ۇيىقتاپ تۇرعان كيىممەن كۇنى بويى جۇرە بەرۋدى شىعاردىم، وزىمە كوڭىل ءبولۋدى قويدىم، 2-3 كۇنگە دەيىن جۋىنبايتىن بولدىم، سالماق بولسا 75 كەلىگە جەتتى. ونى ايتاسىز، ءتىستى دە جۋمايتىن بولدىم، ءتىپتى ءومىر سۇرگىم كەلمەدى… دەپرەسسيا…

مىنا ءتۇرىمدى كورگەن جاپون قۇربىم مەنى ءبىر كلينيكاعا الىپ كەلدى. ايتۋىنشا، مۇندا ءبىر كەرەمەت پروتسەدۋرا بار ەكەن، ودان كەيىن ومىرگە جاڭا كەلگەندەي بولادى ەكەنسىڭ. توكيونىڭ قاق ورتاسىندا ورنالاسقان كلينيكاعا كيىم دە اۋىستىرماستان، سول بەتى ۇيدە جۇرگەن كيىممەن، اياققا ءۇي سۇيرەتپەمدى ءىلىپ كەلدىم. شاشىمدى توبەگە تۇيە سالعام. جاپونيادا ەشكىم ءۇستى-باسىڭا قارامايدى. ءبارى ەركىن. جالاڭاش جۇرەسىڭ بە، ءبارىبىر. اركىم وزىمەن ءوزى الەك.

سونىمەن قويشى، كلينيكاعا كەلدىك، ءبىر قاعازدارعا قول قويدىق. ايتقان جەرگە كىرسەم بولمەنىڭ قاق ورتاسىندا تابىت تۇر.

دارىگەر ماعان بىرنەشە سۇراق قويدى، سوسىن سوڭعى ساپاردا كيەتىن ارنايى كيىمدى بەردى دە، “كيىنىپ، تابىتقا جاتىڭىز، ولگەن ادامنىڭ نە سەزىنەتىنىن سەزىنىڭىز، شىققىڭىز كەلگەندە مىنا تۇيمەنى باساسىز، ءبىز ءسىزدى شىعارىپ الامىز” دەدى. مەن ايتقانىن ىستەپ تابىتقا جاتتىم. ءىشى قىپ-قىزىل اتلاستان جاسالعان ەكەن، جايلى كورىندى. تابىتقا حوش ءيىس سەۋىپ قويعانىنىمەن ءبىرتۇرلى ءيىس بولدى.

جاتىپ الىپ ءىشىن زەردەلەپ جاتىرمىن. ءبىر كەزدە قوشتاسۋ ءانى ورىندالا باستادى. تابىتتىڭ كىشكەنتاي تەسىگىنەن بولمەدەگى ءالسىز جارىق كورىنىپ تۇردى. ءبىر ۋاقىتتا مەنى كوتەرىپ الىپ، كولىككە سالىپ جاتقانىن سەزدىم. شوشىپ كەتىپ، جانۇشىرا جاڭاعى ايتقان تۇيمەنى باستىم، تۇيمە باسقان ساتتە سىنىپ قالدى. مەندە زارە جوق، الاسۇرىپ ايعايلاپ، ولاردى كومەكككە شاقىرا باستادىم. ەستىگەن ادام جوق. “بۇلارىڭ نە، اقشانى بۇل ءۇشىن تولەگەم جوق” دەپ بۇلقىنىپ، ويبايلاپ جاتىرمىن. ءلام ميم.

10 مينۋتتاي جول جۇردىك.

مەن بولسام دەم جەتپەي تۇنشىعا باستادىم. ءبىر كەزدە “تۇسىرىڭدەر!” دەگەن بۇيرىق ەستىلدى. سالدەن سوڭ مەنى جىپپەن جەر استىنا ءتۇسىرىپ جاتقانىن سەزدىم. تابىتتىڭ ۇستىنە توپىراق لاقتىرىپ جاتقانىن دا ەستىپ جاتىرمىن. ولاردىڭ داۋىسى بىرتە-بىرتە الىستاپ، ەستىلمەي بارادى. سۇمدىق-اي، مەنى كومىپ جاتىر! الاسۇرىپ بار داۋىسىممەن ايعايلاي باستادىم. اۋزىما كەلگەندى ايتىپ، ورىسشالاپ بوقتاپ جاتىرمىن. ەندى قايتپەكپىن، تىرىدەي كومىپ جاتىر ەمەس پە؟!

باسىما ميلليون وي كەلدى. مۇمكىن مەن سەكتانتتاردىڭ قولىنا تۇسكەن شىعارمىن..

ولار مەنى تىرىدەي كومىپ، ولتىرمەكشى. شەتەلدىكتەردى جەككورەتىن سەكتانتتار شىعار.. مۇمكىن جاپون قۇربىم ولارمەن سىبايلاس شىعار.. وڭباعان!

