قر ءىىم «سۇڭقار» ارنايى جاساعى دۋبايدا وتكەن SWAT Challenge حالىقارالىق جارىسىندا التىن مەدال جەڭىپ الدى دەپ حابارلايدى BAQ.KZ-كە Abai.kz سىلتەمە جاساپ.

قازاقستاننىڭ ىشكى ىستەر مينيسترلىگىنىڭ «سۇڭقار» ارنايى جاساعى بىرىككەن اراب امىرلىكتەرىندە (دۋباي) وتكەن SWAT Challenge حالىقارالىق جارىسىندا باس جۇلدەنى يەلەندى. ءبىزدىڭ جاۋىنگەرلەر ەڭ جوعارى ناتيجە كورسەتىپ، جالپىكوماندالىق ەسەپتە ءبىرىنشى ورىنعا شىقتى.

قازاقستاندىق باسقا ارنايى جاساقتار – «ارىستان»، «ساردار» جانە «ارلان» دا ۇزدىك ناتيجە كورسەتىپ، جارىستىڭ توپ-10 قاتارىنا ەندى. «سۇڭقار» ارنايى جاساعى جارىستىڭ ءبىرىنشى كەزەڭىن 1 مينۋت 34 سەكۋندتا اياقتادى. وسى ۋاقىت ىشىندە ولار كەدەرگىلەردەن ءوتىپ، نىسانالاردى ءدال كوزدەپ، شارتتى تۇتقىنداردى بوساتتى. بۇل كورسەتكىشكە تەك قىتايلىق كوماندالار جاقىنداي الدى، بىراق ايىرماشىلىق وتە از بولدى.

بۇل ارنايى جاساقتار ءۇشىن وزدەرىنىڭ دايىندىقتارىن كورسەتۋگە تاماشا مۇمكىندىك. مەملەكەت باسشىسىنىڭ جانە ۇكىمەتتىڭ قولداۋىنىڭ ارقاسىندا ولارعا ۇلكەن كوڭىل بولىنەدى. ولار ارنايى جابدىقتارمەن، قارۋ-جاراقپەن قامتاماسىز ەتىلگەن جانە لاڭكەستىككە قارسى وپەراتسيالاردى ءساتتى وتكىزۋ ءۇشىن كۇشەيتىلگەن دايىندىقتان وتەدى، - دەدى قر ىشكى ىستەر ءمينيسترىنىڭ ورىنباسارى، ۇلتتىق ۇلاننىڭ باس قولباسشىسى انساعان بالتابەكوۆ.

بيىلعى جىلى قازاقستاننان العاش رەت ايەلدەر قۇراماسى – «توميريس» قاتىسىپ وتىر. بۇل كومانداعا ەلىمىزدىڭ ءار وڭىرىنەن ەڭ ۇزدىك ارنايى جاساق جاۋىنگەرلەرى ىرىكتەلدى.

كوماندا اتاۋىن ءوزىمىز تاڭدادىق. سەبەبى توميريس – جاۋىنگەر قىز. ءبىز وسىلايشا قازاقستاندىق ايەلدەردىڭ نەگە قابىلەتتى ەكەنىن كورسەتكىمىز كەلدى، - دەيدى كوماندا كاپيتانى ايناعۇل بايجىگىتوۆا.

SWAT Challenge حالىقارالىق جارىسىنا 80-نەن استام ەلدەن 106 كوماندا قاتىسۋدا. قازاقستان 12 ارنايى بولىمشەمەن ۇسىنىلعان. ولاردىڭ قاتارىندا ۇلتتىق قاۋىپسىزدىك، مەملەكەتتىك كۇزەت قىزمەتى جانە ايماقتىق پوليتسيا دەپارتامەنتتەرى بار. جارىس ءالى ءتورت كۇن بويى جالعاسادى.

Abai.kz