قارىزعا باتقان جاستار NEET ساناتىنا ءوتۋى مۇمكىن. بۇل — جۇمىسسىزدىق، رەسمي تابىستىڭ بولماۋى جانە الەۋمەتتىك بەلسەندىلىكتىڭ تومەندەۋ قاۋپى بار دەگەن ءسوز. ەڭبەك جانە حالىقتى الەۋمەتتىك قورعاۋ مينيسترلىگىنە ساۋال جولدادى.

رەسمي حاتتا "قازىرگى تاڭدا بىرقاتار جاستار بانكتەر مەن ميكروقارجى ۇيىمدارىنا، سونداي-اق تانىستارى مەن تۋىستارىنا قارىزعا باتىپ، قارىزدارىن قايتارا الماي جۇرگەنى بەلگىلى. ولاردىڭ كەيبىرى رەسمي جۇمىسقا ورنالاسا المايدى، تولەم كارتالارى بۇعاتتالاعان. بۇل جاعداي ولاردى كەيىن NEET ساناتىنا وتكىزۋى مۇمكىن. مۇنداي جاستاردى قولداۋ ءۇشىن مينيسترلىك قانداي شارالار قابىلداي الادى؟" دەپ ساۋال قويىلعان.

قازىرگى ۋاقىتتا جۇمىسپەن قامتۋدى قامتاماسىز ەتۋ جۇمىسپەن قامتۋعا جاردەمدەسۋدىڭ بەلسەندى شارالارى شەڭبەرىندە ىسكە اسىرىلادى جانە ول كاسىپكەرلىك باستامانى قولداۋدى، جۇمىس ورىندارىن سۋبسيديالاۋدى جانە قىسقا مەرزىمدى كاسىپتىك وقىتۋدى قامتيدى. جۇمىس ىزدەۋدە قيىندىقتارعا تاپ بولعان جۇمىسسىز ازاماتتار جەكە قاجەتتىلىكتەرىنە قاراي جۇمىسقا ورنالاسۋعا قولداۋ الا الادى، - دەلىنگەن ۆەدومستۆو جاۋابىندا.

قانداي قولداۋ شارالارى بار؟

مينيسترلىك بەلسەندى جۇمىسپەن قامتۋ شارالارى اياسىندا:

"باستاۋ بيزنەس" جوباسى ارقىلى ونلاين كاسىپكەرلىك وقىتۋ (skills.enbek.kz ارقىلى);

400 اەك-كە دەيىنگى مەملەكەتتىك گرانتتار (الەۋمەتتىك وسال توپتارعا);

جۇمىس ورىندارىن سۋبسيديالاۋ – "جاستار پراكتيكاسى", "العاشقى جۇمىس ورنى", "ۇرپاقتار كەلىسىمشارتى";

قىسقا مەرزىمدى كاسىپتىك وقىتۋ (جۇمىس ورنىندا، وقۋ ۇيىمدارىندا جانە ونلاين) سىندى مۇمكىندىكتەر ۇسىنادى.

– جۇمىس تاجىريبەسى جوق جاستارعا نە ۇسىنىلادى؟

وقۋ ورنىن ەندى بىتىرگەن جاستار ءۇشىن "جاستار پراكتيكاسى" قاراستىرىلعان. بۇل جوبا مامان رەتىندە العاشقى تاجىريبە جيناۋعا مۇمكىندىك بەرەدى. ال "ۇرپاقتار كەلىسىمشارتى" اياسىندا زەينەتكەرلىك جاسقا جاقىنداعان ماماندار ءوز تاجىريبەسىن جاستارعا ۇيرەتەدى.

– ءوز ءىسىن باستاۋ ءۇشىن نە ىستەۋ كەرەك؟

جەكە كاسىپ اشقىسى كەلەتىن جاستار "باستاۋ بيزنەس" ارقىلى وقىپ، الەۋمەتتىك وسال توپتار قاتارىنان بولسا، 400 اەك كولەمىندە گرانت الا الادى. بۇل جوبا تولىقتاي اۆتوماتتاندىرىلىپ، ونلاين جۇزەگە اسىرىلادى.

– تاعى قانداي تسيفرلىق مۇمكىندىكتەر بار؟

2021 جىلدان باستاپ skills.enbek.kz پلاتفورماسى جۇمىس ىستەيدى. وندا ەڭبەك نارىعىندا سۇرانىسقا يە داعدىلار بويىنشا ونلاين وقۋعا بولادى. سونىمەن قاتار، "Mansap Compasy" اتتى جاڭا پلاتفورما ىسكە قوسىلدى. بۇل جۇيە ارقىلى مەكتەپ بىتىرۋشىلەر مەن ستۋدەنتتەر سۇرانىسقا يە ماماندىقتار، ءبىلىم بەرۋ تالاپتارى جانە گرانتتار تۋرالى اقپارات الا الادى.

ەسكە سالايىق، بۇعان دەيىن قازاقستاندا بالالار مەن جاستار اراسىندا ءجيى كەزدەسەتىن 6 اۋرۋءتۇرى جونىندە جازعان ەدىك. دەنساۋلىق ساقتاۋ مينيسترلىگى دەرەگىنە سايكەس بالالار مەن جاسوسپىرىمدەر ساناتىنداعى ازاماتتار اراسىندا بىرقاتار اۋرۋ تۇرلەرى ءجيى كەزدەسەدى.

Abai.kz