استاناداعى مەكتەپتەر مەن كوللەدجدەردە «وقيتىن مەكتەپ» جوباسى اياسىندا 2023 جىلدان «8 مينۋتتىق وقۋ» جوباسى جۇزەگە اسىرىلىپ كەلەدى. بۇگىن دە ەلوردالىق وقۋشىلار مەن ستۋدەنتتەر ساباقتارىن كىتاپ وقۋدان باستادى، دەپ حابارلادى ەلوردا اكىمدىگىنىڭ رەسمي سايتى.

ايتا كەتۋ كەرەك، بۇل ءىس-شارا ۇلتتىق كىتاپ كۇنى اياسىندا ۇيىمداستىرىلىپ، كىتاپ وقۋ مادەنيەتىن دارىپتەۋگە باعىتتالدى.

ۇيىمداستىرۋشىلاردىڭ ايتۋىنشا، بۇگىندە بۇل جوبا استاناداعى 112 مەملەكەتتىك مەكتەپ پەن 9 كوللەدجدى قامتىپ وتىر. جوبا بارلىق جاس ەرەكشەلىگىندەگى ءبىلىم الۋشىلارعا – باستاۋىش سىنىپ وقۋشىلارىنان باستاپ كوللەدج ستۋدەنتتەرىنە دەيىن باعىتتالعان. مەكتەپتەردەگى جوبا وقۋدىڭ نەگىزگى داعدىلارىن دامىتۋعا، ءماتىندى ءتۇسىنۋ قابىلەتىن ارتتىرۋعا جانە كۇندەلىكتى كىتاپ وقۋعا داعدىلاندىرۋعا باعىتتالعان. ال كوللەدج ستۋدەنتتەرى ءۇشىن كاسىبي باعىتتاعى ماتىندەر ۇسىنىلىپ، بۇل ولاردىڭ سىني ويلاۋ قابىلەتى مەن اقپاراتتى تالداۋ داعدىلارىن دامىتادى.

جوبا بارلىق ءبىلىم بەرۋ ۇيىمىندا ءبىرىزدى فورماتتا جۇزەگە اسىرىلادى: ءار كۇن 8 مينۋتتىق وقۋدان باستالادى. ادەبيەتتەر ءبىلىم الۋشىلاردىڭ جاس ەرەكشەلىگىنە ساي تاڭدالادى.

«وقۋشىلار كۇندەلىكتى 07.45-تە مەكتەپكە كەلەدى، ال 07.50-دە 8 مينۋتتىق وقۋ باستالادى. باستاۋىش سىنىپتاعىلاردىڭ وقۋىنا ارنالعان ەرتەگىلەر ءار سىنىپتىڭ بۇرىشىندا ورنالاسقان. ال جوعارى سىنىپتىڭ وقۋشىلارى وزدەرىنىڭ كۇندەلىكتى وقىپ جۇرگەن ادەبيەتتەرىن الىپ كەلىپ وقيدى. اي اياقتالعان كەزدە قورىتىندى بويىنشا ەرتەگىلەردەن قويىلىم قويادى، سۋرەتتەر سالادى، ال جوعارى سىنىپ وقۋشىلارى وزدەرى وقىعان كىتاپتار بويىنشا جوبا جۇمىسىن جاساپ، قورعايدى. ونىڭ بارلىعى سىنىپ جەتەكشىلەرىنىڭ ۇيىمداستىرۋىمەن جۇرگىزىلەدى. كەيدە بالالاردىڭ وقىپ جاتقان كىتاپتارىنا قاراپ، تانىمال جازۋشىلار مەكتەپكە شاقىرىلىپ، كەزدەسۋ وتكىزىلەدى»، – دەدى اتالعان جوبا تۋرالى №8 مەكتەپ-ليتسەيدىڭ ديرەكتورى گۇلنۇر ايتىموۆا.

ايتا كەتەيىك، جوبانىڭ نەگىزگى ماقساتى – وقۋعا دەگەن قىزىعۋشىلىقتى ارتتىرىپ، جان-جاقتى دامىعان، مادەنيەتى جوعارى تۇلعانى قالىپتاستىرۋ.

Abai.kz