اقوردادا استاناعا رەسمي ساپارمەن كەلگەن بولگاريا پرەزيدەنتى رۋمەن رادەۆتى سالتاناتتى قارسى الۋ ءراسىمى ءوتتى. بۇل تۋرالى اقوردانىڭ ءباسپاسوز قىزمەتى حابارلادى.

قۇرمەتتى قوناقتى قارسى الۋ راسىمىندە مەملەكەتتەر باسشىلارى ءبىر-بىرىنە رەسمي دەلەگاتسيا مۇشەلەرىن تانىستىردى. قۇرمەت قاراۋىلىنىڭ باستىعى راپورت بەرگەن سوڭ ەكى ەلدىڭ مەملەكەتتىك ءانۇراندارى شىرقالدى.

جوعارى دەڭگەيدە وتەتىن كەلىسسوزدەر بارىسىندا قازاق-بولگار ساۋدا-ەكونوميكالىق جانە ينۆەستيتسيالىق ىنتىماقتاستىعىنىڭ پەرسپەكتيۆاسى تالقىلانادى.

رۋمەن رادەۆ كىم؟

61 جاستاعى رۋمەن رادەۆ بولگاريانىڭ بەسىنشى پرەزيدەنتى. ول قىزمەتىنە 2017 جىلدىڭ قاڭتارىندا كىرىسكەن. 2014-2016 جىلدارى بولگاريانىڭ اسكەري اۋە كۇشتەرىن باسقارعان. شەنى – گەنەرال-مايور.

رادەۆ اسكەري تۇلعا. 1992 جىلى امەريكا قۇراما شتاتتارىنداعى ماكسۆەلل ەسكادرونىنىڭ وفيتسەرلەر مەكتەبىن بىتىرگەن. 2003 جىلى ول اقش-تاعى ماكسۆەلل AFB اۋە سوعىسى كوللەدجىن ستراتەگيالىق زەرتتەۋلەر ماگيسترى دارەجەسىمەن ۇزدىك اياقتاعان.

1987 جىلدان باستاپ اسكەري كارەراسىن باستاعان. ءبىرىنشى دارەجەلى ۇشقىش. اسكەري كارەراسىندا ۇزىن-ىرعاسى 1400 ساعات ۇشقان ەكەن. ول L-29, L-39, ميگ-15ۋتي، ميگ-17, ميگ-21, ميگ-29, F-15, F-16, F/ا-18, ەۋروفايتەر، تايفۋن سەكىلدى زامانۋاي جويعىش ۇشاقتاردى تىزگىندەگەن.

ال ساياسي كارەراسى 2016 جىلدان باستالادى. 2016 جىلى بولگاريانىڭ سوتسياليستىك پارتياسى رادەۆتى پرەزيدەنتتىككە ۇمىتكەر رەتىندە ۇسىنعان. پرەزيدەنتتىك قىزمەتىنە 2017 جىلى كىرىسكەن. ال 2021 جىلعى سايلاۋدا ول قايتادان پرەزيدەنت بولىپ سايلانعان.

Abai.kz