«اقوردا» رەزيدەنتسياسىندا قازاقستانعا رەسمي ساپارمەن كەلگەن ابۋ ءدابيدىڭ تاق مۇراگەرى شەيح حالەد بەن مۇحاممەد بەن زايد ءال ناحاياندى سالتاناتتى قارسى الۋ ءراسىمى ءوتتى.

قاسىم-جومارت توقاەۆ پەن شەيح حالەد بەن مۇحاممەد بەن زايد ءال ناحايان ءبىر-بىرىنە دەلەگاتسيا مۇشەلەرىن تانىستىردى. قۇرمەت قاراۋىلىنىڭ باستىعى راپورت بەرگەن سوڭ قازاقستان مەن بىرىككەن اراب امىرلىكتەرىنىڭ مەملەكەتتىك ءانۇراندارى شىرقالدى.

مەملەكەت باسشىسى ابۋ ءدابيدىڭ تاق مۇراگەرى حالەد بەن مۇحاممەد ءال ناحايانمەن كەلىسسوز جۇرگىزدى.

قاسىم-جومارت توقاەۆ مارتەبەلى مەيمانعا ءىلتيپات ءبىلدىرىپ، ونىڭ بۇل ساپارى قازاقستان مەن بىرىككەن اراب امىرلىكتەرى اراسىنداعى ىنتىماقتاستىققا تىڭ سەرپىن بەرەتىنىنە نازار اۋداردى.

پرەزيدەنتتىڭ ايتۋىنشا، امىرلىكتەر – ەلىمىزدىڭ ەڭ باستى سەرىكتەستەرىنىڭ ءبىرى. قوس مەملەكەتتىڭ ماقسات-مۇددەلەرى ءبىر-بىرىمەن سايكەس كەلەدى. 2023 جىلى ەكى ەل ۇكىمەتتەرى ستراتەگيالىق ينۆەستيتسيالىق جوبالاردى جۇزەگە اسىرۋ تۋرالى بىرلەسكەن دەكلاراتسياعا قول قويدى.

كەزدەسۋدە بىرىككەن اراب امىرلىكتەرىنىڭ قازاقستان ەكونوميكاسىنداعى ەڭ ءىرى شەتەلدىك ينۆەستورلاردىڭ وندىعىنا كىرەتىنى جونىندە ايتىلدى. بىلتىر ءباا-نىڭ ەلىمىزگە قۇيعان ينۆەستيتسيا كولەمى ەكى ەسەگە ارتىپ، رەكوردتىق كورسەتكىشكە جەتتى.

مەملەكەت باسشىسى اتالعان ساپار اياسىندا قۇنى 5 ميلليارد دوللاردى قۇرايتىن 20-دان استام كوممەرتسيالىق كەلىسىمگە قول قويىلاتىنىن قۇپتادى. ولاردى جۇزەگە اسىرۋ ەلدەر اراسىنداعى ستراتەگيالىق ىنتىماقتاستىقتى ايتارلىقتاي ىلگەرىلەتىپ، ءوزارا ءتيىمدى بايلانىستاردى نىعايتۋعا سەپتىگىن تيگىزەدى.

ابۋ ءدابيدىڭ تاق مۇراگەرى كورسەتىلگەن قوناقجايلىق ءۇشىن ريزاشىلىعىن ءبىلدىردى. سونىمەن قاتار تابيعاتى كوركەم، حالقى جايساڭ ەلىمىزگە ەرەكشە قۋانىشپەن كەلەتىنىن جەتكىزدى.

حالەد بەن مۇحاممەد ءال ناحايان قازاقستان مەن ءباا اراسىنداعى قارىم-قاتىناس ءوزارا سەنىم، قولداۋ جانە ورتاق يگىلىككە بىرگە ۇمتىلۋ قاعيداتتارىنا قۇرىلعانىن اتاپ ءوتتى. بۇل بايلانىستار ساۋدا-ينۆەستيتسيالىق ىقپالداستىق شەڭبەرىنەن شىعىپ، ەنەرگەتيكا، كولىك سالالارىنان باستاپ تسيفرلىق ينفراقۇرىلىم مەن ءبىلىم بەرۋ ىسىنە دەيىن جالعاسىپ جاتقان كەڭ اۋقىمدى باعىتتاردى قامتيتىنىنا توقتالدى.

تاق مۇراگەرىنىڭ ايتۋىنشا، بۇگىن قول قويىلاتىن كەلىسىمدەر ەكى ەلدىڭ بولاشاقتا دا بىرلەسىپ جۇمىس ىستەۋگە بەيىل ەكەنىن دالەلدەيدى.

