الماتى مامىر ايىندا ەلدەگى يفلياتسيالىق كورسەتكىش بويىنشا الدىڭعى ورىنعا شىقتى.

ۇلتتىق بانك مالىمەتىنشە، مامىردا ەلدە جىلدىق ينفلياتسيا جەدەلدەپ، 11,3% بولدى (ساۋىردە – 10,7%). جىلدىق ينفلياتسيا 16 وڭىردە جەدەلدەدى، 3 وڭىردە باياۋلاپ، 1 وڭىردە بۇرىنعى دەڭگەيدە ساقتالدى.

جىلدىق ينفلياتسيانىڭ 13,0%-دىق ەڭ جوعارى ءمانى الماتى قالاسىندا تىركەلدى. ەكونوميست ايبار ولجايدىڭ پىكىرىنشە، مەگاپوليستەگى قىمباتشىلىققا ءتۇرلى فاكتورلار اسەر ەتكەن.

الماتىداعى باعانىڭ وسۋىنە قالاداعى كوممۋنالدىق تاريفتەردىڭ باسقا وڭىرلەرگە قاراعاندا قىمباتتاۋى سەپتىگىن تيگىزدى. ەكىنشى فاكتور، قالادا تابىس كورسەتكىشى جوعارى بولعاندىقتان تۇتىنۋ سەبەتى دە جوعارى. ءتۇرلى تاماق اسسورتيمەنتى كوپ ساتىلادى، ادامدار كوپ. سونداي-اق بۇل تۇرعىن ءۇي نارىعىنا دا قاتىسى بار. قالاداعى جەردىڭ ازدىعىنا بايلانىستى تۇرعىن ۇيلەر دە قىمباتتاپ جاتىر، بۇل دا ءوز كەزەگىندە ينفلياتسياعا ۇلەسىن بەرەدى، – دەيدى ەكونوميست.

ماماندار ايتۋىنشا، مامىردا ازىق-تۇلىك تاۋارلارىنىڭ باعاسى جىلدىق ماندە 9,6%-عا دەيىن جەدەلدەدى (ساۋىردە – 8,5%). وسى توپقا جاتاتىن تاۋارلار باعاسى اقمولا وبلىسىندا (11,4%) ەڭ جوعارى، ال الماتى قالاسىندا (8,0%) تومەن ءوسىم كورسەتتى.

مامىردا ازىق-تۇلىككە جاتپايتىن تاۋارلار باعاسىنىڭ ءوسىمى جىلدىق ماندە 9,0%-عا جەتتى (ساۋىردە – 8,9%). ەڭ جوعارى ءمان تۇركىستان وبلىسىندا (14,2%), ەڭ تومەنگى ءمان پاۆلودار وبلىسىندا (5,4%) تىركەلدى. وتكەن ايدا اقىلى قىزمەتتەردىڭ باعاسى جىلدىق ماندە 16,0%-عا دەيىن ءوستى (ساۋىردە – 15,7%). سونىمەن قاتار الماتى قالاسىندا (22,5%) باعا جالپى رەسپۋبليكالىق دەڭگەيدەن جوعارى، الماتى وبلىسىندا (11,3%) ايتارلىقتاي تومەن ءوسىم تىركەلدى، – دەپ حابارلادى ۇلتتىق بانك.

ايتا كەتەيىك، مامىردا ايلىق ينفلياتسيا ەلدە 0,9%-عا ءوستى.

Abai.kz