ەستيتىن دە، توقتايتىن دا تۇرلەرى جوق. مەنى شىنىمەن تىرىدەي كومىپ جاتىر. جىندى ادامشا الاسۇرىپ، اياعىممەن تابىتتى تەپكىلەي باستادىم. بارىنەن قورقىنىشتىسى اۋا جەتپەي، تۇنشىعا باستاعانىم. ويبايلاپ، بار داۋىسىممەن جىلاي بەردىم. تار تابىتتا قوزعالا المايمىن. كوز جاسىم بەتىمدى جۋىپ، قۇلاعىما تامشىلاپ اعىپ جاتتى. قاتتى قورىققاننان بۇتىما دا جىبەرىپ قويدىم...

بۇل سۇمدىقتى سوزبەن ايتىپ جەتكىزۋ قيىن. نە قوزعالا المايسىڭ، نە دەمالا المايسىڭ. اۋاسى جوق تار قاپاس. سەنى ەشكىم ەستىمەيدى.

“قۇدايىم، مەنىڭ ولگىم كەلمەيدى” دەپ جىلاپ، وعان جالبارىنا باستادىم. اۋا جەتپەي باسىم اينالا باستادى. جەردىڭ استى سونداي سۋىق ەكەن عوي دەگەن وي سۋماڭ ەتتى، قاتىپ قالدىم.

وكىرىپ جىلاۋمەن بولدىم..

ءبىر كەزدە السىرەپ، ەسىمدى جوعالتا باستادىم. بۇل سۇمدىقتى سيپاتتاۋعا ءتىل جەتپەيدى. گوگول ەسىمە ءتۇسىپ كەتتى، ول بيشارا مەن سياقتى تىرىدەي كومىلىپ، ولگەن ەكەن عوي، دەدىم.

كوز الدىمنان بۇكىل ءومىرىم زىر ەتىپ، وتە شىقتى. قىزىمدى تۋعانىم، قولىما العانىم، ونىڭ العاش ءتاي-ءتاي باسقانى، مەن كۇندە ورەتىن بۇرىمدارى…. قۇدايىم- اي، مەن دەپرەسسيا دەپ ءجۇرىپ، قىزىما كوڭىل ءبولۋدى ۇمىتقان ەكەم عوي. اناما حابارلاسۋدى دا قويىپپىن. ءومىردىڭ سونداي عاجاپ ەكەنى ەسىمە ءتۇستى. ءومىر نەتكەن ءتاتتى، قانداي تاماشا ەدى!

ال مەن تابىتتا جاتىرمىن. مەنى ءولتىرىپ جاتقان سونشا قۇرمەتتەيتىن جاپوندارىم ەكەنىنە سەنە الار ەمەسپىن. ەە، جاپوندار-اي. ..

ءولۋ دەگەن وسى ەكەن عوي دەپ جاتقانىمدا كەنەت تابىتتىڭ بەتى اشىلدى.

قاراسام، سول بولمەدەمىز. ەشقايدا شىقپاعانبىز دا، ەشكىم كومبەگەن دە. ءوڭىم بە، ءتۇسىم بە دەپ اجىراتا الماي، ەسەڭگىرەپ تۇرعاندا الگىلەر كەلدى. قۇربىم كۇلەدى. مەن ولاردى ابدەن بوقتاپ، تاعى جىلادىم. جىلاماعاندا شە، جاڭا عانا جەتى قات جەردىڭ استىندا تابىتتا جاتساڭ…. ءتىرى ەكەم عوي!!!

ولار مەنى ازەر دەگەندە ۋاتىپ الدى. بولعان نارسەنىڭ ءبارى - جەرلەۋدىڭ يلليۋزياسى ەكەن، باعاناعى ادام شوشىرلىق ارەكەتتىڭ ءبارىن كومپيۋتەر جاساعان. ولار تابىتتىڭ ىشىنە كامەرا قويعان ەكەن، سودان مەنى باقىلاپ وتىرىپتى، كەيىن جازىلعان بەينەنى وزىمە بەردى.

وسى جاعدايدان كەيىن مەن ارىقتاپ، ادەمىلەنىپ كەتتىم. ءومىر سۇرۋگە قۇلشىنىسىم ارتتى، ءومىردى ودان سايىن ءسۇيدىم. قازىر دەپرەسسيا، ءومىر سۇرگىم كەلمەيدى دەگەن بوتەن وي كىرىپ تە شىقپايدى. جوق. ول جاققا بارعىم كەلمەيدى. مەن وسىندا جانە تۋرا قازىر ءومىر سۇرگىم كەلەدى.

سولاي، دوستار! ءومىردى سۇيىڭدەر!

اۆتورى نازىم وساكا

اۋدارعان جانار شامەل

Abai.kz