«ءاربىر وقۋشىنىڭ ءبىلىم الىپ، جان-جاقتى دامۋى ءۇشىن قولايلى جاعداي جاسالۋعا ءتيىس. سول ءۇشىن «جايلى مەكتەپ» ۇلتتىق جوباسى قولعا الىندى»، - قاسىم-جومارت توقاەۆ، قازاقستان رەسپۋبليكاسىنىڭ پرەزيدەنتى.

2022 جىلى مەملەكەت باسشىسى قازاقستان حالقىنا جولداۋىندا «جايلى مەكتەپ» ۇلتتىق جوباسىن جۇزەگە اسىرۋدى تاپسىردى. جوبا اياسىندا 2025 جىلدىڭ سوڭىنا دەيىن 460 مىڭ ورىندىق 217 زاماناۋي مەكتەپتىڭ قۇرىلىسى جوسپارلانعان، ونىڭ ىشىندە 105 مەكتەپ 2024 جىلى سالىندى.

«جايلى مەكتەپ» ۇلتتىق جوباسى بالالاردىڭ تۇرعىلىقتى جەرىنە قاراماستان، زاماناۋي تالاپتارعا ساي كەلەتىن تەگىن ءبىلىم الۋ مۇمكىندىگىن قامتاماسىز ەتۋگە باعىتتالعان.

باستاما جايلى مەكتەپتەردىڭ ماتەريالدىق-تەحنيكالىق بازاسىن جاقسارتىپ قانا قويماي، بالالاردىڭ شىعارماشىلىق جانە ينتەللەكتۋالدى قابىلەتتەرىن دامىتۋعا ىقپال ەتەتىن ورتا قالىپتاستىرادى.

جايلى مەكتەپتەردىڭ كولەمى تيپتىك مەكتەپتەرگە قاراعاندا، 15-20%-عا كەڭ، سونداي-اق تەحنيكالىق جاراقتانۋى دا 4 ەسە ارتىق. مەكتەپتەردە روبوتوتەحنيكا كابينەتتەرى، STEM-زەرتحانالار، حورەوگرافيا زالدارى، كوۆوركينگ ايماقتارى، 4 سپورت زالى قاراستىرىلعان، سونداي-اق العاشقى اسكەري دايىندىق ءۇشىن ارنايى اشىق الاڭدار جابدىقتالادى. باستاۋىش جانە جوعارى سىنىپ وقۋشىلارى بولەك بلوكتاردا ءبىلىم الادى. جايلى مەكتەپتەردەگى ەڭ باستى جايلىلىق -  ەرگونوميكالىق كەڭىستىكتىڭ قۇرىلۋى.

جايلى مەكتەپتەردە ينكليۋزيالىق ءبىلىم بەرۋگە ەرەكشە كوڭىل بولىنۋدە. ەرەكشە ءبىلىم بەرۋ قاجەتتىلىكتەرى بار بالالار ءۇشىن جەكە سانيتارلىق بولمەلەرىمەن كەڭ كابينەتتەر قاراستىرىلعان. سونىمەن قاتار مەكتەپتەردە جەدەلساتى، پاندۋستار، ارنايى بەلگىلەر، پسيحولوگ، لوگوپەد جانە دەفەكتولوگ كابينەتتەرى بار.

جايلى مەكتەپتىڭ ەرەكشەلىگى سوندا، ءار بلوكتا وقۋشىلار مەن پەداگوگتەر ءۇشىن دەمالىس ايماقتارىن كورۋگە بولادى. مۇندا جۇمساق جيھازدار، كىتاپتار، مۋزىكالىق اسپاپتارمەن ۇستەل ويىندارى قويىلعان.

مەكتەپتەر سونىمەن قاتار زاماناۋي بەينەباقىلاۋ جانە مەكتەپكە كىرىپ-شىققانداردى قاداعالاۋ جۇيەلەرىمەن قامتاماسىز ەتىلەدى.

جوبانىڭ نەگىزگى مىندەتتەرىنىڭ ءبىرى - وقۋ پروتسەسىندە جاڭا تەحنولوگيالار مەن ادىستەمەلەردى مەڭگەرگەن بىلىكتى پەداگوگيكالىق كادرلارمەن قامتاماسىز ەتۋ.

بۇدان بولەك، ەلىمىزدە 510 مىڭ وقۋشى ورنىنا  ارنالعان 422 مەكتەپ سالىنىپ، رەكوردتىق كورسەتكىشكە قول جەتكىزىلدى.  بۇل 32 اپاتتى جانە 71 ءۇشاۋىسىمدى مەكتەپ ماسەلەسىن شەشىپ، ەل اۋماعىنداعى 200 مەكتەپتە وقۋشى ورنى تاپشىلىعىن جويۋعا مۇمكىندىك بەردى.

