ۋكراينانىڭ قاتىسۋىنسىز سوعىستى توقتاتۋ بويىنشا اقش پەن رەسەي اراسىندا كەلىسسوزدىڭ ءجۇرۋى قاۋىپتى. ۋكراينا باسشىسى ۆلاديمير زەلەنسكي Associated Press اگەنتتىگىنە بەرگەن سۇحباتىندا وسىلاي دەپ مالىمدەدى.

بۇعان دەيىن اقش پرەزيدەنتى دونالد ترامپ ماسكەۋمەن ماسەلەنى تالقىلاعانىن مالىمدەگەن، بىراق وعان ناقتى كىم قاتىسقانىن ايتپاعان.

"ولاردىڭ ءوز قارىم-قاتىناسى بولۋى مۇمكىن، الايدا ۋكراينانى ءبىزسىز تالقىلاۋ – بارلىعىنا قاۋىپتى" دەدى زەلەنسكي. ونىڭ سوزىنشە، رەسەي مەن ۋكراينا اراسىنداعى كەلىسسوزدەرگە اقش-تان بولەك ەۋرووداق وكىلدەرى دە قاتىسۋى كەرەك.

زەلەنسكيدىڭ ايتۋىنشا، ونىڭ كومانداسى ترامپتىڭ اينالاسىنداعى ادامدارمەن جالپى دەڭگەيدە بايلانىستا وتىر جانە جاقىن ارادا جاي-جاپسارىن تالقىلاۋ ءۇشىن جەكە كەزدەسۋلەر دە وتكىزبەك.

ترامپتىڭ ۋكراينا بويىنشا ارنايى ۋاكىلى كيت كەللوگتىڭ قاڭتار ايىنداعى كيەۆكە جوسپارلانعان ساپارى بۇعان دەيىن زاڭنامالىق ماسەلەلەرگە بايلانىستى كەيىنگە شەگەرىلگەن ەدى.

زەلەنسكيدىڭ ويىنشا، رەسەيمەن كەز كەلگەن كەلىسىم ۋكراينانىڭ وداقتاستارىنىڭ قاۋىپسىزدىك كەپىلدىگىمەن قامتاماسىز ەتىلۋى كەرەك. ول ۋكراينانىڭ ناتو-عا قوسىلۋ ماسەلەسىنە بۇرىنعىشا باسىمدىق بەرەتىنىن، مۇنى اقش-قا دا ءتيىمدى قاۋىپسىزدىكتىڭ "ەڭ ارزان جولى" دەپ اتادى.

زەلەنسكي سونىمەن بىرگە رەسەي اتىستى توقتاتۋ تۋرالى كەلىسسوزگە قۇلىقتى ەمەس جانە بۇعان دەيىن ايتقان تالاپتارىنان دا باس تارتۋعا نيەتتى ەمەس، سەبەبى مۇنى جەڭىلىس رەتىندە قابىلداۋى مۇمكىن دەدى. ال مايدان دالاسىندا ۋكراينا اسكەر تاپشىلىعىن سەزىنىپ وتىرعان شاقتا ولار باسىمدىققا يە بولىپ وتىر.

زەلەنسكيدىڭ سوزىنشە، ۋكراينانىڭ 800 مىڭدىق ارمياسى ناتو ءۇشىن ءىرى بونۋس بولماق، اسىرەسە ترامپ شەتەلدەگى امەريكالىق اسكەردى ەلگە قايتارۋعا تىرىسىپ جاتقان كەزدە مۇنىڭ ماڭىزى ارتا تۇسەدى.

زەلەنسكيدىڭ پىكىرىنشە، ترامپ رەسەيدىڭ ەنەرگەتيكاسى مەن بانك سەكتورىنا قارسى سانكتسيانى كۇشەيتەمىز جانە كيەۆكە اسكەري كومەكتى ۇلعايتامىز دەپ ءپۋتيندى كەلىسسوز ۇستەلىنە وتىرۋعا ماجبۇرلەي الادى.

Abai.kz