ءۇش جىلعا جالعاسقان ۋكراينا-رەسەي سوعىسى توقتاۋدان، ەكى تاراپ بەيبىت كەلىسىمگە كەلۋدەن بۇرىن ۋكراينانىڭ قازبا بايلىقتارىنىڭ تاعدىرى شەشىلۋدە.

ۋكراينانىڭ سيرەك مەتاللدار قورىنىڭ ءبىرىنشى بولىپ اق ۇيگە قايتا ورالعان ترامپتىڭ كوز قۇرتىنا اينالعان بەلگىلى. ول بايدەن بيلىگى ۋكرايناعا بەرگەن نەشە ميلليارد دوللارلىق قايتارىمسىز كومەگىن ەۋروپانىڭ قايتارىمدى كومەگىمەن سالىستىرىپ، «ادىلەتسىز» دەپ سيپاتتاپ، «500 ميلليارد دوللار» دەپ ەسەلەپ كورسەتىپ، زەلەنسكيگە ونىڭ بوداۋىنا قازبا بايلىقتارىن بەرۋدى ۇسىنعان.

ەكى تاراپ بۇل ماسەلەدە بەت جىرتىسۋعا دەيىن باردى. كەشەلى-بەرى ەكى تاراپ تا ءبىر مامىلەگە كەلگەنىن، جۇما كۇنى زەلەنسكيدىڭ ترامپپەن كەزدەسىپ كەلىسىمگە قول قوياتىنىن حابارلادى.

جاڭا كەلىسىم-شارتتا زەلەنسكيدى شوشىتقان 500 ميلليارد اۋىزعا الىنبادى. ەكى تاراپتىڭ قازبا بايلىقتان تۇسكەن اقشانى ورتاق قوردا ساقتايتىنى، ول ءوز كەزەگىندە ۋكراينانى قالپىنا كەلتىرۋگە جۇمسالاتىنى ايتىلدى. اقش قوردىڭ پايداسىنان عانا ۇلەس الماق. زەلەنسكي مەن ترامپ راقايلاسىپ، جەر اشارىنىڭ ارعى بەتىندە ەمەن-جارقىن كەزدەسىپ جاتسا، كرەملدە پۋتين تىنىش وتىرسىن با؟

24 اقپاندا ۆلاديمير پۋتين اقش-قا پايدالى قازبا بويىنشا ارىپتەستىك ۇسىنۋعا دايىن ەكەنىن جەتكىزىپ، رەسەي سيرەك جەر مەتالل قورى جاعىنان الەمدە كوشباسشى ەكەنىن العا تارتتى. ءپۋتيننىڭ مالىمدەمەسىنەن كەيىن ترامپ تا رەسەيمەن بۇل ماسەلە بويىنشا كەلىسىمدى قولدايتىنىن ايتتى.

بۇگىن زەلەنسكيدىڭ اق ۇيگە ساپارى قارساڭىندا امەريكانىڭ ەكى شەنەۋنىگى مەن جاعدايدان حابارى بار تاعى ءبىر دەرەككوزگە سۇيەنگەن NBC News ارناسى: «ماسكەۋ ۆاشينگتونعا ۋكراينانىڭ رەسەي باسىپ العان اۋماقتارىندا ورنالاسقان سيرەك جەر مينەرالدارى مەن باسقا دا باعالى مەتالدارعا مەنشىك قۇقىعىن بەرۋ تۋرالى كەلىسىمدى ۇسىندى»، – دەپ حابارلادى.

دەرەككوزدەردىڭ ايتۋىنشا، مۇنداي ۇسىنىستى وتكەن اپتادا ساۋد ارابياسىنداعى كەزدەسۋ كەزىندە ۆلاديمير ءپۋتيننىڭ جوعارى لاۋازىمدى كومەكشىلەرى مەن دونالد ترامپ اكىمشىلىكتەرىنىڭ وكىلدەرى تالقىلاعان.

كەزدەسۋدە ۋكراينانىڭ دونەتسك جانە زاپوروجە وبلىستارىنىڭ وككۋپاتسيالانعان بولىكتەرىندەگى مينەرال رەسۋرستاردى يگەرۋ بويىنشا ستسەناريلەر قاراستىرىلعان. «ترامپ اكىمشىلىگى پايدالى قازبا بويىنشا رەسەيمەن كەلىسىم جاساۋ مىندەتتەمەسىن الماعان، بىراق ونى تولىق جوققا شىعارعان جوق»، – دەيدى اقش تەلەارناسى.

اقش پەن ۋكراينا پايدالى قازبانى يگەرۋ بويىنشا كەلىسىمگە 28 اقپاندا قول قويۋدى جوسپارلاپ وتىر. جۇما كۇنى ۋكراينا باسشىسى ۆلاديمير زەلەنسكي ۆاشينگتونعا بارماق. قۇجات قايتا قالپىنا كەلتىرۋ ينۆەستيتسيالىق قورىن قۇرۋدى قاراستىرادى. زەلەنسكي تالاپ ەتكەن ۋكراينانىڭ قاۋىپسىزدىك كەپىلدىگى تۋرالى اشىق ايتىلمادى.

Abai.kz