بۇگىنگى جاھاندىق ەكونوميكا كەشە عانا كورگەن بەينەمىز ەمەس. دۇنيەنى بەس باعىتتان – بەس د-نىڭ داۋىلى شايقاپ تۇر: دەگلوباليزاتسيا، دەكاربونيزاتسيا، ءدۇدامال قارىز، ديدجيتاليزاتسيا، دەموگرافيا.

قاراپايىم تىلمەن ايتساق…

دەگلوباليزاتسيا – الەم ءبىرتۇتاس نارىق بولۋدان قالىپ بارادى. ءار ەل ءوز تاۋارىن ءوزى ءوندىرىپ، شەكارا سىرتىنان كەلەتىنگە شەكتەۋ قويۋدا. ينفلياتسيانىڭ ءورشۋى مەن ەكونوميكالىق وقشاۋلانۋدىڭ باستى سەبەبى دە وسى.

دەكاربونيزاتسيا – كليمات وزگەرىسى جاي عانا ەسكەرتۋ ەمەس، ەندى ءار ۇيگە ەنىپ كەلە جاتقان ناقتى قاۋىپ. تابيعاتتىڭ توسىن مىنەزى داۋىل، ءورت، تاسقىن – ءبارى بيۋدجەتتى جۇتىپ جاتىر. ياعني، تاعى دا – ينفلياتسيا.

دەموگرافيا – حالىقتىڭ قارتايۋى، تۋ كورسەتكىشىنىڭ ازايۋى زەينەتاقى مەن مەديتسينا شىعىنىن ارتتىرىپ، جۇمىس ىستەيتىن ادام سانىنىڭ ازايۋىنا اكەلۋدە. بۇل دا سالىق بازاسىن تارىلتىپ، مەملەكەتكە قىسىم تۇسىرەدى.

ءدۇدامال قارىز – پاندەميا كەزىندە الىنعان تريلليوندار ەلدەردىڭ قارىزىن رەكوردتىق دەڭگەيگە جەتكىزدى. قازىر كەيبىر ەلدەر بورىشىنىڭ ءوسىمى قورعانىس بيۋدجەتىنەن دە اسىپ كەتكەن.

ديدجيتاليزاتسيا – بۇل بەس «د»-نىڭ ىشىندەگى جالعىز ءۇمىت وتى. گەنەراتيۆتى جاساندى ينتەللەكت پەن تسيفرلىق تەحنولوگيالار ونىمدىلىكتى ارتتىرىپ، ەنەرگيانى ۇنەمدەپ، تازا ءوندىرىس قۇرالدارىن دامىتۋدىڭ جولىن اشۋى مۇمكىن.

دەرەككوزى: مىڭ تەڭگە تەلەگرام ارناسى

Abai.kz