29 مامىر كۇنى ماسكەۋدە قازاقستاننىڭ بۇرىنعى پرەزيدەنتى نۇرسۇلتان نازارباەۆ پەن رەسەي پرەزيدەنتى ۆلاديمير پۋتين جەكە كەزدەسۋ وتكىزدى. بۇل تۋرالى رەسەي پرەزيدەنتىنىڭ ءباسپاسوز حاتشىسى دميتري پەسكوۆ تاسس اگەنتتىگىنە بەرگەن تۇسىنىكتەمەسىندە مالىمدەدى.

«بۇگىن، 29 مامىر كۇنى، پرەزيدەنت كرەملدە ماسكەۋدە جۇرگەن قازاقستاننىڭ ءبىرىنشى پرەزيدەنتى نۇرسۇلتان نازارباەۆپەن كەزدەستى»، – دەدى پەسكوۆ.

كەزدەسۋ بەيرەسمي سيپاتتا وتكەن. الايدا تاراپتار قانداي ماسەلەلەردى تالقىلاعانى تۋرالى ناقتى اقپارات ازىرگە جاريالانعان جوق.

بۇل ەكى ساياساتكەردىڭ سوڭعى جەكە كەزدەسۋى 2024 جىلدىڭ جەلتوقسانىندا وتكەن بولاتىن. سول جولى دا نازارباەۆ ماسكەۋگە ارنايى بارىپ، پۋتينمەن جەكە جۇزدەسكەن ەدى.

نۇرسۇلتان نازارباەۆتىڭ بۇل جولعى ساپارىنا قاتىستى ەل ىشىندە ءتۇرلى پىكىرلەر مەن الىپ-قاشپا اڭگىمەلەر تاراي باستادى. اسىرەسە الەۋمەتتىك جەلى قولدانۋشىلارى اراسىندا «نازارباەۆ ماسكەۋدە نە ىستەپ ءجۇر؟» دەگەن سۇراق ءجيى كوتەرىلدى.

وسىعان بايلانىستى ەلباسىنىڭ ءباسپاسوز حاتشىسى ايدوس ۇكىباي ارنايى تۇسىنىكتەمە بەرىپ، جاعدايعا نۇكتە قويدى. ونىڭ ايتۋىنشا، نازارباەۆ ماسكەۋگە ءوز ەركىمەن ەمەس، رەسەي تاراپىنىڭ شاقىرۋىمەن بارعان جانە ساپار رەسمي شارالارمەن بايلانىستى بولماعان.

«ساپار جەڭىس كۇنىمەن ورايلاستىرىلعان. الايدا قاسىم-جومارت توقاەۆتىڭ قاتىسۋىمەن وتكەن رەسمي پارادپەن قاباتتاسپاۋ ءۇشىن، نۇرسۇلتان ءابىشۇلى كرەملگە كەيىنىرەك بارعان. بۇل – دوستىق سيپاتتاعى، بەيرەسمي كەزدەسۋ بولدى»، – دەدى ۇكىباي.

ول سونداي-اق نازارباەۆتىڭ پۋتينمەن عانا ەمەس، تۇركيا، قىتاي، ءباا، وزبەكستان جانە بەلارۋس باسشىلارىمەن دە ءجيى حابارلاسىپ، بەيرەسمي فورماتتا كەزدەسىپ تۇراتىنىن اتاپ ءوتتى. مۇنداي ديپلوماتيالىق قارىم-قاتىناس حالىقارالىق تاجىريبەدە قالىپتى جاعداي سانالادى.

سوڭىندا ۇكىباي ەكس-پرەزيدەنتتىڭ شەتەلگە ءبىرجولا كوشىپ كەتكەنى تۋرالى قاۋەسەتتى جوققا شىعاردى.

«نۇرسۇلتان ءابىشۇلى قازاقستاندا تۇرادى. ەشقايدا قونىس اۋدارعان جوق. الىپ-قاشپا اڭگىمەلەرگە سەنبەڭىزدەر»، – دەپ مالىمدەمە جاسادى ءباسپاسوز حاتشىسى.

Abai.kz