«ءبىزدىڭ قالا – ءبىزدىڭ ماقتانىشىمىز»: الماتىدا 5000 اعاش وتىرعىزىلادى.

الماتىدا 1 ناۋرىز بەن 1 ءساۋىر ارالىعىندا «تازا قازاقستان» رەسپۋبليكالىق باعدارلاماسى اياسىندا «الماتى – ءبىزدىڭ ورتاق ءۇيىمىز» اتتى اۋقىمدى قالالىق ناۋقان وتەدى. بۇل ناۋقان قالا ينفراقۇرىلىمىن جاڭارتۋ مەن جاقسارتۋعا، ەكولوگيالىق مادەنيەتتى ارتتىرۋعا جانە تۇرعىنداردى قالانى دامىتۋعا تارتۋعا باعىتتالعان.

سۋرەت: almaty.kz سايتىنان الىندى.

«قۇرمەتتى تۇرعىندار! «الماتى – ءبىزدىڭ ورتاق ءۇيىمىز»، ال ءار ۇيدە تازالىق پەن جايلىلىق بولۋى كەرەك. ارقايسىڭىزدى وزىنەن كەيىن قوقىس قالدىرماۋعا، تابيعاتتى ايالاۋعا جانە تازالىق ساقتاۋعا شاقىرامىن. ءبىزدىڭ ناۋقانعا اتسالىسىڭىزدار! قالامىز بارشاعا ۇلگى بولسىن! الماتىعا دەگەن قامقورلىقتارىڭىز بەن سۇيىسپەنشىلىكتەرىڭىز ءۇشىن راحمەت!» – دەپ ۇندەۋ جاسادى الماتى قالاسى اكىمىنىڭ ورىنباسارى الىشەر ابدىقادىروۆ.

«الماتى – ءبىزدىڭ ورتاق ءۇيىمىز» ناۋقانى قالاداعى بارلىق اۋداندى قامتيدى. چەللەندج، بايقاۋ، ەكو-كۆەست جانە فلەشموب سياقتى ءتۇرلى ءىس-شاراعا ءاربىر الماتىلىق پەن قالا قوناعى قاتىسا الادى.

سۋرەت: almaty.kz سايتىنان الىندى.

سونداي-اق، ناۋقان بارىسىندا ەكولوگيالىق اكتسيالار وتەدى. ولاردىڭ قاتارىندا جۇگىرۋ مەن قوقىس جيناۋدى بىرىكتىرەتىن پلوگگينگ، مەكتەپ جانە بالاباقشا وقۋشىلارى اراسىندا پلاستيك قاقپاقتارىن جيناۋعا ارنالعان «مەيىرىمدى قاقپاق» باستاماسى، قالدىقتاردان ونەر تۋىندىلارىن جاساۋعا باعىتتالعان «قوقىستى ونەرگە اينالدىر» بايقاۋى، پلاستيك بوتەلكەلەردى قايتا وڭدەۋگە تاپسىرۋعا ارنالعان Plastic Reboot, جارامدىلىق مەرزىمى وتكەن ءدارى-دارمەكتەردى جيناۋ جانە تاعى باسقا ءىس-شارالار بار.

سۋرەت: almaty.kz سايتىنان الىندى.

«بىلتىر باستالعان ەكولوگيالىق باستامالاردى جالعاستىرىپ، قالامىزدى ودان ءارى تازا ءارى جايلى ەتۋگە تالپىنامىز. 2024 جىلى الماتىدا جاڭا كورىكتەندىرۋ ەرەجەلەرى بەكىتىلىپ، 6 مىڭنان استام كاسىپكەرلىك نىسانى ءۇشىن كورىكتەندىرۋ تولقۇجاتتارى جۇيەسى ەنگىزىلدى. قازىرگى تاڭدا 4918 تولقۇجات راسىمدەلدى، بۇل جوسپاردىڭ 82%-ىن قۇراپ وتىر. تولقۇجاتتاۋ ىرگەلەس اۋماقتارعا، ونىڭ ىشىندە عيمارات قاسبەتتەرى، تروتۋارلار، جاسىل ايماقتار جانە باسقا دا نىساندار ءۇشىن جاۋاپكەرشىلىكتى ناقتىلاۋعا مۇمكىندىك بەرەدى»، – دەدى الماتى قالاسى اكىمىنىڭ ورىنباسارى بەيبىت شاحانوۆ.

سۋرەت: almaty.kz سايتىنان الىندى.

ناۋقان ءتورت تاقىرىپتىق اپتاعا بولىنگەن:

• «تازا كوشەلەر» (1–9 ناۋرىز) – ايالدامالار مەن جول بەلگىلەرىن تازالاۋ، قوقىس جاشىكتەرىن ورناتۋ، ماگيسترالداردى كوركەيتۋ.
• «تازا ساياباقتار، سكۆەرلەر مەن تاۋلار» (10–16 ناۋرىز) – تابيعي ايماقتاردا سەنبىلىكتەر وتكىزۋ جانە قوقىس جيناۋ شارالارى.
• «تازا اۋلالار» (17–23 ناۋرىز) – «ۇزدىك كوممۋنالدىق قىزمەتكەر» بايقاۋى، قورشاۋلار مەن كوركەيتۋ ەلەمەنتتەرىن، بالالار جانە سپورت الاڭدارىن بوياۋ (20–29 ناۋرىز ارالىعىندا).
• «ءبىزدىڭ قالا – ءبىزدىڭ ماقتانىشىمىز» (24 ناۋرىز–1 ءساۋىر) – ەسكەرتكىشتەردى كوركەيتۋ جانە جاپپاي اعاش وتىرعىزۋ.

سۋرەت: almaty.kz سايتىنان الىندى.

ناۋقان اياسىندا قالا ينفراقۇرىلىمىن تولىقتاي رەتكە كەلتىرۋ، 4 مىڭنان استام اۋلا اۋماعىن تازالاۋ، 445 ساياباق پەن سكۆەردە سەنبىلىك وتكىزۋ، وزەن جاعالاۋلارىن تازارتۋ، 12 مىڭعا دەيىن انتيۆاندالدىق قوقىس جاشىكتەرىن ورناتۋ، 600-دەن استام زاڭسىز ورناتىلعان نىسانداردى بۇزۋ، سونداي-اق 5000 اعاش پەن بۇتا وتىرعىزۋ جوسپارلانعان.

تولىق اقپارات almaty.kz سايتىندا جاريالانادى.

Abai.kz