شاكارىمنىڭ باسىنا تۇسكەن اۋىرتپالىق عافۋر ولىمىنەن باستالعانى حاق. شاكارىم عافۋرعا جوقتاۋ ارناپ، قىزى گۇللارعا حاتپەن جازىپ جىبەرەدى. بۇل جوقتاۋ ۇزاق بولسا كەرەك، ونى گۇللار مەن عافۋردىڭ قىزى كەزەك-كەزەك داۋىستاپ، سۇڭقىلداپ ايتىپتى، – دەيدى.

اقىندىق قابىلەتى بار گۇللار اكەسى جازىقسىز وققا ۇشقاندا دا جوقتاۋ ولەڭىن شىعارعان. قازىرگى تاڭدا 46 شۋماعى ساقتالعان.

ابزال قارسارتوۆ ەش جازىعى جوق، جاپان تۇزدە شىعارماشىلىقپەن اينالىسىپ جۇرگەن شاكارىمدى اتقىزىپ قانا قويماي، شىڭعىستاۋ اۋدانىندا، قازىرگى قاراۋىل توبەسى مەن قازىرگى مەدەۋ، بۇرىڭعى مولداعاليەۆ اتىنداعى كەڭشار بولعان جەردە لاگەر ۇيىمداستىرىپ، وعان شاكارىمنىڭ بالالارى قابىش، قىزى گۇللار، ابايدىڭ قىزى گۇلبادان تاعى باسقا بالالارىن قاماپ، كۇنى-ءتۇنى قيناپ جاۋاپ العان. اكە تاعدىرى جاس جۇرەگىنە قاياۋ ءتۇسىرىپ، ءارى تۇرمەنىڭ قيىنشىلىقتى ازابىن كورگەن، ابدەن جابىرلەنگەن گۇللار ۋ ءىشىپ، جارىق ومىرمەن قوشتاسۋعا بەت بۇرادى. بىراق ونى دەر كەزىندە بايقاعان ابايدىڭ قىزى كۇلبادان جانتالاسا جۇگىرىپ، ءبىر قويشىنىڭ ۇيىنە بارىپ، ءسۇت اكەلىپ ىشكىزىپ، گۇللاردى امان الىپ قالادى. گۇللار ابزال تۇرمەسىنەن ازەر بوساپ، جاسىرىن تۇردە الماتى جاققا ءوتىپ كەتكەن.

گۇللاردىڭ بالاسى فاتيح شەشەسى جايلى مىناداي ەستەلىك ايتادى: “مەنىڭ انامدا دا مىنەز بولعان. جاسىندا وتە ەركە، تىك مىنەزدى، ايتقانىنان قايتپايتىن بولىپتى. ءومىر بويى سول قايسار مىنەزىنەن تانباعان ول ەشقانداي ماقتاۋدى سۇيمەيتىن ەدى”.

گۇللار شاكارىمقىزى كەيىن قاراپايىم تىرشىلىك ەتتى. كەڭەس ۇكىمەتىنىڭ رەپرەسسيا ماشيناسى ونىڭ دارىنىن تۇمشالاپ، تاعدىرىن تاپتاپ ءوتتى. الايدا، گۇللار قازاق قىزىنا ءتان قايسارلىقپەن اكەسىنىڭ زور مۇراتىن قۇرمەتتەي ءبىلدى. اكە وسيەتىنە ادال بولدى. اكەسىنىڭ حالىق ءۇشىن جارالعان جان ەكەنىن جانە قاسيەتتى ويلارىنىڭ تەرەڭ تاعدىرلىق ماڭىزىن ءبىر ولەڭمەن عانا ايتىپ كەتتى.

گۇللار الماتى وبلىسى، كالينين اتىنداعى كەڭشارىندا تۇرىپ، 1970 جىلى قايتىس بولدى. كۇيەۋى ۇلى وتان سوعىسىندا قازا تاپقان. گۇللاردىڭ بالالارى: ۇلى فاتيح، قازىر كاسىپكەر، ونىڭ جوعارى ءبىلىمدى قىزدارى گۇلميرا مەن روزا تۇرمىستا. جيەندەرى، نەمەرەلەرى الماتىدا تۇرادى.

مۇرات راقىمجان

Abai.kz