دونالد ترامپ اقش بۇدان بىلاي ناتو وداقتاستارىنىڭ كومەگىنە مۇقتاج ەمەس ەكەنىن مالىمدەدى:

«ناتو-داعى وداقتاستارىمىزدىڭ باسىم بولىگى تاياۋ شىعىستاعى يراننىڭ تەرروريستىك رەجيمىنە قارسى اسكەري وپەراتسيامىزعا قاتىسقىسى كەلمەيتىنىن بىزگە حابارلادى. سوعان قاراماستان، ءىس جۇزىندە بارلىق ەلدەر ءبىزدىڭ ارەكەتتەرىمىزبەن جانە يراننىڭ ەشبىر جاعدايدا يادرولىق قارۋعا يە بولماۋى كەرەكتىگىمەن تولىق كەلىسەدى.

بۇل مەنى تاڭعالدىرمايدى، ويتكەنى مەن ارقاشان ناتو-نى بىرجاقتى قوزعالىس جۇيەسى دەپ سانادىم. ءبىز وسى ەلدەردى قورعاۋ ءۇشىن جىلىنا جۇزدەگەن ميلليارد دوللار جۇمسايمىز، بىراق ولار بىزگە قايتارىم رەتىندە ەشتەڭە جاسامادى. اسىرەسە، بۇل وتە قاجەت بولعان ساتتە.

باقىتىمىزعا وراي، ءبىز يراننىڭ اسكەري الەۋەتىنە كۇيرەتە سوققى بەرىپ ۇلگەردىك. ولاردىڭ فلوتى مەن اسكەري-اۋە كۇشتەرى جويىلدى، اۋە شابۋىلىنا قارسى قورعانىس جانە راديولوكاتسيالىق جۇيەلەرى ىستەن شىقتى. ەڭ باستىسى — ولاردىڭ بارلىق جوعارعى شەندى باسشىلارىنىڭ كوزى جويىلدى. ەندى ولار ەشقاشان بىزگە دە، تاياۋ شىعىستاعى وداقتاستارىمىزعا دا، بۇكىل الەمگە دە قاۋىپ توندىرە المايدى.

ءبىزدىڭ اسكەري تابىستارىمىزدى ەسكەرسەك، بىزگە ناتو ەلدەرىنىڭ كومەگى بۇدان بىلاي قاجەت ەمەس. ول بىزگە ەشقاشان كەرەك بولعان دا ەمەس. بۇل جاپونيا، اۆستراليا جانە وڭتۇستىك كورەياعا دا قاتىستى.

الەمدەگى ەڭ قۋاتتى مەملەكەت — اقش پرەزيدەنتى رەتىندە ايتارىم — ءبىز ەشكىمنىڭ كومەگىنە مۇقتاج ەمەسپىز!»، — دەپ جازدى ول Truth Social الەۋمەتتىك جەلىسىندە.

ايتا كەتەيىك، وسىعان دەيىن ترامپ ورمۋز بۇعازىنىڭ قاۋىپسىزدىگىن قامتاماسىز ەتۋ ءۇشىن ناتو ەلدەرىنەن جانە جاپونيا مەن وڭتۇستىك كورەيدان كومەك سۇراپ، كواليتسيا قۇرۋدى ۇسىنعان.

الايدا:

- ۇلىبريتانيا پرەمەر-ءمينيسترى كير ستارمەرمەن ورمۋز بۇعازىنا اسكەري كەمەلەر جىبەرۋدەن باس تارتىپ، كومەكتىڭ بالامالى جولىن ىزدەپ جاتقانىن ايتقان.

- جاپونيا بولسا، اقش-تان وپەراتسياعا قاتىسۋ تۋرالى رەسمي سۇرانىس تۇسپەگەنىن ايتتى. پرەمەر-مينيستر ساناە تاكايتي توكيونىڭ كەمەلەر مەن ەكيپاج مۇشەلەرىنىڭ ءومىرىن قورعاۋ جولدارىن قاراستىرىپ جاتقانىن، بىراق ەل زاڭناماسى مۇنداي وپەراتسيالارعا قاتىسۋعا ايتارلىقتاي شەكتەۋ قوياتىنىن ايتتى.

- فرانتسيا مەن وڭتۇستىك كورەي دە سوعىستىڭ بەلگىسىز مەرزىمگە سوزىلىپ كەتۋىنەن قورقىپ، اسكەري كەمەلەرىن جىبەرۋگە دايىن ەمەس.

- گەرمانيا ورمۋز بۇعازىنداعى كەز كەلگەن اسكەريلەندىرىلگەن ميسسياعا قاتىسپايتىنىن اشىق ءبىلدىردى. «بۇل ءبىزدىڭ سوعىس ەمەس. ونى ءبىز باستاعان جوقپىز»، - دەدى.

Abai.kz