الەۋمەتتىك جەلىدە ەر ادامنىڭ ءبىر قولىمەن اۋەجاي قىزمەتكەرىنىڭ شاشىنان ۇستاپ، ەكىنشى قولىمەن اينالاسىنا پىشاقپەن سەس كورسەتىپ جاتقانى بايقالاتىن ۆيدەو تارادى.  

ەر ادام ۆيدەودا باسقالارعا «جاقىنداماڭدار» دەپ قورقىتادى. ۆيدەو 7 ناۋرىزدا الماتى اۋەجايىندا تۇسىرىلگەن دەپ ايتىلدى. الماتى اۋەجايىنىڭ ءباسپاسوز قىزمەتى وقيعانى راستادى. 

وقيعا 7 مينۋتقا سوزىلعان. ىزىنشە ودان سۋىق قارۋ تاركىلەنىپ، ۇستالعان. «ساعات 11:45-تە جولاۋشى كەيپىندەگى ەر ادام ىشكى تەرمينالداعى تەكسەرىس ايماعىنا جاقىندادى. اۆياتسيا قاۋىپسىزدىگى قىزمەتىنىڭ وكىلدەرى ەر ادامنان قۇجاتتارىن كورسەتۋدى سۇراعان كەزدە ول قىزمەتكەردى شاشىنان ۇستاپ الىپ، پىشاقپەن قورقىتا باستادى. 7 مينۋتتان كەيىن ەر ادام قارۋسىزداندىرىلدى. قازىرگى ۋاقىتتا ەر ادام جەلىلىك پوليتسيا بولىمىندە»، - دەپ حابارلادى اۋەجاي وكىلدەرى (ازاتتىق راديوسى). 

الماتى اۋەجايىندا قىلمىسكەردى ۇستاۋعا كومەكتەسكەن ەر ادام مەملەكەتتىك ناگراداعا ۇسىنىلادى. پرەزيدەنتتىڭ ءباسپاسوز حاتشىسى جەلىدەگى پاراقشاسىندا وسىلاي دەپ جازدى. 

«پرەزيدەنت قىلمىسكەردىڭ سۋىق قارۋىن تارتىپ الىپ، ۇستاۋعا كومەكتەسكەن ەر ادامنىڭ باتىلدىعىن ەرەكشە اتاپ ءوتىپ، اتالعان ازاماتتى مەملەكەتتىك ناگراداعا ۇسىنۋدى تاپسىردى»، - دەدى ءباسپاسوز حاتشىسى.  

كوزاچكوۆ تەلەگرام-ارناسىنىڭ جازۋىنشا، ول پوليتسيا قىزمەتكەرى ەمەس – وقيعا ورنىنا كەزدەيسوق تاپ بولعان جانە [قىزمەتكەردى بوساتىپ]، ءوزىن كەپىلدىككە الۋدى ۇسىنعان. ۆيدەودا ونىڭ پىشاقتى ۇشكىر جاعىنان جىلدام تارتىپ العانى كورىنەدى. 

Abai.kz