قىرعىزستاننىڭ ۇلتتىق قاۋىپسىزدىك كوميتەتى (ۇقمك) «كەنەسارى حان مەن ورمان حانعا قاتىستى» قازاق اقپاراتىنا پىكىر بىلدىرگەن قىرعىز ءانشىسى قايرات پريمبەرديەۆتىڭ ۇستىنەن قىلمىستىق ءىس قوزعادى. بۇل تۋرالى قىرعىز باق-تارى جازدى.

قىرعىز ۇقمك مالىمەتىنشە، قايرات پريمبەرديەۆ قازاقستاندىق «Airan» YouTube-ارناسىنا بەرگەن سۇحباتىندا «ۇلتارالىق ارازدىقتى، ەتنيكالىق وشپەندىلىكتى قوزدىراتىن» سوزدەر ايتقان. ازىرگە، قىرعىز ۇقمك-سى ءانشى پريمبەرديەۆتىڭ قولىنا «ەلدەن شىقپاۋ» تۋرالى شەكتەۋ قاعازىن ۇستاتقان.

قايرات پريمبەرديەۆ – قىرعىزستاننىڭ ەڭبەك سىڭىرگەن ءارتىسى. ول «Airan» YouTube-ارناسىنا بەرگەن سۇحباتىندا كەنەسارى حاننىڭ باسىن الۋ وقيعاسىن قوزعاپ، وسى جاعداي ءۇشىن قازاق حالقىنان ءوز اتىنان كەشىرىم سۇراعان بولاتىن.

«ورمون حان كەنەسارى حاننىڭ باسىن الۋعا ءماجبۇر بولدى. مەن ءوز اتىمنان قازاق حالقىنان وسى وقيعا ءۇشىن كەشىرىم سۇراعىم كەلەدى. بۇل وقيعا مەن ءۇشىن دە اۋىر، ءتىپتى كوزىمە جاس كەلەدى. ءبىز كەنەسارى حاننىڭ باسىن ءوز ەلىنە جەتكىزىپ، قۇران وقىپ، وسى وقيعاعا قاتىستى رەنىشتى جويۋىمىز كەرەك»، – دەپ اعىنان جارىلعان بولاتىن.

وسىدان سوڭ كۇللى قىرعىز جۇرتى ورە-تۇرەگەلىپ، ءانشى پريمبەرديەۆتى جەردەن الىپ، جەرگە سالدى. اتالعان سۇحباتقا قاتىستى قىرعىزستاننىڭ مادەنيەت مينيسترلىگى (ۆيتسە-مينيستر مارات تاگاەۆ) دە پىكىر ءبىلدىرىپ، ءانشىنى ايىپتاعان ەدى. مارات تاگاەۆ ءوز سوزىندە: «پريمبەرديەۆ «قازاق پروپوگانداسىنىڭ» جەتەگىنە ەردى. ورمان حان قىرعىز جەرىن قورعادى. قىرعىزدار ورمان حان ءۇشىن ۇياتتى بولىپ، ول ءۇشىن كەشىرىس سۇرايتىن ءجونى جوق»،-دەپ سويلەگەن.

ەل ىشىندەگى قاتاڭ ايىپتاۋلاردان كەيىن پريمبەرديەۆ مالىمدەمە جاساپ، اقتالا سويلەگەن.

«قۇرمەتتى دوستار، مەن 1845 جىلى كەنەسارى حاننىڭ قىرعىزداردىڭ جەرىنە جاساعان شابۋىلدارى، ورمون حاننىڭ نەگە ونىڭ باسىن كەسىپ تاستاعانى تۋرالى اڭگىمە قوزعادىم. مەن ورتاق اقپاراتپەن ءبولىستىم. مەن رەداكتسياعا تولىق بەينەنى جىبەرۋدى سۇرادىم، سەبەبى قازىر وتانداستارىمنىڭ اراسىندا تۇسىنىسپەۋشىلىك پايدا بولدى. مەن ءسىزدىڭ نەگە اشۋلانعانىڭىزدى تۇسىنەمىن. بالكىم، بۇل بەينەدە ءسىزدىڭ ماقتانىشىڭىزعا اسەر ەتەتىن ساتتەر بار شىعار. بىراق مەنىڭ سوزدەرىم جاقسى نيەتپەن ايتىلدى. ءبىز ءبىر رەت ءومىر ءسۇرىپ جاتىرمىز، ال ءبىزدىڭ حالىقتارىمىز مىڭداعان جىلدار بويى كورشىلەس بولىپ تۇرىپ جاتىر. ءبىز قىرعىزدار، ۇلى جانە كەڭ پەيىلدى حالىقپىز. مەن ءوز اتىمنان كەشىرىم سۇرادىم»،-دەپ جازعان ءانشى.

كەنەسارى حاننىڭ ءولىمى تۋرالى الىپ قاشپا اڭگىمەلەرگە ءوز كوزقاراسىن بىلدىرگەن ءانشىنىڭ ەكى وتتىڭ اراسىندا قالعانى وتە وكىنىشتى. جالعان نامىستىڭ جارعا جىعاتىنىن قىرعىp-قازاق قوعامى ءالى دۇرىس تۇسىنبەي وتىرعان ءتارىزدى. ونىڭ وتكەن عاسىرداعىداي ەكى باۋىرلاس ەلدى ءوزارا قىرقىستىرعان تەرىستىك كورشىمىزگە عانا ۇپاي اكەلەتىنىن باعامداي بىلمەسە كەرەك.

Abai.kz