ءماجىلىس دەپۋتاتى ەرمۇرات باپي ەلىمىزدىڭ سوڭعى وتىز جىلىنداعى ساياسي-ەكونوميكالىق احۋالعا باعا بەرىپ، بۇگىنگى وزگەرىستەردىڭ ماڭىزىن اتاپ ءوتتى.

دەپۋتاتتىڭ ايتۋىنشا، بۇرىن بيلىك پەن بايلىقتىڭ ءبىر قولعا شوعىرلانۋى ۇيرەنشىكتى «ءتارتىپ» بولىپ، وعان قارسى شىققاندار قۋدالاناتىن. حالىقتىڭ مۇڭ-مۇقتاجى نازاردان تىس قالعان ەدى.

«ترانسفورماتسيانىڭ «ءبىسمىللاسىندا» توقاەۆ ات توبەلىندەي شوعىر وليگارحتاردى ءبىر زالعا جيناپ الىپ، بارىنە بىردەي «ەسكەرتۋ» جاسادى. بۇدان بىلاي ولار ءۇشىن «ءۇرىپ ءىشىپ، شايقاپ توگەتىن» ءداۋىر اياقتالعانىن ەستىرتتى. وسىدان سوڭ عانا سەڭ قوزعالىپ، بۇكىل ەلدىڭ ىرىسىن ۋىسىندا ۇستاعان «كلانداردىڭ» ىرگەسى سوگىلە باستادى. وزگەرىستىڭ بۇگىنگى تاڭداعى ارالىق ناتيجەسى – مەملەكەتتىك باسقارۋ جۇيەسى ەسەپ بەرۋ مەن اشىقتىققا، ءادىل باسەكەگە بەت بۇردى. جاڭا زاڭدار قابىلدانىپ، قوعامدىق قاتىناستار قايتا تۇزىلە باستادى»، - دەدى ەرمۇرات باپي.

ونىڭ سوزىنشە، قازىر مەملەكەتتىك باسقارۋ جۇيەسى ەسەپ بەرۋگە، اشىقتىق پەن ءادىل باسەكەگە باعىت الىپ وتىر. سۋپەرپرەزيدەنتتىك بيلىك شەكتەلىپ، پرەزيدەنتتىڭ ءبىراز وكىلەتى پارلامەنت پەن ۇكىمەتكە ءوتتى. جوعارعى پالاتاداعى «پرەزيدەنتتىك كۆوتا» 15-تەن 10-عا ازايدى.

«ەندىگى جەردە توقاەۆتان باستاپ، قازاقستان پرەزيدەنتتەرى ءبىر عانا مەرزىمگە – جەتى جىلعا سايلانادى. بۇل – كىمدە-كىم ءۇشىن ارتىندا ىزگى ىستەرىن مۇرا ەتىپ، ەل تاريحىندا جاقسى اتىن قالدىرۋ ءۇشىن جەتكىلىكتى مەرزىم. توقاەۆ تۇزگەن ساياسي ونەگەنىڭ ەڭ ابزالى وسى، بالكىم»، - دەدى دەپۋتات.

سونداي-اق ەرمۇرات باپي كونستيتۋتسيالىق كەڭەستىڭ ورنىنا كونستيتۋتسيالىق سوتتىڭ قايتا قۇرىلىپ، ازاماتتاردىڭ قۇقىقتارىن قورعاۋ مەحانيزمى نىعايعانىن، 2023 جىلدان بەرى 7 مىڭنان اسا قازاقستاندىقتىڭ ءوز قۇقىعىن قورعاۋ ءۇشىن وسى سوتقا جۇگىنگەنىن اتاپ ءوتتى.

سونىمەن قاتار ادام قۇقىعى جونىندەگى ۋاكىلدىڭ قۇزىرەتى كۇشەيىپ، ءار ايماقتا ۋاكىلدەر تاعايىندالدى. كونستيتۋتسيادان ەلباسى مەن ونىڭ مارتەبەسى تۋرالى ارتىقشىلىقتار الىنىپ تاستالدى.

Abai.kz