كەزدەسۋدە قازاقستان مەن رەسەيدىڭ ءتۇرلى باعىتتاعى ەكىجاقتى سەرىكتەستىگى جانە وڭىرلىك قاۋىپسىزدىك بويىنشا ىنتىماقتاستىق ماسەلەلەرى تالقىلاندى.

«– ءسىزدىڭ ساپارىڭىز ەكى ەل اراسىنداعى ىنتىماقتاستىقتى نىعايتۋ تۇرعىسىنان اسا ماڭىزدى دەپ سانايمىن. قارىم-قاتىناسىمىز قارقىندى دامىپ كەلەدى. بۇل رەتتە رەسەي فەدەراتسياسى پرەزيدەنتىنىڭ بىلتىر قاراشا ايىندا قازاقستانعا جاساعان مەملەكەتتىك ساپارى ايرىقشا مانگە يە. ەلدەرىمىزدىڭ ەكونوميكالىق بايلانىستارى تابىستى ىلگەرىلەپ كەلە جاتىر. 171 جوبا بويىنشا ۋاعدالاستىققا قول جەتكىزدىك. ونىڭ ىشىندە 50-دەن استام جوبا جۇزەگە اسىرۋدىڭ سوڭعى كەزەڭىنە جەتتى. بۇگىندە رەسەي قازاقستان ەكونوميكاسىنىڭ نەگىزگى ينۆەستورلارىنىڭ بىرىنە اينالدى. مەملەكەتتەرىمىزدىڭ قۇقىق قورعاۋ ورگاندارى، اسكەري ۆەدومستۆولارىنىڭ اراسىنداعى بايلانىس تا ويداعىداي وركەندەيدى دەپ سانايمىن. مەنىڭ ويىمشا، ءسىزدىڭ ساپارىڭىز ەكىجاقتى ىقپالداستىعىمىزعا شولۋ جاساپ، ءوزارا ءىس-قيمىلدىڭ جاڭا باعىتتارى بويىنشا كەلىسىمگە كەلۋگە وڭتايلى مۇمكىندىك بەرەدى»، – دەدى مەملەكەت باسشىسى.

رەسەي قاۋىپسىزدىك كەڭەسىنىڭ حاتشىسى كەزدەسۋگە جانە وڭىرلىك قاۋىپسىزدىككە قاتىستى وزەكتى ماسەلەلەردى تالقىلاۋعا مۇمكىندىك جاساعانى ءۇشىن قازاقستان پرەزيدەنتىنە العىس ايتتى.

«– باۋىرلاس حالىقتارىمىزدىڭ، ەلدەرىمىزدىڭ اراسىندا قالىپتاسقان قارىم-قاتىناسقا ۇنەمى جوعارى دەڭگەيدە قولداۋ كورسەتىلەدى. تاۋار اينالىمى مەن بىرلەسكەن جوبالاردىڭ اۋقىمى قوماقتى. ارينە، ءبىزدىڭ بايلانىستارىمىز تەك ەكىجاقتى قارىم-قاتىناسپەن شەكتەلمەيدى. ءبىز شانحاي ىنتىماقتاستىق ۇيىمى، ۇقشۇ، تمد جانە ەاەو اياسىندا بەلسەندى جۇمىس اتقارىپ كەلەمىز. قازاقستاننىڭ باستاماسىمەن قولعا الىنعان جوبالار تابىستى ءارى بەلسەندى ىسكە اسىرىلىپ جاتىر»، – دەدى سەرگەي شويگۋ.

كەزدەسۋدە ەكى ەلدىڭ قاۋىپسىزدىك سالاسىنداعى ىقپالداستىعىنىڭ تيىمدىلىگىن ارتتىرۋ ماسەلەسى قاراستىرىلدى.

بۇعان دەيىن قاسىم-جومارت توقاەۆ استاناعا رەسمي ساپارمەن كەلگەن تاجىكستاننىڭ سىرتقى ىستەر ءمينيسترى سيرودجيددين ءمۋحريدديندى قابىلداعان ەدى.

Abai.kz