ءبىلىم بەرۋ ينفراقۇرىلىمىن قولداۋ قورىنىڭ جەلىسى بويىنشا 100 مىڭعا جۋىق وقۋشى ورنىنا ارنالعان 89 مەكتەپتىڭ قۇرىلىسى قارجىلاندىرىلدى.

2024 جىلى 80 مىڭنان استام پەداگوگ بىلىكتىلىكتى ارتتىرۋدىڭ تەگىن كۋرستارىنان ءوتتى.

وقۋشى ورىندارىنىڭ تاپشىلىعى، ءۇشاۋىسىمدى وقىتۋ جانە اپاتتىق مەكتەپتەر ماسەلەسىن شەشۋ، سونداي-اق قالالار مەن اۋىلدار اراسىنداعى ءبىلىم بەرۋ ينفراقۇرىلىمى ساپاسىنىڭ ايىرماشىلىعىن ازايتۋ ماقساتىندا ەلىمىزدە مەكتەپ قۇرىلىسىن جۇرگىزۋ جانە رەنوۆاتسيالاۋ بويىنشا باستامالار قارقىندى ىسكە اسىرىلۋدا.

2025 جىلى 300 مىڭ ورىندىق 200-گە جۋىق مەكتەپتىڭ قۇرىلىسى جۇزەگە اسىرىلادى.

«اۋىل مەكتەپتەرىن زياتكەرلىك، سونداي-اق قوعامدىق ورتالىق رەتىندە دامىتۋ ماڭىزدى. «مەكتەبى بار اۋىلدا تىرشىلىك بار» دەپ بەكەر ايتىلماعان»، -  قاسىم-جومارت توقاەۆ، قر پرەزيدەنتى.

مەملەكەت باسشىسىنىڭ تاپسىرماسى بويىنشا جىل سايىن اۋداندىق جانە اۋىلدىق 1000 مەكتەپ جاڭعىرتىلۋدا.

بۇگىنگى تاڭدا ورتا ءبىلىم بەرۋ ۇيىمدارىنىڭ 67%-ىن (5236 مەكتەپ) اۋداندىق جانە اۋىلدىق مەكتەپتەر قۇرايدى، ونىڭ ىشىندە 4 مىڭ مەكتەپ جاڭعىرتىلدى.

تاياۋداعى ءۇش جىل ىشىندە ەلىمىزدىڭ بارلىق وڭىرىندە 1231 مەكتەپتى رەنوۆاتسيالاۋ جوسپارلانۋدا، ونىڭ ىشىندە 820 مەكتەپ اۋىلدىق جەرلەردە ورنالاسقان. رەنوۆاتسيا مەكتەپتەردىڭ ماتەريالدىق-تەحنيكالىق بازاسىن جاقسارتۋعا، يننوۆاتسيالىق ءبىلىم بەرۋ تەحنولوگيالارىن ەنگىزۋگە جانە پەداگوگتەردىڭ بىلىكتىلىگىن ارتتىرۋعا مۇمكىندىك بەرەدى.

بۇل شارالار حالىقتىڭ تۋعان جەرىنەن تابان اۋدارىپ، قالاعا جاپپاي كوشۋ ماسەلەسىن دە شەشەدى.

ەلىمىزدىڭ بارلىق وڭىرىندە جاڭا ءبىلىم بەرۋ نىساندارىن سالۋ ارقىلى قوسىمشا جۇمىس ورىندارى قۇرىلۋدا، بۇل الەۋمەتتىك، ەكونوميكالىق جاعدايدى جاقسارتۋعا جانە جالپى قۇرىلىس سالاسىن دامىتۋعا ىقپال ەتەدى. 2024 جىلدان باستاپ جاڭا سالىنعان مەكتەپتەردە 5000-عا جۋىق پەداگوگ جۇمىسپەن قامتىلدى.

ۇلتتىق جوبانىڭ تاعى ءبىر ماڭىزدى باعىتتارىنىڭ ءبىرى - قازاقستاندىق تاۋارلار مەن قىزمەتتەردى وندىرۋشىلەردى قولداۋ بولىپ تابىلادى.

جاڭا مەكتەپتەرگە بارلىق جيھازداردى وتاندىق كاسىپورىندار جەتكىزەدى. بۇل ۇلتتىق ەكونوميكانى نىعايتۋعا جانە قازاقستاندىق وندىرۋشىلەردىڭ جاڭا جۇمىس ورىندارىن قۇرۋىنا، ەلدەگى ەكونوميكالىق تۇراقتىلىققا، جەرگىلىكتى ونەركاسىپتى دامىتۋعا ىقپال ەتەدى.

زاماناۋي فورماتتاعى مەكتەپتەر بارلىق قازاقستاندىق بالالاردىڭ قولجەتىمدى ءارى جايلى، قاۋىپسىز ورتادا ساپالى ءبىلىم الۋىنا جول اشادى.

Abai.kz