ءال-فارابي اتىنداعى شىمكەنت قالالىق عىلىمي-امبەباپ كىتاپحاناسىندا جاۋھار جازۋشى، دارىندى دراماتۋرگ، قازاقستاننىڭ ەڭبەك سىڭىرگەن قايراتكەرى، «قۇرمەت» جانە «پاراسات» وردەندەرىنىڭ يەگەرى، حالىقارالىق «الاش» جانە «تۇركى الەمىنە قىزمەتى ءۇشىن»  سىيلىقتارىنىڭ لاۋرەاتى، وڭتۇستىك قازاقستان (قازىرگى تۇركىستان) وبلىسىنىڭ، تۇلكىباس جانە بايدىبەك اۋداندارىنىڭ قۇرمەتتى ازاماتى مارحابات بايعۇتتىڭ 80 جىلدىق مەرەيتويىنا وراي «مارحابات» اتتى حالىقاراىق قوعامدىق-ساياسي، ادەبي-كوركەم، مادەني-الەۋمەتتىك، تاريحي-تانىمدىق جۋرنالى مەن «Markhabat.kz» ادەبي-اقپاراتتىق پورتال تانىستىرىلىم ءراسىمى ءوتتى. وسىلايشا قازاق ادەبيەتىنىڭ الىپتارىنا ارنالعان «اباي»، «قاسىم»، «مۇقاعالي» جۋرنالدارىنىڭ قاتارىنا «مارحابات» جۋرنالى دا قوسىلىپ وتىر.

ءىس-شارانى رەسپۋبليكالىق «Egemen Qazaqstan» گازەتىنىڭ تۇركىستان وبلىسىنداعى مەنشىكتى ءتىلشىسى، وبلىستىق ءماسليحاتتىڭ دەپۋتاتى، «مارحابات بايعۇتتىڭ تۋعانىنا 80 جىل» جوباسىنىڭ جەتەكشىسى، «مەدياكراتيا»  قوعامدىق بىرلەستىگىنىڭ توراعاسى عالىمجان ەلشىباي قىسقاشا ءسوز سويلەپ اشتى. جۋرنال ۇلت ادەبيەتى مەن مادەنيەتىنىڭ دامۋىنا سەپتىگىن تيگىزىپ، سان الۋان تاقىرىپتا جاڭاشىل شىعارمالار جاريالاۋعا نيەت ءبىلدىرىپ وتىر. ال اقپاراتتىق پورتالدا جازۋشىنىڭ جەكە فوتومۇراعاتى، سۇحباتتارى، شىعارمالارى،  قالامگەر جايلى ەستەلىك، ەسسەلەر جاريالاناتىن بولادى. استاناداعى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە جازۋشى مارحابات بايعۇتتىڭ شىعارماشىلىعىن  زەرتتەۋگە ارنالعان قوس بىردەي كانديداتتىق ديسسەرتاتسيا قورعالعانى - مارحاباتتانۋ عىلىمىنىڭ باستاماسى ىسپەتتەس.

«مارحابات» جۋرنالىنىڭ باس رەداكتورى ورالحان ءداۋىتتىڭ ايتۋىنشا، بۇل باسىلىم وسىعان دەيىن جارىق كورىپ كەلگەن «تۇران-تۇركىستان» جۋرنالىنىڭ زاڭدى جالعاسى. سەبەبى مۇنىڭ باستاۋىندا كەزىندە جازۋشى مارحابات بايعۇت تۇرعان ەكەن.

باسقوسۋ بارىسىندا شىمكەنت قالالىق ءماسليحاتىنىڭ توراعاسى، رەسپۋبليكالىق «Amanat» پارتياسىنىڭ شىمكەنت قالالىق فيليالىنىڭ توراعاسى باحادىر ءمادالىۇلى نارىمبەتوۆ، تۇركىستان وبلىسى اكىمىنىڭ ورىنباسارى ەرتاي كەنجەبەكۇلى التاەۆ، جامبىل وبلىcىنداعى شەرحان مۇرتازا اتىنداعى «رۋحانيات جانە تاريحتانۋ ورتالىعىنىڭ» ديرەكتورى جاسۇلان ابدىحالىق، شىمكەنت قالاسى اكىمىنىڭ ورىنباسارى سارسەن ابايۇلى قۇرانبەك، قالامگەردىڭ جان جاpى قىزداركۇل (قىزدان)  پەرنەبايقىزى، اقىن، حالىقارالىق «الاش» جانە كونستانتين سيمونوۆ اتىنداعى ادەبي سىيلىقتاردىڭ لاۋرەاتى نارماحان بەگالىۇلى  ءسوز سويلەپ، ماحاڭ جايلى ويلارىن ورتاعا سالدى.

