايىمقۇل، يلنار يبراگيموۆ جانە باسقا دا ساڭلاقتار بار.

* اقپان ايىندا قازاقستان ۇلتتىق قۇراماسى قىتايدىڭ حاربين قالاسىندا وتەتىن IX قىسقى ازيا ويىندارىنا قاتىسادى. سارى قۇرلىق دوداسىنا 139 قازاقستاندىق سپورتشى بياتلون، شايبالى حوككەي، مانەرلەپ سىرعاناۋ، شورت-ترەك جانە باسقا دا سپورت تۇرلەرى بويىنشا باق سىنايدى. جارىسقا 32 ەلدەن 1000-نان استام اتلەت قاتىسادى دەپ كۇتىلۋدە.

* ال وتاندىق سپورتشىلار بيىل ءباا-دە وتەتىن II «بولاشاقتىڭ ويىندارىنا» قاتىسادى. بۇعان دەيىن مەملەكەت باسشىسىنىڭ باستاماسىمەن قازاقستان 2026 جىلى ءداستۇرلى سپورت پەن كيبەرسپورتتى بىرىكتىرەتىن بىرەگەي تۋرنير – Phygital Games of the Future جارىسىن وتكىزۋ قۇقىعىنا يە بولعان ەدى. سپورتتىق ءىس-شارانى وتكىزۋ قۇقىعى ءۇشىن قازاقستان، پەرۋ جانە چيلي مەملەكەتتەرى باق سىناعان بولاتىن.

* سونداي-اق جەرلەستەرىمىز بيىل بىرنەشە ماڭىزدى جارىستاردا سىنعا تۇسەدى. اتاپ ايتقاندا، ەر-ريادتاعى (ساۋد ارابياسى) VI يسلام ىنتىماقتاستىق ويىندارى، باكۋدەگى (ازەربايجان) III تمد ويىندارى جانە چەندۋدەگى (قىتاي) XII دۇنيەجۇزىلىك ويىندارىنا قاتىسادى. جالپى 2025 جىلى وتاندىق سپورتشىلار 100-دەن استام حالىقارالىق جانە رەسپۋبليكالىق دەڭگەيدەگى سپورتتىق تۋرنيرلەر مەن جارىستاردا باق سىنايدى دەپ جوسپارلانعان.

Abai.kz