اقش پرەزيدەنتى دونالد ترامپ: «اقش گازا سەكتورىن ءوز باقىلاۋىنا الادى جانە يەلىك ەتەدى»، - دەپ مالىمدەدى. بۇل مالىمدەمە يزرايل پرەمەرى بينيامين نەتانياحۋدىڭ اقش-قا ساپارى كەزىندە ايتىلدى.

سوزبە-ءسوز: «اقش گازا سەكتورىن ءوز باقىلاۋىنا الىپ يەلىك ەتەتىن بولادى. ءبىز وندا ءبىرسىپىرا جۇمىستار جۇرگىزەمىز. بارلىق جارىلماعان بومبالار مەن جارىلعىش زاتتاردى زالالسىزداندىرۋ بويىنشا جۇمىستار بار. سەكتوردى قيراعان عيماراتتاردان تازارتامىز. گازانىڭ ەكونوميكاسىن قالىپقا كەلتىرىپ، جاڭا تۇرعىن ۇيلەر سالامىز. كوپتەگەن جۇمىس ورىندارى اشىلادى»، - دەدى ترامپ.

ول تاعى: «گازا «تاياۋ شىعىستىڭ ريۆەراسىنا» اينالۋى مۇمكىن»، - دەپ قوستى. ترامپ گازا سەكتورىنىڭ قاۋىپسىزدىگىن قامتاماسىز ەتۋ ءۇشىن اقش اسكەرىن جىبەرۋى مۇمكىن ەكەنىن ايتتى. ترامپ ءوز سوزىندە: «پالەستينالىقتاردى گازا سەكتورىنان كەتۋدەن باسقا تاڭداۋ جوق بولادى»، - دەدى. ال گازادان قۋىلعان پالەستينالىقتاردى يوردانيا مەن مىسىر قابىلداۋى كەرەك-مىس.

ترامپتىڭ بۇل سوزدەرى ازىرگە الەم جۇرتىنىڭ قارسىلىعىنا تاپ كەلدى. سولاردىڭ ءبىرسىپىراسى:

ساۋديا ءسىم-ءى: «ساۋد ارابياسى پالەستينالىقتاردى ءوز جەرىنەن كۇشتەپ كوشىرۋدىڭ كەز كەلگەن ارەكەتىنە قارسى. ءبىزدىڭ پوزيتسيا ايقىن»، - دەدى.

گەرمانيا ءسىم-ءى: «گازا سەكتورى پالەستينالىقتارعا تيەسىلى. ولاردى كۇشتەپ كوشىرۋ – حالىقارالىق قۇقىققا قايشى»، - دەدى.

ۇلىبريتانيا ءسىم-ءى: «ءبىز ءاردايىم ەكى مەملەكەت قۇرۋ دەگەن ۇستانىمدا بولدىق. پالەستينالىقتار ءوز وتانىندا، گازا سەكتورىندا جانە باتىس جاعالاۋدا بەيبىت ءومىر ءسۇرۋى كەرەك»، - دەدى.

فرانتسيا ءسىم-ءى: «فرانتسيا گازا سەكتورىنان پالەستينالىقتاردى كۇشتەپ كوشىرۋگە ءۇزىلدى-كەسىلدى قارسى»، - دەدى.

يسپانيا ءسىم-ءى: «يسپانيانىڭ ۇستانىمى مىناۋ – گازا – پالەستينانىكى. گازا حالقى گازادا قالۋى كەرەك»، - دەدى.

مىسىر ءسىم-ءى: «گازا حالىقىن كۇشپەن كوشىرمەۋ كەرەك. قايتا پالەستينا باسشىسىمەن اقىلداسىپ، سەكتوردى قايتا قالىپقا كەلتىرۋگە ۇمتىلۋ كەرەك»، - دەدى.

قىتاي ءسىم-ءى: «قىتاي سەكتوردا ۇرىس قيمىلدارىن توقتاتۋ شەڭبەرىندە ەكى مەملەكەت قۇرىلۋى ءتيىس دەگەن ۇستانىمنان باس تارتپايدى»، - دەدى.

تۇركيا ءسىم-ءى: «پرەزيدەنت ترامپتىڭ سوزدەرى اقىلعا قونىمسىز. گازادان پالەستيالىقتاردى قۋاتىن كەز كەلگەن ارەكەت ايماقتاعى احۋالدى ۋشىقتىرادى»، - دەدى.

يرلانديا ءسىم-ءى: «ءبىزدىڭ ۇستانىم – ەكى مەملەكەتتىڭ قۇرىلۋى. پالەستينا مەن يزرايل حالىقتارى ءوز مەملەكەتتەرىندە بەيبىت ءومىر سۇرۋگە قۇقىلى»، - دەدى.

پالەستينا پرەزيدەنتى ماحمۇد ابباس: «پالەستينا ءوز جەرىنەن ەشقاشان باس تارتپايدى. گازا – شىعىس يەرۋساليم مەن باتىس جاعالاۋ سەكىلدى، پالەستينانىڭ اجىراماس بولىگى»، - دەدى.

قازاقستاننىڭ پوزيتسياسى گازا سەكتورىنداعى سوعىس باستالعان ۋاقىتتا بىرنەشە كەزەك ايتىلعان. ول – ەكى مەملەكەت قۇرىلۋى ءتيىس دەگەن ۇستانىم.

Abai.kz