مارحابات بايعۇتتىڭ «ۇلىسىمنىڭ ۇيىتقىسى - وڭتۇستىك»، «ىرىس الدى - ىنتىماق»، «تاۋپىستەلى تاعىلىمى»، «بوزارىقتان بوزتورعايعا دەيىن» سەكىلدى ىزگىلىكتى دە يگىلىكتى ءىس-شارالارعا ۇيىتقى بولعانىن ءبارىڭىز جاقسى  بىلەسىزدەر. ەندى جامبىل وبلىسىنىڭ اكىمى ەربول شىراقبايۇلى قاراشوكەەۆتىڭ باستاماسىمەن قولعا الىنعان بيىلعى «كىتاپ وقۋ جىلىندا» «اۋليەاتا - كىتاپ وقيتىن ءوڭىر» جوباسىنىڭ اياسىندا قازاقتىڭ قوس قالامگەرى - شەرحان مۇرتازا مەن مارحابات بايعۇتتىڭ شىعارمالارى بىردەي ناسيحاتتالماق. ەگەمەن ەلىمىزدىڭ ءۇشىنشى مەگاپوليسىندە  جازۋشىنىڭ ءومىرى مەن شىعارماشىلىعىنا ارنالعان عىلىمي-تەوريالىق كونفەرەنتسيا وتكىزىلىپ، «مارحابات وقۋلارى» ۇيىمداستىرىلماق. شىمكەنتتە مارحابات بايعۇت اتىنداعى «ستۋدەنتتەر ورتالىعى» اشىلسا، تۇركىستاندا «مارحاباتتانۋ ورتالىعىن» اشۋ كوزدەلۋدە.

«مارحابات» جۋرنالى عالىمجان ەلشىباي مەن ورالحان ءداۋىتتىڭ العىسوزىمەن اشىلعان. جازۋشى، دراماتۋرگ، قازاقستاننىڭ ەڭبەك ەرى، مەملەكەتتىك سىيلىقتىڭ لاۋرەاتى  دۋلات يسابەكوۆ، قازاقستان رەسپۋبليكاسى پرەزيدەنتىنىڭ كەڭەسشىسى مالىك نۇرجانۇلى وتارباەۆ، جازۋشى، قازاقستان جازۋشىلار وداعى باسقارماسىنىڭ توراعاسى مەرەكە ابدەشۇلى قۇلكەنوۆ، مەملەكەت جانە قوعام قايراتكەرى دارحان قامزابەكۇلى مىڭباي، قازاقستان رەسپۋبيكاسى پارلامەنتى سەناتىنىڭ دەپۋتاتى دارحان قۋاندىقۇلى قىدىرالى، اقىن، قازاقستانىڭ ەڭبەك سىڭىرگەن قايراتكەرى، قازاقستان رەسپۋبليكاسى پارلامەنتى ءماجىلىسىنىڭ دەپۋتاتى جاناربەك سادىقانۇلى ءاشىمجانوۆ، شىمكەنت قالاسى اكىمىنىڭ ورىنباسارى سارسەن ابايۇلى قۇرانبەك، تۇركىستان وبلىسى اكىمىنىڭ ورىنباسارلارى – بەيسەن داۋلەتۇلى  تاجىباەۆ، ەرتاي كەنجەبەكۇلى التاەۆ، جامبىل وبلىسى اكىمىنىڭ ورىنباسارى سەرىك سالەموۆ، اقىن، قازاقستاننىڭ ەڭبەك سىڭىرگەن قايراتكەرى، حالىقارالىق تۇركسوي تۇركى مادەنيەتى ۇيىمىنىڭ جانىنان قۇرىلعان تۇركى دۇنيەسى جازۋشىلار وداعىنىڭ توراعاسى، مەملەكەتتىك سىيلىقتىڭ لاۋرەاتى ۇلىقبەك ورازبايۇلى ەسداۋلەتوۆ، جازۋشىنىڭ جان جارى قىزداركۇل (قىزدان) پەرنەبايقىزىنىڭ اقجولتاي تىلەكتەرى جاريالانعان. جازۋشى، مەملەكەتتىك سىيلىقتىڭ لاۋرەاتى شەرحان مۇرتازا، جازۋشى، دراماتۋرگ، قازاقستاننىڭ ەڭبەك ەرى، مەملەكەتتىك سىيلىقتىڭ لاۋرەاتى دۋلات يسابەكوۆ، جازۋشىلار - قالي سارسەنباي، كوسەمالى ءساتتىبايۇلىنىڭ مارحابات بايعۇت جايىندا وي-تولعامدارى بەرىلگەن.