مەملەكەت باسشىسى قاسىم-جومارت توقاەۆ پەن ابۋ ءدابيدىڭ تاق مۇراگەرى شەيح حالەد بەن مۇحاممەد بەن زايد ءال ناحاياننىڭ كەلىسسوزدەرى اياقتالعاننان كەيىن ەكىجاقتى قۇجاتتار الماسۋ ءراسىمى ءوتتى:

1. قازاقستان رەسپۋبليكاسى كولىك مينيسترلىگى مەن بىرىككەن اراب امىرلىكتەرى ەنەرگەتيكا جانە ينفراقۇرىلىم مينيسترلىگى اراسىندا اۆتوكولىك سالاسىنداعى ىنتىماقتاستىق تۋرالى مەموراندۋم;

2. قازاقستان رەسپۋبليكاسى ادىلەت مينيسترلىگى مەن بىرىككەن اراب امىرلىكتەرى ادىلەت مينيسترلىگى اراسىنداعى ىنتىماقتاستىق تۋرالى مەموراندۋم;

3. «سامۇرىق-قازىنا» ۇلتتىق ءال-اۋقات قورى» اق مەن Masdar كومپانياسى اراسىندا قازاقستان رەسپۋبليكاسىندا 2 مىڭ مۆت-قا دەيىن قۋات ساقتاۋ جۇيەسى جانە 500 مۆت-قا دەيىن تاۋلىكتىك ەنەرگيامەن قامتۋ جوبالارىن ازىرلەۋ بويىنشا ىنتىماقتاستىق تۋرالى كەلىسىم;

4. «سامۇرىق-قازىنا» ۇلتتىق ءال-اۋقات قورى» اق مەن AIQ اراسىندا قازاقستان رەسپۋبليكاسىنىڭ مۇناي-گاز سالاسىن تسيفرلىق ترانسفورماتسيالاۋ بويىنشا ستراتەگيالىق ىنتىماقتاستىق تۋرالى كەلىسىم;

5. «سامۇرىق-قازىنا» ۇلتتىق ءال-اۋقات قورى» اق مەن Abu Dhabi Commercial Bank اراسىندا ءوزارا تۇسىنىستىك جانە ىنتىماقتاستىق تۋرالى مەموراندۋم;

6. قازاقستان رەسپۋبليكاسى تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى مەن Presight كومپانياسى اراسىندا قازاقستان رەسپۋبليكاسىندا سۋپەركومپيۋتەر كلاستەرىن قۇرۋ جونىندەگى كەلىسىم;

7. «قازمۇنايگاز» ۇك» اق مەن Abu Dhabi Ports Group اراسىنداعى ساۋدا فلوتىن كەڭەيتۋ بويىنشا ىنتىماقتاستىقتى دامىتۋعا قاتىستى حاتتاما;

8. «QazaqGaz» ۇك» اق مەن AIQ اراسىندا مۇناي-گاز سالاسىن تسيفرلاندىرۋ باعىتىنداعى ىقپالداستىق ماسەلەلەرى بويىنشا ستراتەگيالىق ىنتىماقتاستىق جونىندەگى كەلىسىم;

9. تۇركىستان وبلىسى اكىمدىگى مەن ابۋ دابي دامۋ قورى اراسىندا تۇركىستان قالاسىندا شەيح مۇحاممەد بەن زايد ءال ناحايان اتىنداعى پەرزەنتحانا قۇرىلىسىن سالۋ جانە قارجىلاندىرۋعا قاتىستى ءوزارا تۇسىنىستىك تۋرالى مەموراندۋم;

10. قازاقستان رەسپۋبليكاسى كولىك مينيسترلىگى مەن Terminals Astana Airport Limited اراسىندا استانا قالاسىنىڭ نۇرسۇلتان نازارباەۆ حالىقارالىق اۋەجايى مەن وعان ىرگەلەس اۋماقتى دامىتۋعا ينۆەستيتسيا سالۋ تۋرالى كەلىسىم.

بۇدان بولەك، قۇجات الماسۋ راسىمىندە قازاقستان رەسپۋبليكاسى ۇكىمەتى مەن بىرىككەن اراب امىرلىكتەرى ۇكىمەتى اراسىندا جەل ەلەكتر ستانتسياسى جوباسىن ىسكە اسىرۋ تۋرالى كەلىسىمنىڭ راتيفيكاتسيالانعانى تۋرالى حابارلاندى.

Abai.kz