ءماجىلىس دەپۋتاتى رينات زايتوۆ ۇكىمەت باسشىسى ولجاس بەكتەنوۆتىڭ اتىنا دەپۋتاتتىق ساۋال جولداپ، اۋىلداردى دامىتۋ تۋرالى بىرقاتار ماسەلە كوتەرىپتى.  ءبىز اتالعان دەپۋتتاتتىق ساۋالدى Abai.kz وقىرماندارىنىڭ نازارىنا ۇسىنامىز.

رينات زايتوۆ: 

دەپۋتاتتىق ساۋال قازاقستان رەسپۋبليكاسىنىڭ پرەمەر-ءمينيسترى ولجاس ابايۇلى بەكتەنوۆكە جولدانادى!

– قازاقستان رەسپۋبليكاسى تاۋەلسىزدىك العالى ءتۇرلى سالانىڭ دامۋ باعىتتارىن، وڭىرلەردىڭ وركەندەۋىن كوزدەيتىن باعدارلامالار از بولعان جوق. بىراق سول سالالاردىڭ ىشىندە قايرىمسىز بالاسى قاڭعىرتىپ جىبەرگەن قاريانىڭ كۇنىن كەشكەن ول – ءبىزدىڭ اۋىلدار.

ونى ءوزىڭىز دە جاقسى بىلەسىز. قاجەتتى ينفروقۇرىلىمنىڭ ساپالى مەديتسينا مەن ءبىلىمنىڭ، تۇراقتى جۇمىس پەن تابىستىڭ، ءتىپتى قاراپايىم ينتەرنەتتىڭ جوقتىعىنان 34 جىلدىڭ ىشىندە ءوز تۋعان اۋىلىن امالسىزدىقتان از ادام تاستاعان جوق. سونىڭ سالدارىنان، قانشاما اۋىلىمىز «مۇجىلگەن سۇيەكتەي» مۇشكىل حالگە جەتىپ، جابىلىپ قالدى.

ناقتى ساندارمەن ايتساق، سوڭعى 5 جىلدا شقو-دا 350 اۋىل، سقو-دا 635, پاۆلودار وبلىسى بويىنشا 352 اۋىل بوس قالدى. 2024 جىلدىڭ وزىندە-اق سقو-دا 141 اۋىل مارتەبەسىنەن ايىرىلعان. كوزىڭە ەرىكسىز جاس، كوڭىلگە مۇڭدى كۇمان ۇيالاتاتىن ستاتيستيكا.

بۇل – جاي عانا اۋىلداردىڭ ساندارى ەمەس، مىڭداعان وتباسىنىڭ تۋعان جەرى، ۇشقان ۇياسى، ءومىرىنىڭ تاريحى عوي. اۋىل دەگەن جاي جابا سالاتىن ەسىك ەمەس، قازاقتىڭ التىن بەسىگى ەكەنىن نەگە ۇمىتتىق؟

ءيا، ۇكىمەتتىڭ «اۋىل – ەل بەسىگى» جانە AMANAT پارتياسىنىڭ «اۋىل اماناتى» دەگەن اۋىل تامىرىنا قان جۇرگىزەتىن، ءساتتى باعدارلامالارى ۇسىنىلىپ جاتىر، ولاردى ءتىپتى ەنگىزدى دە. ناتيجەسى دە جامان ەمەس. بىراق ءبىر - ەكى باعدارلاما قازاقستاننىڭ بارلىق اۋىلدارىن گۇلدەندىرىپ جىبەرە المايدى عوي.

كۇنى كەشە عانا مەملەكەت باسشىسى ۇكىمەتتىڭ كەڭەيتىلگەن وتىرىسىنداعى ءوزىنىڭ قورىتىندى سوزىندە: «اۋىلدىق ايماقتاردى جان-جاقتى دامىتۋعا ارنالعان مەملەكەتتىك قولداۋ شارالارىنىڭ ءبارىن ءبىر باعدارلاماعا بىرىكتىرۋ دۇرىس شەشىم بولماق، ياعني «اۋىل اماناتى»، «اۋىل – ەل بەسىگى» جانە تاعى باسقا باعدارلامالار» - تۋرالى اتاپ ءوتتى.

بۇگىن دە اۋىل تۇرعىندارى ءوز كۇنىمەن قانداي دا ءبىر ءىس باستايسىڭ دەسە دە كەدەرگىلەر وتە كوپ، مال باعىپ، ەگىن وسىرەيىن دەسە، جەرى، كاسىپ باستايىن دەسە، قارجىسى، قاجەتتى ينفروقۇرىلىمى دا جوق. تۇرعىندارىن بىلاي قويىپ، اۋىلدىڭ اكىمىندە دە قاراپايىم قاجەتتىلىكتەردى وتەيتىن بيۋدجەتتە تەحنيكا دا، پارمەن دە جوق. اۋىلداردى وسىنداي كۇيگە جەتكىزگەن سوڭ، اۋىل حالقىنا نەگە كوشتىڭ دەپ قاي بەتىمىزبەن ايتامىز؟ «ارقادا اياز بولماسا، ارقار اۋىپ نەسى بار» - دەگەندى ءبارىمىز بىلەتىن شىعارمىز؟

الداعى ۋاقىتتى اباي وبلىسى اياگوز اۋدانىندا دا 10-نان استام اۋىلدى جاپقالى جاتىر ەكەن. ونىڭ الدىن الۋعا تالپىنىپ جاتقان ءبىر لاۋازىمدى تۇلعا جوق. قازاق ءوز تامىرىن ءوزى بالتالاسا، قالاي گۇلدەمەك؟!

جوق، الدە بۇل ارەكەتتەردىڭ ارى جاعىندا حالىقتىڭ ءبارىن ءماجبۇرلى تۇردە قالاعا كوشىرۋ كەرەك دەگەن جىمىسقى ساياسات بار ما؟ اۋىلداردى ساقتاۋ ارەكەتىن قاشان جاسايمىز؟

اۋىل بولماسا قازاق، قازاق بولماسا مەملەكەتتىڭ دە بولمايتىنى انىق قوي.

قۇرمەتتى ولجاس ابايۇلى! وسىنىڭ ءبارىن ەسكەرە كەلە سىزدەن:

1. اۋىل اكىمدەرىنىڭ پارمەنىن كۇشەيتۋدى;

2. ءبىر اۋىلعا ءبىر تەحنيكا، ياعني اۋىلداردى تەحنيكامەن قامتۋدى;

3. بۇل ماسەلەنى ۇلتتىق دەڭگەيگە كوتەرىپ، ۇكىمەت باسشىلىعى جانە وبلىس اكىمدەرى دەڭگەيىندە قونىس اۋدارۋ جونىندەگى مەملەكەتتىك كوميسسيا قۇرۋدى;

4. اۋىلدىق جەرلەرگە جاستاردى تۇراقتاندىرۋ جانە قونىستاندىرۋعا باعىتتالعان جۇمىس جوسپارىن قۇرۋ، ونى اۋىلدىق جاستارعا جەتكىزۋدى ۇسىنامىز.

قۇرمەتپەن، «AMANAT» پارتياسى دەپۋتاتى

Abai.kz