جۋرنال جاستار شىعارماشىلىعىنا دا ەدەۋىر ورىن اجىراتىپتى. ماماندىعى - كينوتەلەدراماتۋرگ، وردا بۇزار وتىز جاستاعى جازۋشى  «ماحابباتىم - Constant»، پاراللەل» كىتاپتارىنىڭ اۆتورى الىشەر راحاتتىڭ «ادەبيەتكە كەلۋىمە مارقۇم اپكەمنىڭ كۇندەلىگى اسەر ەتتى» دەپ اتالاتىن سۇحباتى مەن «ۇزدىكسىز اۋەز» اڭگىمەسى جاريالانعان. 26 جاسار اقىن، فيلولوگ، جۋرناليست، قالالىق، وبلىستىق، رەسپۋبليكالىق جىر ءمۇشايرالارى مەن ادەبي بايقاۋلاردىڭ جەڭىمپازى ازامات الىبەكتىڭ «ماحاببات دەگەن - وسىنداي بولادى ەكەن» سۇحباتى مەن «قۇلاپ كەتتىك كوڭىلسىزدەۋ عاسىرعا» تاقىرىبىمەن بەرىلگەن توپتاما ولەڭدەرى دە جۇرەك تەبىرەنتەدى. جازۋشى ارداق ۇسەيىنوۆانىڭ «جالعىز-جارىم» اڭگىمەسى دە اسەرى وقىلادى. اقىن، «مەن تورعايمىن» جىر جيناعىنىڭ اۆتورى مەحريددين وتەگەنوۆتىڭ ولەڭدەرى دە ەلەۋلى. اۋدارماشى، وڭتۇستىك قازاقستان (قازىرگى تۇركىستان) وبلىستىق اۋدارماشىلار بايقاۋىنىڭ گران-پري يەگەرى (2006), «تارازى ءومىر» اتتى تۋىندىسى رەسپۋبليكالىق «التىن قالام» بايقاۋىندا «جىلدىڭ ۇزدىك پروزاسى» اتالىمىن جەڭىپ العان (2019) گۇلنار ىزتاەۆا «ايەل ادام - بيولوگيالىق روبوت» دەگەن تاقىرىپپەن وڭتۇستىككورەيالىق جازۋشى، سەگىز رومان، جيىرما شاقتى اڭگىمە، حيكاياتتىڭ اۆتورى، ءتورت حالىقارالىق سىيلىقتىڭ، سونىڭ ىشىندە بۋكەر سىيلىعىنىڭ (2016), نوبەل سىيلىعىنىڭ  (2024) يەگەرى حان گاننىڭ «ۆەگەتاريان ايەل» شىعارماسىنا تالداۋ جاساعان. ال جازۋشى، اۋدارماشى ليرا قونىس وسى كورەي قالامگەرىنىڭ «يت كويلەك»، «كۇرىش ءبالىش»، «اق» دەگەن موتەك اڭگىمەلەرىن قازاق تىلىنە اۋدارعان.

ەندى جاۋھار جازۋشى جايلى ءوزىمنىڭ جەكە وي-پىكىرىمدى بىلدىرە كەتەيىن. مارحابات بايعۇت اعامىز 70 جانە 75 جاسقا تولعاندا مەرەيتويلىق ماقالا جازعانمىن. قۇداي قالاسا، 80 جىلدىق مەرەيتويىنا وراي دا قالام تارتۋ نيەتىندەمىن.

مارتەبەلى ماحاڭنىڭ رۋحاني ىنىلەرىنىڭ، تالانتتى شاكىرتتەرىنىڭ ءبىرىمىن. كوزى ءتىرى كەزىندە ءوزارا سىيلاستىعىمىز بولعان. ونىڭ قولىنان «شىنايى ءتىل جاناشىرى» سىيلىعىن (نوۋتبۋك) العانمىن. ادىلقازى رەتىندە ادەبي شىعارماشىلىق بايقاۋدا «ميعۇلا» اتتى اڭگىمەمدى جوعارى باعالاعان. «ادەبيەت الەمى» سەرياسىمەن جارىق كورگەن اقىن توقاش بەردياروۆ جايلى جازىلعان «تالانتىمەن تالايدى تامساندىرعان تىلسىم تاعدىر تۋرالى تولعانىستار» اتتى ەستەلىك، ەسسەلەر كىتابىما، جازۋشى، مەملەكەت جانە قوعام قايراتكەرى ق.نايمانباەۆ جايلى جازىلعان «قالىڭ قازاقتىڭ قالداربەگى: قالامگەرلىك، قايراتكەرلىك قاسيەتتەرى» دەپ اتالعان ادەبي-سىن، عىلىمي-زەرتتەۋ ەڭبەگىمە، تۇلكىباستىق تارلانبوز، ات سپورتىنان كەڭەستىك سوتسياليستىك رەسپۋبليكالار وداعى حالىقتارى سپارتاكياداسىنىڭ توعىز دۇركىن چەمپيونى ءابىلحان قاجى داۋىلباەۆ جايلى جازىلعان «بايگە بەرمەس ءباھادۇر» دەگەن دەرەكتى حيكاياتىما ىزگى تىلەككە تولى العىسوز جازعان.

ءسوز سوڭىندا ايتارىمىز، ويلى وقىرمان قاتارى ءبىز دە «مارحابات» جۋرنالىمەن تانىسىپ شىقتىق. رەداكتسيا ۇجىمىنا شىعارماشىلىق تابىس تىلەيمىز!

ءابدىساتتار ءالىپ،

جۋرناليست، اقىن، اۋدارماشى، قازاقستان جۋرناليستەر جانە حالىقارالىق جازۋشىلار وداقتارىنىڭ مۇشەسى، رەسپۋبليكالىق «شىمكەنتىم، شىرايلىم!» ادەبي-كوركەم الماناعىنىڭ باس ديرەتورى - باس رەداكتورى.

شىمكەنت قالاسى

Abai.kz