مەملەكەت باسشىسى قاسىم-جومارت توقاەۆ بۇگىن قازاقستان حالقى اسسامبلەياسىنىڭ ءحححىV سەسسياسىندا ءسوز سويلەپ، ەلىشىلىك ءھام ەلارالىق بىرقاتار ماسەلەلەرگە توقتالدى. ۇلتارالىق بىرلىك پەن تاتۋلىقتى ساقتاۋ مەن حالىقارالىق ساياساتتاعى تۋربولەنتتىلىك كەزەڭىندە ەلىمىزدىڭ سىرتقى ساياساتتاعى ۇستانىمدارىن اتاپ ايتتى. سونىڭ ىشىندە، زامانىندا تاعدىردىڭ جازۋىمەن شەتەلگە كەتكەن قازاقتار جايلى دا ءسوز قوزعادى.

ءبىز ءوز كەزەگىمىزدە، قازاق كوشىنىڭ، شەتتەگى قانداستاردىڭ شىن جاناشىرى، اقىن، قوعام قايراتكەرى اۋىت مۇقيبەكتىڭ پىكىرىن وقىرمان نازارىنا ۇسىنامىز...

اۋىت مۇقيبەك:

— بۇگىن قازاقستان حالقى اسسامبلەياسىنىڭ ءحححىV سەسسياسى ءوتتى. پرەزيدەنتىمىز قاسىم-جومارت توقاەۆ اتالعان سەسسياعا قاتىسىپ، تاريحي ءسوز سويلەدى.

اسسامبلەيامەن قاتار، قاسىم-جومارت كەمەلۇلى: «قازاقستان – تاعدىردىڭ جازۋىمەن شەتتە تۋىپ، شەتتە وسكەن بارشا قازاقتىڭ تاريحي وتانى. شەتەلدەگى قازاقتاردىڭ باسىم كوپشىلىگى انا ءتىلى مەن اتا ءداستۇرىن بەرىك ۇستانىپ كەلەدى»، - دەپ شەكارا سىرتىندا قالعان قانداستارىن دا ەسكە الدى. ناقتىلاپ ايتاق، ەسكە سالدى.

اتقارۋشى بيلىك پەن زاڭ شىعارۋشى ورگان تۇسىنە بىلسە، بۇل قاسىم-جومارت كەمەلۇلىنىڭ ۇلى كوش تۋرالى جاساعان يشاراسى ەكەنى انىق. ال، بۇل يشارانى كىم قالاي قابىلدايدى جانە قالاي تۇسىنەدى، ول ەندى سول ادامنىڭ ۇلتتىق سانا-سەزىمىنىڭ دەڭگەيىنە قاتىستى ماسەلە!

قازاقستان رەسپۋبليكاسىنىڭ كونستيتۋتسياسىنا ساي، سەناتتىڭ ون دەپۋتاتىن، ونىڭ ىشىندە بەسەۋىن قازاقستان حالقى اسسامبلەياسىنىڭ ۇسىنىسى بويىنشا رەسپۋبليكا پرەزيدەنتى تاعايىندايدى. دەمەك، قازاقستان حالقى اسسامبلەياسى — وسىنداي بيىك مارتەبەگە يە ۇيىم. مۇنداي مارتەبە ەلىمىزدەگى ەشبىر ۇيىمدا جوق!

سونىمەن بىرگە، «قازاقستان حالقى اسسامبلەياسى تۋرالى» زاڭنىڭ 6-بابىنداعى «دەموگرافيا جانە كوشى-قون سالاسىنداعى جوسپارلار مەن ءىس-شارالاردى ازىرلەۋگە جانە ىسكە اسىرۋعا قاتىسۋ»، سونداي-اق، «شەت ەلدەردەگى قازاق دياسپوراسىنا انا ءتىلىن، مادەنيەتى مەن ۇلتتىق داستۇرلەرىن ساقتاۋ جانە دامىتۋ، ونىڭ تاريحي وتانىمەن بايلانىستارىن نىعايتۋ ماسەلەلەرىندە قولداۋ كورسەتۋ» – اسسامبلەيا قىزمەتىنىڭ نەگىزگى باعىتتارى رەتىندە كورسەتىلگەن. بىراق، نەگە ەكەنى بەلگىسىز، قازاقستان حالقى اسسامبلياسى وزىنە بەرىلگەن بۇل مۇمكىندىكتى ءوز دەڭگەيىندە پايدالانىپ جۇرگەن جوق.

قالاي دەسەك تە، پرەزيدەنت شەتتەگى قانداستارىن ۇمىتقان جوق، بۇگىن بارشا الەمنىڭ الدىندا ولار تۋرالى ايتىپ كەلە جاتقان تاريحي ءسوزىن تاعى قايتالادى…

Abai.kz