اپتا باسىندا پرەزيدەنت قاسىم-جومارت توقاەۆ ادامنىڭ بەت-الپەتىن تولىق جاباتىن نيقاب سەكىلدى كيىمگە قوعامدىق ورىنداردا تىيىم سالۋ تۋرالى زاڭعا قول قويعان. ەندى ءمۇفتيات جاڭا ەرەجەنى قولداپ وتىر.

«بۇل شەشىم قانداي دا ءبىر ءدىني سەنىمدى نەمەسە جەكە تاڭداۋدى شەكتەۋ ءۇشىن ەمەس، ەڭ الدىمەن قوعام قاۋىپسىزدىگىن قامتاماسىز ەتۋ قاجەتتىلىگىنەن تۋىنداپ وتىر. قازىرگى تاڭدا الەمنىڭ كوپتەگەن ەلدەرى، ونىڭ ىشىندە مۇسىلمان ەلدەرى دە قاۋىپسىزدىك ماقساتىندا وسىنداي ۇستانىمدى قابىلداپ جاتىر»، – دەپ مالىمدەدى ءمۇفتيات.

بۇعان قوسا ءدىني باسقارما قۇرانداعى «نۇر» سۇرەسىنىڭ ايەل كىسىلەردىڭ اۋرەت جەرىنە قاتىستى 31-اياتىن كەلتىردى.

«ءمۇمين ايەلدەرگە ايت: «(بوگدە ەرلەردەن) كوزدەرىن ساقتاسىن. ءارى ۇياتتى جەرلەرىن قورعاسىن. سونداي-اق زەينەتتەرىن كورسەتپەسىن. بىراق ولاردىڭ وزدىگىنەن كورىنگەندەرى (بەتى، قول-اياقتارى) بۇدان تىس جانە بۇركەنشىكتەرىن ومىراۋلارىنا ءتۇسىرسىن. زەينەتتەرىن كورسەتپەسىن»، – دەپ جازىلعان بۇل اياتتا.

پايعامباردىڭ حاديسىندە «باليعات جاسىنا جەتكەن قىزدىڭ (سىرت كوزگە) مىنا ەكەۋىنەن باسقا جەرىنىڭ كورىنگەنى دۇرىس ەمەس دەپ، بەتى مەن ەكى قولىن كورسەتكەن».

«جوعارىدا قۇران اياتتارى مەن حاديستە باياندالعانداي، ايەل كىسىلەر بەت-ءجۇزىن جابۋعا نەمەسە بۇركەمەلەۋگە مىندەتتەلمەگەن. بۇل حالقىمىزدىڭ داستۇرىندە دە كورىنىس تاپپاعان»، – دەپ جازىلعان ءمۇفتيات مالىمدەمەسىندە.

سونىمەن بىرگە ءدىني باسقارما بارشا مۇسىلماندى «زاڭعا تۇسىنىستىكپەن قاراپ، ورتاق يگىلىك جولىندا بىرلىكتى بەكەمدەۋگە» شاقىردى.