قىلمىستىق توپ قىرعىزستانعا 102 مىڭ توننا مۇناي ونىمدەرىن زاڭسىز شىعارعان.

«تۇركسىب» ستانتسياسىندا زاڭسىز جولمەن جونەلتىلگەن 500 تونناعا جۋىق بەنزين تيەلگەن 8 تەمىرجول تسيستەرناسى انىقتالدى. جۇك «قارا ماي ويل» شاعىن مۇناي وڭدەۋ زاۋىتىنان جونەلتىلگەن جانە قىرعىزستانعا باعىتتالعان. بۇل تۋرالى قارجى مونيتورينگى اگەنتتىگى حابارلادى.

كۇدىكتىلەر قازاقستان اۋماعىندا بەنزيندى ەرىتكىش جانە ديستيلليات رەتىندە راسىمدەپ، جالعان قۇجاتتار ارقىلى شەكارادان زاڭسىز وتكىزگەن.

تەرگەۋ مالىمەتتەرىنە سايكەس، 2023-2024 جىلدارى اتالعان شاعىن زاۋىتتان 102 مىڭ توننادان استام مۇناي ونىمدەرى كورشى ەلگە ەكسپورتتالعان. قىلمىستىق توپتىڭ كولەڭكەلى اينالىمى سوڭعى ەكى جىلدا 15,5 ملرد تەڭگەدەن اسىپ ءتۇستى.

ءۇش كۇدىكتىگە مەملەكەتارالىق ىزدەۋ جاريالاندى. ولارعا «قاماققا الۋ» تۇرىندەگى بۇلتارتپاۋ شاراسى تاڭدالدى.

Abai.kz